މޯލްޑިވްސް ހައްޖު ކޯޕަރޭޝަންގެ ހަވާލުގައި މިދިޔަ އަހަރު ހައްޖަަށް ދިޔަ މީހުންގެ ތެރެއިން ދެބައިކުޅަ އެއްބައި މީހުންނަކީ، ސިޔާސީ ފަރާތްތަކުން ފޮނުވި ލިސްޓަކަށް ހައްޖަށް ދިޔަ މީހުން ކަމަށް އެ ކޯޕަރޭޝަނުން ބުނެފިއެވެ.
ހައްޖު ކޯޕަރޭޝަންގެ ޗެއާޕާސަން ޑރ. މުހައްމަދު ކިނާނަތު ރާއްޖެއެމްވީއަށް ވިދާޅުވީ އެކޯޕަރޭޝަނަށް ލިބުނު ކޯޓާގެ ތެރެއިން 960 މީހުން މިދިޔަ އަހަރު ހައްޖަށް ގޮސްފައިވާ ކަމަށެވެ. އަދި އޭގެ ތެރޭގައި ސިޔާސީ ފަރާތްތަކަށް ދިން ކޯޓާގައި ދިޔަ މީހުން ހިމެނޭ ކަމަށް އޭނާ ވިދާޅުވިއެވެ. އެހެން ނަމަވެސް އޭގެ ތަފްސީލެއް ނުދެއްވިއެވެ.
ހައްޖު ކޯޕަރޭޝަންގެ އުސޫލު ބުނާގޮތުން ހައްޖަށް އެ ކޯޕަރޭޝަނުން ގެންދާ މީހުންގެ ލިސްޓް ފޮނުވާނީ އިސްލާމިކް މިނިސްޓްރީންނެވެ. އަދި އެ އުސޫލުގައި އެމިނިސްޓްރީން ކަނޑައަޅާ އަދަދަކަށް އެ ކޯޕަރޭޝަނުން ކޯޓާ ރިޒާވް ކުރަން ޖެހެއެވެ.
އިސްލާމިކް މިނިސްޓަރ ޒިޔާދު ބާގިރު ސޮއި ކުރައްވައި ފޮނުވި ސިޓީގައި ވަކި ބަޔަކު ހައްޖަށް ގެންދިއުމަށް އެދި ހައްޖު ކޯޕަރޭޝަނަށް ހުށަހަޅާފައިިވާކަން ހާމަވާ ކަމަށް ކިނާނަތު ވިދާޅުވިއެވެ. އަދި ކޯޓާތައް ނަހަމަ ގޮތުގައި ބޭނުންކޮށްފައިވާކަން އެނގޭ ކަމަށް އޭނާ ވިދާޅުވިއެވެ.
އެނގިފައިވާ ގޮތުގައި މިދިޔަ އަހަރު އެކޯޕަރޭޝަނުން ހައްޖަށް ފޮނުވާފައިވާ މީހުންގެ ތެރޭގައި ހިމެނެނީ ޕީޕީއެމަށް ނިސްބަސްތާ ފަރާތްތަކެވެ. އަދި އިސްލާމިކް މިނިސްޓްރީން ފޮނުވި ލިސްޓުގައި މަޖިލިސް މެމްބަރުންނާއި، މިނިވަން މުއައްސަސާތަކަށް ނިސްބަތްވާ ފަރާތްތައް ހިމެނޭކަން ވަނީ އެނގިފައެވެ.
އެންޓި ކަރަޕްޝަން ކަމިޝަން (އޭސީސީ) އިން ނެރުނު ހައްޖުގެ އިންތިޒާމްތަކާ ބެހޭ ގޮތުން 2017 ވަނަ އަހަރުގައި ފެށި ދިރާސާ ރިޕޯޓުގައިވާ ގޮތުން އިސްލާމިކް މިނިސްޓްރީން ރިޒާވްކޮށް ހައްޖަށް ގެންދާނީ ކޮން ފަރާތްތަކެއްކަމާއި އިސްލާމިކް މިނިސްޓްރީން ކަނޑައަޅާ ބަޔަކަށް ހައްޖަށް ގެންދިއުމަކީ ކޮރަޕްޝަނަށް މަގުފަހި ކުރުވާކަމެއް ކަމަށް ވަނީ ބުނެފައެވެ. އިސްލާމިކް މިނިސްޓްރީން އެގޮތަށް ކަނޑައެޅުމުން ހައްޖު ކޯޕަރޭޝަން މެދުވެރިކޮށް ހައްޖަށް ދާން ބޭނުންވާ ފަރާތްތަކަށް އެ ފުރުސަތު ހަނިވެގެންދާކަމަށް އެ ރިޕޯޓުގައި ވަނީ ބުނެފައެވެ.
މިހާރު ވެސް ހައްޖަށް މީހުން ފޮނުވުމުގެ އުސޫލު އޮތް ގޮތުން ހައްޖު ކޯޕަރޭޝަން މެދުވެރިކޮށް އިސްލާމިކް މިނިސްޓްރީން ކަނޑައަޅަ ލިސްޓް ފޮނުވާ ބަޔަކަށް ހައްޖަށް ފޮނުވޭ ގޮތަށެވެ.
އިސްލާމިކް މިނިސްޓްރީން އެޕްރީލް މަހުގެ 15 ވަނަ ދުވަހު އާންމުކުރި އުސޫލުގައި ވެސް ބުނެފައި ވަނީ ކޮންމެ އަހަރަކު ވެސް އެ މިނިސްޓްރީން ހައްޖަށް މީހުން ފޮނުވާ ފަރާތްތަކަށް ބޭނުންވާ އަދަދަށް ޖާގަ ރިޒާވްކުރުމަށް ހައްޖު ކޯޕަރޭޝަނަށް އަންގަންވާނެކަމަށާއި އެއަދަދަށް އެ ކޯޕަރޭޝަނުން މިނިސްޓްރީއަށް އެއަދަދަށް ޖާގަ ރިޒާވް ކުރަންޖެހޭނެ ކަމަށެވެ.
