ފޭދޫ އަންހެން މީހާއަށް އަނިޔާ ކުރި މީހުން އިންސާފުގެ ކުރިމައްޗަށް ގެންނާނަން: ޝިދާތާ
15 މެއި 2019 | ބުދަ 18:40އޭނާއަށް ވަނީ ދައުލަތުން ރައްކާތެރިކަން ދީފައި
މޫނުގައި ގޯންޏެއް އޮޅައި، ހޮޅިދަނޑިއެއްގައި ބަނދެފައި
ށ. ފޭދޫގައި ހާއްސަ އެހީއަށް ބޭނުންވާ އަންހެނެއްގެ ބޮލުގައި ގޯންޏެއް އަޅައި، ބަނދެ، އޭނާއަށް އަނިޔާކުރި މީހުން އިންސާފުގެ ކުރިމއްޗަށް ގެނައުމަށް ކުރެވެން ހުރި ހުރިހާ މަސައްކަތެއް ކުރައްވާނެ ކަމަށް ޖެންޑާ މިނިސްޓަރު ޝިދާތާ ޝަރީފު ވިދާޅުވެއްޖެއެވެ.
ސިކުނޑީގެ އުނިކަން ހުންނަ އަންހެނަކު ފޭދޫ މަގުބައްތިއެއްގެ ހޮޅިދަނޑިއެއްގައި ބަނދެފައި ހުއްޓާ ފެނުނީ މިދިޔަ ހޯމަ ދުވަހުގެ ރޭ ދަންވަރުގެ ވަގުތެއްގައެވެ. އޭނާގެ ބޮލުގައި ގޯންޏެއް އޮޅައި، ބަނދެފައި ހުރި ފޮޓޯތަކެއް ސޯޝަލް މީޑިއާގައި ދަނީ ދައުރުވަމުންނެވެ.
ރާއްޖެއެމްވީއަށް އެނގިފައިވާ ގޮތުގައި އަނިޔާ ލިބުނު، ނުކުޅެދުންތެރިކަން ހުންނަ މީހާއަކީ މީހަކާ ވެސް އިނދެގެން އުޅޭ ފަސް ދަރިންގެ މަންމައެވެ. އޭނާއަށް އެ އަނިޔާ ކުރީ ކޮން ބައެއް ކަމެއް މިހާތަނަށް އެނގިފައެއް ނުވެއެވެ. އަދި އެކަން ކުރީ ކޮން ސަބަބަކާ ގުޅިގެން ކަމެއް ވެސް އަދި ނޭނގެއެވެ.
އޭނާގެ އާއިލާ މީހުން ވެސް ފޭދޫގައި ދިރިއުޅެއެވެ. ނަމަވެސް އެ މައްސަލައާ ގުޅިގެން ޖެންޑާ މިނިސްޓްރީގެ ޓީމެއް ފޭދޫގައި ދަނީ ހަރަކާތްތެރިވަމުންނެވެ.
މިނިސްޓަރު ޝިދާތާ ކުރެއްވި ޓްވީޓެއްގައި ވިދާޅުވީ ފޭދޫގައި އަންހެނަކަށް ރަހުމްކުޑަ އަނިޔާތަކެއް ދިން މައްސަލައިގެ ރިޕޯޓް ލިބުމާ އެކު އޭނާއަށް ބޭނުންވާ ރައްކާތެރިކަން ދައުލަތުން ވަނީ ފޯރުކޮށްދީފައިވާ ކަމަށެވެ. އެ އަނިޔާވެރި އަމަލު ހިންގި ފަރާތްތައް ހޯދައި އިންސާފުގެ ކުރިމައްޗަށް ގެނައުމަށް ކުރެވެން ހުރިހުރިހާ މަސައްކަތެއް ކުރާނަނެ ކަމަށް ޝިދާތާ ވިދާޅުވެފައިވެއެވެ.
