އިންޑިއާ ސަރުކާރުގެ ހިލޭ އެހީގެ ދަށުން ދެ ރަށެއްގައި އައިސް ޕްލާންޓް އަޅަނީ
ބަހައްޓަނީ 25 މެޓްރިކް ޓަނުގެ ދެ އައިސް ޕްލާންޓް
މަސްވެރިންތަކެއް މަސް ބާނަނީ: ތާޒާކޮށް މަސް ރައްކާ ނުކުރެވި އުކާލަން ޖެހުމަކީ މަސްވެރިންގެ ޝަކުވާއެއް
އިންޑިއާ ސަރުކާރުން ދިވެހިރާއްޖެއަށް ލިބިފައިވާ 106 މިލިއަން ދިވެހި ރުފިޔާ (6.9 މިލިއަން ޑޮލަރު) ގެ ހިލޭ އެހީގެ ތެރެއިން، ދެ ރަށެއްގައި އައިސް ޕްލާންޓް އަޅަން ނިންމައިފިއެވެ.
އައިސް ޕްލާންޓް އެޅުމުގެ މަޝްރޫއުގެ ދަށުން 25 މެޓްރިކް ޓަނުގެ ދެ އައިސް ޕްލާންޓް ބަހައްޓަން ނިންމާފައިވަނީ މަސްވެރިން ގިނަ ދެ ރަށެއްގައެވެ. ވަރަށް އަވަސް ތާރީހެއްގައި އެއީ ކޮން ދެ ރަށެއްކަން އިއުލާން ކުރާނެ ކަމަށް ފޮރިން މިނިސްޓްރީން މައުލާމާތު ދީފައިވެއެވެ.
ފޮރިން މިނިސްޓްރީން ހޯމަ ދުވަހު ނެރުނު ބަޔާނެއްގައި ބުނެފައިވަނީ އައިސް ޕްލާންޓްތައް ބެހެއްޓުމުގެ ސަބަބުން އުކާލަންޖެހޭ މަސް މަދުވެ، މަސް ގަންނަ ފަރާތްތަކަށް ވިއްކާ މަހުގެ ފެންވަރު ރަނގަޅު ވެގެންދާނެ ކަމަށެވެ. މި މަޝްރޫއުގެ ދަށުން އައިސް ޕްލާންޓް ހިންގުމުގައި ހަރަކާތްތެރިވާ ފަރާތްތައް ތަމްރީންކުރެވޭނެ ކަމަށް ވެސް ފޮރިން މިނިސްޓްރީން ބުނެފައިވެއެވެ.
މި ހިލޭ އެހީއަކީ އިޖްތިމާއީ-އިގްތިސާދީ ތަރައްގީއަށް ބޭނުންވާ ޕްރޮޖެކްޓްތައް ހިންގުމަށްޓަކައި އިންޑިއާ ސަރުކާރުން، އެ ގައުމުގެ މިނިސްޓަރ އޮފް އެކްސްޓަރނަލް އެފެއަރޒް ސުޝްމާ ސްވަރާޖް ރާއްޖެއަށް މާޗް މަހު ކުރެއްވި ރަސްމީ ދަތުރުފުޅުގައި ދޭން އެއްބަސްވެވުނު އެހީއެކެވެ. މި އެހީގެ ދަށުން ހިންގާ މަޝްރޫއުތައް ހިންގާނީ ދިވެހި ސަރުކާރުގެ ކަމާބެހޭ މުއައްސަސާތަކާ ގުޅިގެންނެވެ.
