ސަރުކާރަށް 6 މަސް: އެންމެ ބޮޑު އާމްދަނީއެއް ވައްދާ އެމްއޭސީއެލްގައި އެމްޑީއަކު ނެތް!
އެކްޓިން އެމްޑީއަކު ކަނޑައެޅީ މިދިޔަ ނޮވެމްބަރ 14 ގައި
އެމްއޭސީއެލްގެ އެކްޓިން އެމްޑީ މޫސާ ސޯލިހު (ވ)
ސަރުކާރަށް ހަމަސް ދުވަހަށް ވުރެ ގިނަ ދުވަސް ވެފައިވާއިރު ދައުލަތަށް އެންމެ ބޮޑު އާމްދަނީއެއް ވައްދާ މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް)އަށް އަދިވެސް މެނޭޖިން ޑިރެކްޓަރަކު ހަމަޖައްސާފައެއް ނުވެއެވެ.
އެމްއޭސީއެލްގެ އެކްޓިން އެމްޑީގެ މަގާމުގައި މި ވަގުތު ހުންނެވި ރައީސް އިބްރާހިމް މުހައްމަދު ސޯލިހުގެ ބޮޑުބޭބޭފުޅު މޫސާ ސޯލިހެވެ.
އެ ކަމާ ބެހޭ ގޮތުން ޕްރައިވެޓައިޒޭޝަން ބޯޑުގެ ޗެއާމަން މުހައްމަދު ނިޒާރު ވިދާޅުވީ އެކަން ހަމަނުޖެހި ވަނީ ރައީސް އޮފީހުން ނަމެއް ނުފޮނުވާތީ ކަމަށެވެ.
ރައީސް އޮފީހުގެ ޗީފް ކޮމިއުނިކޭޝަންސް ސްޓްރެޓެޖިސްޓު އިބްރާހިމް ހޫދު ވިދާޅުވީ އެކަމާ ބެހޭ ގޮތުން ރަސްމީކޮށް އެއްވެސް އެއްޗެއް އަންގަވާފައި ނުވާ ކަމަށާއި އެކަހަލަ ވާހަކައެއް ދެކެވިފައި ވެސް ނެތް ކަމަށެވެ.
އެމްއޭސީއެލް ގެ މެނޭޖިން ޑިރެކްޓަރުގެ މަގާމުގައި ހުންނެވި އާދިލް މޫސާ އިސްތިއުފާ ދެއްވާފައި ވަނީ މިދިޔަ ނޮވެމްބަރު މަހުގެ 14 ވަނަ ދުވަހުއެވެ. މިހާރު އެކްޓިން އެމްޑީއަކަށް އޭރު ހުންނެވި މޫސާ ސޯލިހު ހުންނެވީ ޑެޕިއުޓީ ޗީފް އިންފޮމޭޝަން އޮފިސަރުގެ މަގާމުގައެވެ.
ސަރުކާރުގެ ކުންފުނިތަކުގެ އެމްޑީންގެ މަގާމަކީ ރައީސް ކަނޑައަޅުއްވާ ސިޔާސީ މަގާމެކެވެ. އެ ކަމަށް އެކަށީގެންވާ ބޭފުޅެއްގެ ނަން ޕްރައިވަޓައިޒޭޝަން ބޯޑަށް ފޮނުއްވުމުން އެކަން ނިންމާނީ އެ ބޯޑުންނެވެ.
