ފިތުރު އީދަކީ އެކުވެރިކަން އާލާކުރާ ޢީދަކަށް ހެދުމަށް ޚުތުބާގައި ގޮވާލައިފި

މިއަހަރުގެ ފިތުރު ޢީދަކީ އެކުވެރިކަން އާލާ ކުރާ ޢީދަކަށް ހެދުމަށް މިއަދު އީދު ނަމާދުގެ ޚުތުބާގައި ގޮވާލައިފިއެވެ.

"ބަރަކާތްތެރި އީދުލް ފިތުރި" މި މައުޟޫގެ މައްޗަށް ބިނާކޮށް ދިން ޚުތުބާގައި ބުނީ، އީދުގެ މުނާސަބަތަކީ ހަސަދަވެރިވުމާއި ބައިބައިވުމާ ދުރުހެލިވުމަށް އަޒުމު ކަނޑައަޅައި އެއްބައިވަންތަކަން އިސްކުރުމަށް ލިިބިގެންދާ ރަނގަޅު ފުރުސަތެއް ކަމަށާއި، މިއީ ގާތްތިމާގެ ކަމުގެ ގުޅުން ފަދަ މަތިވެރި ގުޅުންތައް ބަދަހިކުރަންވީ ދަނޑިވަޅެއް ކަމަށެވެ. އަދި އީދާ ގުޅިގެން އުފާ ފާޅުކުރާއިރު، ތަނަވަސްކަން ނެތް މީހުން ވެސް ބައިވެރި ކުރުމަށް ޚުތުބާގައި ވަނީ ގޮވާލާފައެވެ.

ޚުތުބާގައި އިތުރަށް ބުނީ، ފިތުރު ޢީދަކީ ރަމަޟާން މަހުގެ ރޯދައާ ގުޅިގެން އަންނަ ޢީދެއް ކަމަށާއި، ރަމަޟާން މަސް ނިމުނު ކަމުގައި ވިޔަސްް އަޅުކަމާއި ހެޔޮ އަމަލު ކުރުމުން ދުރުހެލިވެގެން ނުވާނެ ކަމަށެވެ. އަދި ރަމަޟާން މަހަށް ފަހު ޝައްވާލު މަހުގެ 6 ރޯދަ ހިފުމުގެ މާތް ކަމަށް ވެސް ޚުތުބާގައި އަލިއަޅުވާލާފައި ވެއެވެ.

އެކުވެރިކަމާއި އެއްބައިވަންތަކަމަށް މިއަދުގެ ޢީދު ޚުތުބާގައި ގޮވާލާފައިވާއިރު، ޢީދު ދުވަހަކީ ސާފު ހިތަކައިގެން އެކަކު އަނެކަކާ ސަލާންގަލާންކޮށް، އެކުވެރިކަމާއި ރަޙްމަތްތެރިކަން އާލާކުރަންވީ ދުވަހެއް ކަމަށާއި ލޯތްބާ އެކު އެއްބަނޑު އެއްބަފާކަމުގެ ގުޅުންތައް އަލުން ދިރުވައި ދަމަހައްޓަންވީ ދުވަހެއް ކަމަށް ޢީދާ ގުޅިގެން ރައީސް ސޯލިހު ދެއްވި ޚިތާބުގައި ވެސް ވިދާޅުވެފައި ވެއެވެ.