ސިޓީން އުންމީދުކުރަނީ ސިލްވާ މަޑުކުރާނެ ކަމަށް

މެންޗެސްޓާ ސިޓީން އުންމީދުކުރަނީ އެ ކްލަބަށް ކުޅެމުން އަންނަ ސްޕެއިންގެ މިޑްފިލަޑަރ ޑޭވިޑް ސިލްވާ ކްލަބުގައި މަޑުކުރާނެ ކަމަށް ރިޕޯޓްތައް ބުނެފިއެވެ.

ބީބީސީން ބުނީ، ކުރިޔަށް އޮތް ސީޒަނުގައިވެސް ސިލްވާ ކްލަބުގައި މަޑުކުރާނެ ކަމަށް ސިޓީން އުންމީދުކުރާ ކަމަށާއި، އޭނާ ކްލަބުގައި މަޑުކުރުވަން ސިޓީން މަސައްކަތް ކުރަމުން އަންނަ ކަމަށެވެ.

އުމުރުން 33 އަހަރުގެ ސިލްވާ ސިޓީއާއެކު ހަދާފައިވާ އެއްބަސްވުން 2022 ވަނަ އަހަރު ހަމަވާއިރު، އޭނާ ހޯދުމަށް ގިނަ ކްލަބްތަކުން އަންނަނީ މަސައްކަތް ކުރަމުންނެވެ.

ސިލްވާއާ ބެހޭގޮތުން ސިޓީގެ ކޯޗު ޕެޕް ގާޑިއޯލާ ބުނީ، ލްވާގެ ކުޅުމަށް އެއް އަހަރުން އަނެއް އަހަރަށް ބަދަލެއް ނާން ކަމަށާއި، އޭނާ ކުޅެނީ ޓޮޕް ފޯމުގައި ކަމަށެވެ. އަދި އެއީ ސިޓީއަށް މުހިންމު ކުޅުންތެރިޔެއް ކަމަށްވެސް ގާޑިއޯލާ ވަނީ ބުނެފައެވެ.

ސިލްވާ ގުޅިފައިވަނީ 2010 ވަނަ އަހަރުއެވެ. އޭނާ ކުޅެމުންދިޔަ ސްޕެއިންގެ ވެލެންސިއާ ދޫކޮށް ސިޓީއަށް ބަދަލުވީ 24 މިލިއަން ޕައުންޑްގެ އެއްބަސްވުމެއްގެ ދަށުންނެވެ.

ސިލްވާ ވަނީ ސިޓީއަށް 395 މެޗު ކުޅެދީ އެ ޓީމަށް 70 ލަނޑު ޖަހައިދީފައެވެ. ހަމައެހެންމެ އޭނާވަނީ އެ ޓީމާއެކު ހަތަރު ޕްރިމިއާ ލީގާއި، ދެ އެފްއޭ ކަޕްއެއްގެ އިތުރުން ހަތަރު ފަހަރެއްގެ އިނގިރޭސި ލީގު ކަޕް ކާމިޔާބު ކޮށްފައެވެ.

އުމުރުން 16 އަހަރުން ފެށިގެން ސްޕެއިންގެ ގައުމީ ޓީމުތަކަށް ކުޅެމުން އަންނަ ސިލްވާ ވަނީ ސްޕެއިންގެ ސީނިއާ ޓީމަށް ކުޅުނު 125 މެޗުގައި 35 ލަނޑު ކާމިޔާބުކޮށްފައެވެ.

އޭނާ ވަނީ ސްޕެއިން ގައުމީ ޓީމާއެކު ފީފާ ވޯލްޑް ކަޕް އެއްފަހަރު، ޔުއެފާ ޔޫރޯ ދެފަހަރު، ފިފާ ކޮންފެޑެރޭޝަންސް ކަޕްގެ ދެވަނަ އަދި ތިންވަނަ ހޯދާފައެވެ.