މަޖިލީހުގެ އާ އިމާރާތުގެ މަސައްކަތް ނިންމައި މަޖިލީހާއި ހަވާލު ކޮށްފިއެވެ.

އާ އިމާރާތުގެ މަސައްކަތް ނިންމުމަށް ފަހު، މަޖިލީހާއި ހަވާލުކޮށްފައިވަނީ އެޕްރީލް މަހުގެ 10 ވަނަ ދުވަހެވެ.

މަޖިލީހުގެ އާ އިމާރާތް ހުޅުވަނީ ކޮން ދުވަހަކުންތޯ ސުވާލުކުރުމުން މަޖިލީހުގެ މީޑިއާ އެންޑް ކޮމިއުނިކޭޝަންސް ޑިރެކްޓަރު ހަސަން ޒިޔާއު " ރާއްޖެ އެމްވީ" އަށް ވިދާޅުވީ މަޖިލީހުގެ ހުޅުވާނެ ތާރީޚަކާއި  ބެހޭ ގޮތުން އަދި ވަކި ގޮތެއް ނުނިންމާ ކަމަށެވެ.

މަޖިލީހުގެ އިމާރާތައް ބޭނުންވާ ފަރުނީޗަރު ހޯދުމުގެ މަސައްކަތް ފިނޭންސް މިނިސްޓްރީގެ ޓެންޑަރ ބޯޑުން ކުރަމުންދާ ކަމަށް ޒިޔާއު ވިދާޅުވިއެވެ.

ރައްޔިތުންގެ މަޖިލީހުގެ 13 ބުރީގެ އިމާރާތުގެ މަސައްކަތް 111 މިލިއަން ރުފިޔާ އަށް ރަޝީދު ކާޕެންޓްރީ އެންޑް ކޮންޓްރެކްޓާސްއާ ހަވާލުކޮށްފައި ވަނީ، 2011 ވަނަ އަހަރުގެ ސެޕްޓެމްބަރ މަހުގެ 14 ވަނަ ދުވަހު އެވެ.

 އިމާރާތުގެ ބިންގާ 2007 ގެ ފަހުކޮޅުގައި އެޅި ނަމަވެސް އެކި ސަބަބުތަކާއި ހެދި މަޖިލީހުގެ މަސައްކަތް ފެށުން އޮތީ ލަސްވެގެން ގޮސްފައެވެ.

މިހާރު ބޭނުން ކުރަމުންދާ ރައްޔިތުންގެ މަޖިލީހުގެ އިމާރާތަކީ ޕާކިސްތާން ސަރުކާރުގެ އެހީގައި އަޅާފައިވާ އިމާރާތެކެވެ.