ފިނިފެންމާ ލޯންޗްކޮޅުގެ މައްސަލައިގައި އަދީބަށް ކުރި 15 އަހަރުގެ ހުކުމް ބާތިލްކޮށް، ޝަރީއަތް އަލުން ހިންގަން އަމުރު ކޮށްފި
އެމައްސަލައިގައި ހުކުމް ކޮށްފައިވަނީ 2016 ވަނަ އަހަރު
ކުރީގެ ނައިބު ރައީސް އަހުމަދު އަދީބު.
ފިނިފެންމާ ލޯންޗްކޮޅުގައި އެއްޗެއް ގޮއްވާލި މައްސަލައިގައި، ކުރީގެ ނައިބު ރައީސް އަހުމަދު އަދީބަށް ކުރި 15 އަހަރުގެ ޖަލު ހުކުމް ހައިކޯޓުން ބާތިލްކޮށް، އެ މައްސަލައިގެ ޝަރީއަތް ދަށު ކޯޓުން އަލުން ހިންގުމަށް ހައިކޯޓުން ނިންމައިފި އެވެ.
ރައީސް އަބްދުﷲ ޔާމީންގެ ދެކަނބަލުން ފިނިފެންމާ ލޯންޗްކޮޅުގައި 2015 ވަނަ އަހަރުގެ ސެޕްޓެމްބަރު 28 ވަނަ ދުވަހު ވެލާނާ އިންޓަނޭޝަނަލް އެއާޕޯޓުން މާލެއަށް ވަޑައިގެން، އެއް ނަންބަރު ފާލަމާ ގާތްކުރި ވަގުތު ލޯންޗްކޮޅުގައި އެއްޗެއް ގޮއްވާލި މައްސަލައިގައި އަދީބުގެ މައްޗަށް ކުރި ދައުވާ ސާބިތުވެ، 15 އަހަރަށް ޖަލަށްލުމަށް ކްރިމިނަލް ކޯޓުން ހުކުމް އިއްވީ 2016 ވަނަ އަހަރުގެ ޖޫން މަހުގެ 9 ވަނަ ދުވަހުއެވެ.
ހައިކޯޓުގެ އަމުރުގައި ވަނީ އަދީބަށް ކުރި 15 އަހަރުގެ ޖަލު ހުކުމް ބާތިލް ކުރުމަށް ފަހު އަލުން މައްސަލަ ބެލުމަށެވެ. އެ މައްސަލައިގެ ޝަރީއަތަށް އަދީބު 15 ދުވަސް ޖަލުގައި ބެހެއްޓުމަށާއި ޕްރޮސެކިއުޓަރ ޖެނެރަލްގެ ފަރާތުން ވަކި ގޮތެއް ހުށައެޅުމަށް ފަހު ކްރިމިނަލް ކޯޓަށް އެކަން އެންގުމަށް ވެސް ވަނީ އަންގާފައެވެ. އަދި ޕީޖީއިން ކަނޑައަޅާ ގޮތެއް 15 ދުވަސް ތެރޭގައި ކްރިމިނަލް ކޯޓަށް ހުށައެޅުމަށް ވެސް ވަނީ އަންގާފައެވެ.
އަދީބުގެ ހުކުމް ބާތިލްކުރުމަށް ތިން ފަނޑިޔާރުން އިއްތިފާގުވެވަޑައިގެންނެވި ނަމަވެސް، އެ މައްސަލައިގެ ޝަރީއަތް އަދީބުގެ މައްޗަށް ކްރިމިނަލް ކޯޓްގައި އަލުން ހިންގާއިރު އެ މަނިކުފާނު ބަންދުގައި ބެހެއްޓުމާމެދު ފަނޑިޔާރުންގެ ރައުޔު ތަފާތެވެ. އެގޮތުން ރައުޔު ތަފާތުވީ ފަނޑިޔާރުންގެ ތެރެއިން ބެންޗުގެ ރިޔާސަތުގައި އިންނެވި މުހައްމަދު ނިޔާޒުގެ ރައުޔެވެ. ފަނޑިޔާރު ނިޔާޒުގެ ރައުޔަކީ އެ މައްސަލާގެ ޝަރީއަތް ނިމެންދެން ވެސް އަދީބު ހުންނަން ޖެހޭނީ ރިމާންޑް ޖަލެއްގައި ކަމެވެ. އެހެން ނަމަވެސް އަނެއް ދެ ފަނޑިޔާރުން ކަމަށްވާ އިސް ފަނޑިޔާރު ސުޖާއު އުސްމާނާއި ފަނޑިޔާރު ހުސެއިން ޝަހީދު ގެ ރައުޔަކީ 15 ދުވަހު އަދީބު ބަންދުގައި ބަހައްޓަން އަމުރުކުރި ރައުޔެވެ.
