'ސްޕީޑް' ފިލްމްގެ ކޯ-ސްޓާ، ސޭންޑްރާ ބުލޮކް ދެކެ ލައިކްވިކަމަށް ކިއާނޫ ރީވްސް ބުނެފި

ފިލްމީތަރި ސޭންޑްރާ ބުލޮކް ދެކެ ލައިކްވިކަމަށް'ސްޕީޑް' ފިލްމްގައި އޭނާއާއެކު ފެނިގެންދާ ކިއާނޫ ރީވްސް ބުނެފިއެވެ.

ކިއާނޫ މިހެން ބުނެފައިވަނީ'ދަ އެލެން ޑިޖެނެރެސް ޝޯވ' އަށް ދިން އިންޓަވިއުއެއްގައެވެ.

2018 ވަނަ އަހަރުގެ ޑިސެމްބަރު މަހު ސޭންޑްރާ ވެސް އެ ޝޯވއަށް އިންޓަވިއުއެއް ދީފައިވާއިރު، 'ސްޕީޑް' ފިލްމް ކުޅުނުއިރު ކިއާނޫއަކީ އޭނާގެ ކްރަޝްއެއްކަމަށް އޭނާ ބުންޏެވެ. އެހެންވެގެން މި އެކްޝަން ތްރިލަރ ފިލްމް ކުޅުނު އިރު ސީރިއަސްވާން އުނދަގޫވިކަމަށާއި ނަމަވެސް ކިއާނޫ އޭނާ ދެކެ ލައިކް ނުވީކަމަށް ވެސް ސޭންޑްރާ ބުނެފައިވެއެވެ.

ނަމަވެސް، ނިމިގެންދިޔަ ހަފްތާގައި އެލެން ޝޯވއަށް ދިން ފުރަތަމަ އިންޓަވިއުގައި ކިއާނޫ ބުނީ އޭނާއަށް ވެސް ސޭންޑްރާ ކަމުދިޔަކަމަށެވެ.

ސޭންޑްރާއާ އެފަދަ ވާހަކައެއް ނުދެއްކީ، ދެ މީހުންވެސް އުޅުނީ މަސައްކަތުގައި ކަމަށް ވުމުންކަމަށް އޭނާ ބުންޏެވެ. އެހެންނަމަވެސް، ސެންޑްރާގެ ސަބަބުން ކޮންމެ ދުވަހަކު މަސައްކަތަށް ދާ ހިތްވިކަމަށްވެސް އޭނާ ފާހަގަ ކުރިއެވެ.

ކިއާނޫ އާއި ސޭންޑްރާ އެއްވެސް އިރަކު ރަށްޓެހިވެފައެއް ނުވެއެވެ.

'ސްޕީޑް' ރިލީޒްކޮށްފައިވަނީ 1994 ވަނަ އަހަރެވެ. އޭރު ދެ މީހުންގެ އުމުރުން 29 އަހަރެވެ. 30 މިލިއަން ޑޮލަރުގެ ބަޖެޓަކަށް ތައްޔާރު ކޮށްފައިވާ މި ފިލްމަށް 350.4 މިލިއަން ޑޮލަރުގެ އާމްދަނީއެއް ވަނީ ލިބިފައެވެ. އަދި 1994 ވަނަ އަހަރުގެ އެކަޑަމީ އެވޯޑްސްގައި 'ސްޕީޑް'އަށް ބެސްޓް ސައުންޑް އެޑިޓިންގ އަދި ބެސްޓް ސައުންޑް މިކްސިންގ އެވޯޑް ވަނީ ލިބިފައެވެ.