ޔޫރޮޕާ ލީގު ފައިނަލުގައި އާސެނަލް ބަލިކޮށް ޗެލްސީން މުބާރާތުގެ ޗެމްޕިއަންކަން ހޯދައިފިއެވެ.

ބުދަ ދުވަހުގެ ރޭ ކުޅުނު ފައިނަލް މެޗު އާސެނަލްއާ ވާދަކޮށް އާސެނަލްއިން ކާމިޔާބުކުރީ 1-4 ގެ ނަތީޖާއަކުންނެވެ.

އަޒަރުބައިޖާންގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅެމުންދިޔައީ ޗެލްސީންނެވެ. އެގޮތުން އެޓީމަށް ވަނީ ލަނޑު ޖެހުމަށް ގިނަ ފުރުސަތުތައް ލިބި ބޭކާރުވެފައެވެ.

މި ހާފްގައި އާސެނަލްގެ ފަރާތުން ވެސް ހަމަލާތަކެއް ފެނިގެންދިޔައިރު، ލީޑު ނެގުމަށް އެޓީމަށް ވެސް ވަނީ ފުރުސަތުތަކެއް ލިބި ބޭކާރުވެފައެވެ.

ފުރަތަމަ ހާފް ދެޓީމުން ކުރެ ޓީމަކަށް ލަނޑެއް ނުޖެހި އެއްވަރުވި ނަމަވެސް، ދެވަނަ ހާފްގައި ފަސް ލަނޑު ވަނީ ފެނިގެންގޮސްފައެވެ.

އެގޮތުން ދެވަނަ ހާފް ފެށިގެން ހަތަރު ވަނަ މިނެޓުގައި ޗެލްސީން ވަނީ މެޗުގެ ލީޑު ނަގާފައެވެ. މި ލަނޑު އެމަސަންގެ އެހީތެރިކަމާއެކު ކާމިޔާބުކުރީ އޮލިވާ ޖިރޫއެވެ.

މި ލަނޑަށްފަހު ވެސް ޗެލްސީގެ ފަރާތުން ގިނަ ހަމަލާތަކެއް ފެނިގެންގޮސްފައިވާއިރު، 60 ވަނަ މިނެޓުގައި އެޓީމުން ވަނީ ލީޑު ފުޅާކޮށްފައެވެ. މި ލަނޑު އެޑެން ހަޒާޑްގެ އެހީތެރިކަމާއެކު ކާމިޔާބުކުރީ ޕެޑްރޯއެވެ.

މެޗުގެ 65 ވަނަ މިނެޓުގައި ޗެލްސީން ވަނީ ތިންވަނަ ލަނޑު ކާމިޔާބު ކޮށްފައެވެ. މި ލަނޑު އެޓީމަށް ލިބުނު ޕެނަލްޓީއަކުން ކާމިޔާބު ކޮށްދިނީ ހަޒާޑްއެވެ.

ޗެލްސީން މޮޅަށް ކުޅެމުންދަނިކޮށް، އާސެނަލްއިން ވަނީ ފަރަގުކުޑަކޮށްފައެވެ. މި ލަނޑު 71 ވަނަ މިނެޓުގައި ކާމިޔާބުކުރީ ބަދަލު ކުޅުންތެރިޔެއްގެ ގޮތުގައި ދެވަނަ ހާފްގައި ކުޅެން އެރި އެލެކްސް ލުވަބީއެވެ.

ނަމަވެސް އޭގެ މިނެޓެއް ފަހުން ޗެލްސީން ވަނީ ހަތަރުވަނަ ލަނޑު ކާމިޔާބު ކޮށްފައެވެ. މި ލަނޑު ޖިރޫގެ އެހީތެރިކަމާއެކު ކާމިޔާބުކުރީ ހަޒާޑްއެވެ.