އަދީބުގެ މައްޗަށް އުފުލިފައިވާ ޓެރިޒަމްގެދަޢުވާ އާ ގުޅިގެން ހިންގާފައިވާ ޝަރީޢަތަކީ ދަޢުވާ އުފުލާ ފަރާތަށާއި ފަނޑިޔާރުގެއަށް ނުފޫޒު ފޯރުވައިގެން ހިންގާފައިވާ ޝަރީޢަތެއް ކަމަށް ވުމުގެ ފުރުސަތު އޮތުމުން ޤާނޫނީ ހަމަތަކުގެ މަތިން މިދަޢުވާ އަލުން ބަލައި ޝަރީޢަތުގެ ފަރާތުން ގޮތެއް ކަނޑައެޅުމުގެ ކުރިން އަދީބު ބަންދާމެދު ކްރިމިނަލް ކޯޓުގައި މައްސަލަ ބައްލަވާ ފަނޑިޔާރު ގޮތެއް ކަނޑައަޅަންޖެހޭ ކަމެވެ.
މިދިޔަ އަހަރުގެ ފެބްރުއަރީ 1 ގެ ހުކުމުގައި އަދީބު މިނިވަން ކުރުމަށް ވެސް ސުޕްރީމް ކޯޓުން އަމުރު ކޮށްފައިވާ ކަމަށާއި ފަހުން ސުޕްރީމް ކޯޓުން އެ އަމުރުގެ ބައެއް ބައިތައް ބާތިލް ކުރި ނަމަވެސް، ސުޕްރީމް ކޯޓްގެ ހުކުމުގައި ގާނޫނާ ޚިލާފަށް ކޮށްފައިވާ ހުކުމްތަކުގެ ވާހަކަ ބަޔާން ކޮށްފައިވާ ކަމަށާއި، އެހެންވެ، އަދީބުގެ މައްޗަށް ވެސް ޝަރީއަތް ހިންގީ ނުފޫޒު ފޯރުވައިގެން ކަމަށް ބެލުމުގެ ފުރުސަތު އޮތް ކަމަށް ހައި ކޯޓުގެ ހުކުމުގައިވެ އެވެ.
މި ހުކުމާއެކު އަދީބުގެ މައްޗަށް ކޮށްފައިވާ 33 އަހަރުގެ ޖަލު ހުކުމުގެ ތެރެއިން ދެން އެމަނިކުފާނު ތަންފީޒު ކުރައްވަން ޖެހޭނީ 18 އަހަރުގެ ހުކުމެކެވެ. އެއީ ފިސްތޯލައެއް ގެންގުޅުނު މައްސަލާގައި އިއްވާފައިވާ 10 އަހަރުގެ ޖަލު ހުކުމަކާއި ޚިޔާނާތުގެ ކުށެއް ސާބިތުވެ، އިއްވާފައިވާ އަށް އަހަރުގެ ޖަލު ހުކުމެކެވެ.
ފިސްތޯލަ ގެންގުޅުނު މައްސަލައިގެ އިސްތިއުނާފު މައްސަލަ ސުޕްރީމް ކޯޓުގައި ބާއްވާފައިވާއިރު ދައުލަތުގެ ފަރާތުން ވަނީ އެ މައްސަލަ އަދީބުގެ މައްޗަށް ސާބިތު ނުވާ ކަމަށާއި އެހުކުމް ބާތިލް ކޮށްދޭން ކޯޓުގައި އެދޭކަމަށް ބުނެފައެވެ. ސުޕްރީމްކޯޓުން އަދީބުގެ މައްޗަށް އެހުކުމް ސާބިތު ނުވާ ކަމަށް ނިންމައިފިނަމަ ދެން އެމަނިކުފާނު ތަންފީޒު ކުރަންޖެހޭނީ މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) މެދުވެރިކޮށް ދައުލަތަށް ލިބެންޖެހޭ ފަސް މިލިއަން ޑޮލަރަށް ޚިޔާނާތްތެރިވި މައްސަލައިގައި އިއްވި އަށް އަހަރުގެ ހުކުމް އެކަންޏެވެ.
އެ ހުކުމަކީ ޅ. މާބިންހުރާ ކުއްޔަށް ދޫކުރުމުން އިކުއިޒިޝަން ފީގެ ގޮތުގައި ލިބުނު ފަސް މިލިއަން ޑޮލަރުގެ ޗެކާ ހަވާލުވެވަޑައިގަތުމަށް ފަހު ފަހު އެއަށް ޚިޔާނާތްތެރިވި މައްސަލައިގައި ކުރި ހުކުމެވެ.
ފިނިފެންމާ ލޯންޗްކޮޅުގައި އެއްޗެއް ގޮއްވާލި މައްސަލައިގައި އަދީބުގެ އޭރުގެ ދެ ބޮޑީގާޑުން ކަމަށްވާ ހަސަން ރިކާޒާއި އަހުމަދު އާމިރު 10 އަހަރަށް ޖަލަށް ލުމަށް ހުކުމްކުރި އެވެ. އެ ދެ ބޮޑީގާޑުންނަށް ހުކުމްކުރީ އައިއީޑީ ލޯންޗްކޮޅުގައި ހަރުކުރަން އުޅުނު ކަން ސާބިތުވެގެންނެވެ. ނަމަވެސް، ހައިކޯޓުން ހޯމަ ދުވަހު ވަނީ ދެ ބޮޑީގާޑުންގެ ހުކުމް ވެސް ބާތިލްކޮށް ޝަރީއަތް އަލުން ހިންގަން އަންގައިފަ އެވެ.
