ފުލުހުން ޒިންމާދާރު ކުރުވުމަށް، އާންމުންނަށް ފެންނާނެ ގޮތަށް ފުލުހުންގެ ޔުނީފޯމުގައި ސާވިސް ނަމްބަރު ޖަހަން ފަށައިފިއެވެ.
ފުލުހުންގެ ޔުނީފޯމުގައި ސާވިސް ނަމްބަރު ޖަހަން ފެށިކަން އިއުލާން ކުރެއްވީ ކޮމިޝަނާ އޮފް ޕޮލިސް މުހައްމަދު ހަމީދު ކުރެއްވި ޓްވީޓެއްގައެވެ. ފުލުހުންގެ ޔުނީފޯމުގައި ސާވިސް ނަމްބަރާއި އާންމު ނަން ފެންނާނެ ގޮތަށް ފުލުހަކު ޔުނީފޯމު ލައިގެން ހުންނަ ފޮޓޯއެއް ހަމީދު ކުރެއްވި ޓްވީޓުގައި ވަނީ އާންމު ކުރައްވާފައެވެ.
އެ ފޮޓޯ ޓްވީޓު ކުރައްވަމުން ހަމީދު ވިދާޅުވެފައި ވަނީ އެއީ ފުލުހުން ޒިންމާދާރު ކުރަން ކުރަމުން އަންނަ މަސައްކަތްތަކުގެ ތެރެއިން އެޅި، ކުޑަ ނަމަވެސް މުހިއްމު ފިޔަވަޅެއް ކަމަށެވެ. ވަޒީފާއަށް ނުކުމެ، ފުލުހުންގެ ހިދުމަތުގައި އުޅޭ މީހުންނަކީ ކާކު ކަން ރައްޔިތުންނަށް އެނގުމަކީ ފުލުހުންގެ މަސައްކަތް ޒިންމާދާރު ކަމާއެކު އަދާކުރަން ވަރަށް މުހިއްމު ކަމެއް ކަމަށް ހަމީދު ވިދާޅުވެފައިވެއެވެ.
އެއްވުންތަކާއި މުޒާހަރާތައް ކޮންޓްރޯލު ކުރަން ނުކުންނަ ފުލުހުންގެ ނަން ޔުނީފޯމުގައި ނުހުންނަ މައްސަލައަކީ އާންމު ކަމެކެވެ. އެފަދަ ފުލުހުން ހާލަތާ ނުބައްދަލު ބާރު ބޭނުންކޮށް، މީހުންނަށް އަނިޔާކުރިޔަސް، އެ ފުލުހަކީ ކާކުކަން ދެނެގަތުމަށް ދަތިވެފައި ވަނީ އެ ފުލުހުންގެ ނަން ނުވަތަ ސާވިސް ނަމްބަރު ޔުނީފޯމުގައި ނުހުންނަ މައްސަލައެވެ.
