ޖިންސީ ގޯނާ ކުރިކަމުގެ ތުހުމަތުގައި ބަންގްލަދޭޝް މީހަކަށް ހަމަލާދީފި
5 ޖޫން 2019 | ބުދަ 08:50ހާދިސާ ހިނގާފައިވަނީ އަންގާރަ ދުވަހުގެރޭ
ށ. މިލަންދޫ
ށ. މިލަންދޫގައި އަންހެން ކުއްޖަކަށް ޖިންސީ ގޯނާކުރި ކަމަށް ތުހުމަތު ކުރެވޭ ބަންގްލަދޭޝް މީހަކަށް އެ ރަށު ބަޔަކު ހަމަލާދީފިއެވެ.
މިލަންދޫގައި ބިދޭސީއަކަށް ހަމަލާދިންކަމުގެ މައުލޫމާތު އަންގާރަ ދުވަހުގެރޭ ލިބިފައިވާ ކަމަށް ފުލުހުން ވެސް ވަނީ ކަށަވަރު ކޮށްދީފައެވެ. މާރާމާރީ ހިނގަން މެދުވެރިވި ކޮން ސަބަބަކާ ހުރެ ކަމެއް ފުލުހުން ހާމައެއް ނުކުރެއެވެ. ފުލުހުންގެ މީޑިއާ އޮފިޝަލް ފޯނަށް ޖަވާބު ނުދެއްވާތީ އިތުރު މައުލޫމާތެއް ލިބޭ ގޮތް ވަނީ ނުވެފައެވެ.
މިލަންދޫ ކައުންސިލްގެ ރައީސް އަބްދުﷲ ފާއިޒް ރާއްޖެއެމްވީ އަށް ވިދާޅުވީ، ބަންގްލަދޭޝް މީހާ ޖިންސީ ގޯނާ ކޮށްފައި ވަނީ އެ ރަށު ފިހާރައެއްގެ ސޭޓަކަށް މަސައްކަތް ކުރާ އަންހެނަކަށް ކަމަށެވެ. މި ހަފްތާގެ ހޯމަ ދުވަހު އެ ބިދޭސީ މީހާ އެ އަންހެން މީހާ އަށް ޖިންސީ ގޯނަކުރުމަށް ފަހު އަންގާރަ ދުވަހުގެރެއާ ޖެހެންދެން އުޅުނީ އެރަށު އެހެން ބިދޭސީއަކު ދިރިއުޅޭ ގެއެއްގައި ފިލައިގެން ކަމަށް އޭނާ ވިދާޅުވިއެވެ.
ފާއިޒް ވިދާޅުވީ، އަންހެން މީހާ އެ ވާހަކަ ބަޔަކާ ހިއްސާކުރުމުން އެ މީހުން އެ ބޭރުމީހާ ހޯދަން ރަށު ތެރެއަށް ނިކުމެ، އެ މީހާ ފޮރުވަން މަސައްކަތް ކޮށްދިން މީހާ އަންގާރަ ދުވަހު ހޯދި ކަމަށެވެ. އަދި އެ މީހާއަށް އަނިޔާ ކުރުމަށް ފަހު ޖިންސީ އަނިޔާ ކުރި ބިދޭސީ މީހާ ހޯދައި އެ މީހާ އަށް ވެސް ހަމަލާދީ މާރާމާރީ ހިންގި ކަމަށް އޭނާ ވިދާޅުވިއެވެ. އެ މީހާ އަށް ލިބުނު އަނިޔާތަކަށް ސިއްހީ މަރުކަޒުން ފަރުވާ ވެސް ދީފައިވެއެވެ.
ފާއިޒް ވިދާޅުވީ، އެ މައްސަލާގައި އެ ރަށު އެއްވެސް މީހަކު ހައްޔަރު ކުރަން ނުޖެހޭ ކަމަށެވެ. އަދި އެ މައްސަލާގައި ހައްޔަރު ކުރަން ޖެހޭނީ ބަންގްލަދޭޝް މިހާ ކަމަށެވެ.
އޭނާ ވިދާޅުވީ އެ ފަދަ ކަންކަން ހިނގަނީ އެރަށުގައި ގަވާއިދާ ހިލާފަށް އުޅޭ ބިދޭސީން ގިނަވުމުން ކަމަށެވެ.
މި ފަހަކަށް އައިސް ރައްޔިތުން ނިކުމެ އަމިއްލަ އަށް އިންސާފު ހޯދަން މަސައްކަތްކުރާ ކަން ވަނީ ފާހަގަކުރެވިފައެވެ. އެގޮތުން ކ. ދިއްފުށީގައި ވައްކަން ކުރި ކަމަށް ތުހުމަތު ކުރެވޭ ބަޔަކަށް ރައްޔިތުން ނުކުމެ ހަމަލާދީފައިވާއިރު ހުޅުމާލޭގައި ކުޑަކުއްޖަކަށް ޖިންސީ ގޯނާކުރިކަމުގެ ތުހުމަތުގައި މީހަކު ވަނީ ގަންހިންގުވާފައެވެ. އަދި މާލޭގައި ފިހާރައަކުން ވައްކަންކުރި ކަމުގެ ތުހުމަތުގައި މީހަކު ހިފަހައްޓައި ބުރަކަށީގައި "ވަގު" ލިޔެފައި ވެއެވެ. ބައެއް ފަރާތްތަކުން ބުނާ ގޮތުން ރައްޔިތުން ނިކުންނަން ޖެހޭނީ ފުލުހުންނަށް އެކަންތައް ކޮންޓްރޯލް ނުކުރެވުމުންނެވެ. އެފަދަ ކަންކަން އިތުރުވަމުން ދާތީ ފުލުހުން ވަނީ ރައްޔިތުން ނުކުމެ މަގުމަތިން އަދަބު ނުދިނުމަށް އިލްތިމާސްކޮށްފައެވެ.
