އަލުން ހުއްދަ ދޫކުރި ހަ ރިސޯޓުގެ މައުލޫމާތު އާންމުކޮށްފި

ރިސޯޓް ހިންގުމުގެ ހުއްދަ ބާތިލު ކޮށްފައި އޮއްވާ އަލުން އޮޕަރޭޓިން ލައިސެންސް ދިން ކަމަށް ބުނި ރިސޯޓުތަކާ ބެހޭ މައުލޫމާތު ޓޫރިޒަމް މިނިސްޓްރީން އާންމުކޮށްފިއެވެ.

ޓޫރިޒަމް މިނިސްޓްރީގައި އާދިއްތަ ދުވަހު އޮތް ނޫސްވެރިންގެ ބައްދަލުވުމެއްގައި އެ ރިސޯޓުތަކާ ބެހޭ މައުލޫމާތު އާންމުކުރީ، ޓޫރިޒަމް މިނިސްޓަރު އަލީ ވަހީދެވެ. ހުއްދަ އަލުން ދޫކުރި ރިސޯޓުތަކުގެ ތެރޭގައި ހިމެނެނީ ދައުލަތަށް ދައްކަން ޖެހޭ ކުއްޔާއި ޖޫރިމަނާގެ ފައިސާ ނުދައްކައިގެން ހުއްދަ ބާތިލްކުރި ރިސޯޓުތަކެވެ. އަލުން ހުއްދަ ދޭން ނިންމީ އެއް އަހަރުގެ ތެރޭގައި ދައުލަތަށް ދައްކަން ޖެހޭ ހުރިހާ ފައިސާއެއް ދެއްކުމަށް ޝަރުތު ކޮށެވެ.

މި ހަ ރިސޯޓުން ދައުލަތަށް ދައްކަން ޖެހޭ ޖުމްލަ ފައިސާގެ އަދަދު 20.12 މިލިއަން ޑޮލަރަށް (310.18 މިލިއަން ރުފިޔާއަށް) އަރައެވެ. ކުލީގެ ފައިސާ ދެއްކުމުގެ އިތުރަށް ކަނޑައަޅާފައިވާ ރޭޝިއޯއާ އެއްގޮތަށް ދިވެހި މުވައްޒަފުން ގެންގުޅުމާއި، މުވައްޒަފުންނާ ގުޅުންހުރި ކަންކަން ހަރުދަނާ ކުރުމާއި، ރިސޯޓުގެ ސަލާމަތީ ކަންކަން އިސްލާހުކުރުމަށް ވެސް ރިސޯޓުތަކަށް ޝަރުތު ކޮށްފައިވެއެވެ.

ނޫސްވެރިންގެ ބަައްދަލުވުމުގައި މިނިސްޓަރ އަލީ ވަހީދު ވިދާޅުވީ ހުއްދަ ދޫކުރި ރިސޯޓުތަކުގެ މައުލޫމާތު އާންމުކުރީ، ހާމަކަން ބޮޑުގޮތެއްގައި ކަންކަން ކުރުމަށާއި، އެއްވެސް ނުފޫޒެއް ފޯރާފައި ނެތްކަމުގެ ޔަގީންކަން އެރުވުމުގެ ގޮތުން ކަމަށެވެ. އަލުން ހުއްދަ ދޫކުރި ރިސޯޓުތަކުގެ ތެރޭގައި މި ސަރުކާރާއި ގުޅުންހުރި ބައެއް އިސް ބޭފުޅުންގެ މަސްލަހަތު އޮތް ކުންފުނިތައް ހިމެނެއެވެ. އަލީ ވަހީދު ވިދާޅުވީ ރިސޯޓުތަކަށް ދީފައިވާ މުއްދަތު ހަމަވުމާއެކު ވަކި މީހަކަށް ބެލުމެއް ނެތި އަޅަން ޖެހޭ ފިޔަވަޅެއް އަޅާނެ ކަމަށެވެ.

ކުންފުނިތަކަށް އަލުން ހުއްދަ ދޭން ނިންމީ ގަވައިދަށް އަމަލު ކުރުން އަލުން ރުޖޫއު ކުރުމަށް ހުރިހާ ފަރާތްތަކަކަށް ވެސް ފުރުސަތެއް ދެއްވުމުގެ ގޮތުން ކަމަށް މިނިސްޓަރ ވިދާޅުވިއެވެ. ރިސޯޓުތައް ހަމައަކަށް އަޅުވަން ދެވަނަ ފުރުސަތެއް ދިނީ ގާނޫނުގެ ތެރެއިން ކަމަށް ވެސް އޭނާ ވިދާޅުވިއެވެ. މިވީހާ ދުވަހަކު ހާމަކަން ބޮޑު ގޮތެއްގައި ގަވައިދާ ޙިލާފަށް އެ ރިސޯޓުތައް ހިންގަން ދޫކޮށްލި ކަމަށް ވިދާޅުވެ އަލީ ވަހީދު ވަނީ ކުރިން ޓޫރިޒަމް މިނިސްޓްރީ ހިންގެވި ގޮތަށް ވަރަށް ބޮޑަށް ފާޑުވިދާޅުވެފައެވެ.

މި ހަ ރިސޯޓުގެ އިތުރުން ވެލިދޫ އައިލެންޑް ރިސޯޓުން ވެސް އޮޕަރޭޓިން ލައިސެންސް ހޯދަން ހުށައަޅާފައިވާ ކަމަށް އަލީ ވަހީދު ވިދާޅުވިއެވެ. ނަމަވެސް އެ ރިސޯޓަށް ހުއްދަ ދޭނީ މިނިސްޓްރީއާ އެކު އެއްބަސްވުމަކަށް އާދެވުމުން ކަމަށް އޭނާ ވިދާޅުވިއެވެ. އެ ކުންފުނީގެ ހިއްސާދާރުންގެ މެދުގައި ޖެހިފައިވާ މައްސަލައަކާ ގުޅިގެން، ރިސޯޓުގެ ހުރިހާ ހިއްސާދާރުން އެއް މޭޒަކަށް ގެންނަން ކުރި މަސައްކަތް ވަނީ ނާކާމިޔާބުވެފައެވެ. ވެލިދޫ ރިސޯޓާ ގުޅޭ މައްސަލައެއްގައި މިނިސްޓްރީން މުއާމަލާތް ކުރާނެ ފަރާތެއް ކަނޑައަޅަން އިކޮނޮމިކް މިނިސްޓްރީގައި އެދިފައިވާނެ ކަމަށް އަލީ ވަހީދު ވިދާޅުވިއެވެ.