މޭ މަހުގެ ފަހުން ވަކިން ސިނގިރޭޓް ވިއްކާ ނަމަ ފިޔަވަޅު އަޅާނަން: އެޗްޕީއޭ

މޭ މަހުގެ 31 ވަނަ ދުވަހުގެ ފަހުން ވަކިން ސިނގިރޭޓް، ބިޑި ވިއްކާ ނަމަ ފިޔަވަޅު އަޅާނެ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފި އެވެ.

މޭ މަހުގެ 31 ވަނަ ދުވަހުގެ ފަހުން ވަކިން ސިނގިރޭޓާއި ބިޑި ނުވިއްކޭ ގޮތަށް އެކުލަވާލެވުނު ގަވާއިދަށް އަމަލުކުރަން ފަށާނެ ކަން ހަނދާންކޮށްދީ، އެޗްޕީއޭ އިން ނެރުނު ބަޔާނެއްގައި ބުނީ "ދުންފަތުގެ ބާވަތްތައް ޕެކެޓްކޮށް، ލޭބަލް ޖެހުމާ ބެހޭ ގަވައިދު" ގެ މަޤްސަދަކީ ކުޑަކުދިންނާއި، އަދި ޒުވާނުން ދުންފަތުގެ އިސްތިއުމާލްކުރަން ފެށުމުން ދުރުހެލިކުރުން ކަމަށެވެ. އަދި ހުރިހާ އުމުރެއްގެ މީހުންނަށް ދުންފަތުގެ ނުރައްކަލާ ބެހޭ ގޮތުން ހޭލުންތެރިކަން އިތުރުކުރަން އަދި ދުންފަތުގެ ބާވަތްތަކުގެ އިސްތިހާރުކުރުން ކުޑަކުރުން ކަމަށް އެޗްޕީއޭ އިން ބުންޏެވެ.

އެޗްޕީއޭ އިން ބުނީ ގަވާއިދާ ހިލާފަަށް އަމަލުކުރާ ފަރާތްތަކާ މެދު ގަވައިދާ އެއްގޮތްވާ ގޮތުގެ މަތިން ފިޔަވަޅު އަޅާނެ ކަމަށެވެ.

ގަވާއިދުގައިވާ ގޮތުން، އެ ގަވައިދުގައިވާ ކަމަކާއި ހިލާފުވެއްޖެ ނަމަ އެ ކުށް ކުރުމަށް ބޭނުން ކުރި މުދަލެއްގެ އަގާއި، އޭގެ ޓެކުހާއި، އެހެނިހެން ފީތަކުގެ ޖުމްލަ އަދަދުގެ 10 ގުނަ އިން ޖޫރިމަނާ ކުރެވޭނެ އެވެ. އަދި ދެ ވަނަ ފަހަރަށް ގަވާއިދާ ހިލާފުވެއްޖެ ނަމަ، އިތުރަށް 5000ރ.، ތިން ވަނަ ފަހަރަށް، 10،000ރ. އަދި ހަތަރު ވަނަ ފަހަރަށް 20،000ރ. އިން ޖޫރިމަނާ ކުރެވޭނެ ކަމަށް ގަވާއިދުގައި ބުނެފައި ވެއެވެ.

ގަވާއިދުގައި ވަނީ ޖޫރިމަނާގެ އިތުރުން ދުންފަތް މުއާމަލާތް ކުރުމަށް ދޫކޮށްފައިވާ ހުއްދަ ވަގުތީ ގޮތުން ހިފެހެއްޓުމާއި ހުއްދަ ބާތިލް ކުރުމާއި ހުއްދައިގައި ހިމެނޭ ވަކިވަކި ކަންކަން ހިފެހެއްޓުމަށް ހުރަހެއް ނެތް ކަމަށެވެ.

ގަވާއިދުގައި ބުނެފައިވާ ގޮތުން ކުރިޔަށް އޮތް ޖުލައި މަހުގެ 31 ވަނަ ދުވަހުން ފެށިގެން ދުންފަތުގެ ހުރިހާ ބާވަތްތަކެއް ޕެކެޓްކޮށް ލޭބަލްކުރުމުގައި އެޗްޕީއޭއިންއާއްމު ކޮށްފައިވާސިއްހަތުގެ އިންޒާރުތަކާ މަންޒަރުތައް ހިމަނަންޖެހެއެވެ.