ވެލިދޫގެ ކުނީގެ މައްސަލައަށް އަވަސް ހައްލެއް ބޭނުންވާ ކަމަށް އެރަށު ކައުންސިލުގެ ރައީސް އަސްމާ ހުސައިން ވިދާޅުވެއްޖެ އެވެ.

ރާއްޖެޓީވީއަށް މައުލޫމާތު ދެއްވަމުން އަސްމާ ވިދާޅުވީ ކުރީގައި ވެލިދުއަކީ ރައްކާތެރި ގޮތުގައި ކުނި މެނޭޖު ކުރަމުން އައި ރަށެއް ކަމަށާއި ނަމަވެސް ރައްކާތެރި ގޮތުގައި ކުނި ނައްތާ ނުލެވޭތާ މިހާރު އަހަރެއްވާން ކައިރިވެފައި ވާކަމަށެވެ.

އަސްމާ ވިދާޅުވީ ކުނި ނައްތާ ނުލެވުމުގެ ސަބަބުން އެކަމުގެ އުނދަގޫ ނިހާޔަތަށް ރައްޔިތުންނަށް ފޯރަމުން ދާކަމަށެވެ. އޭގެ އިތުރުން ކުނި ގޮނޑު ސާފް ނުވެ ގިނަ ދުވަސްވަންދެން އޮތުމުގެ ސަބަބުން ސިއްހީ ގޮތުން ވެސް ތަފާތު އެކި ބަލިތައް ފެތުރުމުގެ ފުރުސަތު ބޮޑުވެފައިވާއިރު އިގްތިސާދީ ގޮތުން ވެސް ރަށަށް ގިނަ ގެއްލުންތަކެއް ލިބެމުންދާކަން އަސްމާ ވަނީ ފާހަގަ ކުރައްވާފަ އެވެ.

ވަކިވަރަކަށް ކުނި ގޮޑުގައި ކުނިތައް ގިނަވުމުން ކޮންމެވެސް މީހަކު ކުނި ގޮނޑުގައި ރޯކޮށްލާ ކަމަށާއި ނަމަވެސް މިގޮތަށް ކުނި ގޮނޑުގައި ރޯ ކުރުމަކީ ވެސް މަނާ ކަމެއް ކަމަށް ވިދާޅުވެފައި ވާއިރު މީ ރައްކާތެރި ގޮތުގައި ކުނި ނައްތާލުން ކަމުގައި ނުބެލެވޭކަމަށް ވެސް  އޭނާ ވިދާޅުވިއެވެ.

ކުނީގެ މައްސަލަ ހައްލު ކުރުމަށް ވެލިދޫ ކައުންސިލުން ކުރައްވަމުން ގެންދަވާ މައްސައްކަތް ތަކަށް އަލިއަޅުވާ ލައްވާ އަސްމާ ވިދާޅުވީ ކުނީގެ މައްސަލައިގެ ވާހަކަ ވެމްކޯގެ އިތުރުން ރައީސް އިބްރާހިމް މުހައްމަދު ސޯލިހަށް ވެސް ދަންނާވަފައި ވާނެ ކަމަށާއި ކުނީގެ މައްސަލަ ހައްލު ކޮށްދެއްވުމަށް މަސައްކަތްޕުޅު ކޮށްދެއްވާނެ ކަމަށް އެމަނިކުފާނު ވިދާޅުވެފައިވާ ކަމަށެވެ.

ވެލިދޫގައި މިހާރު ކުނި އަޅަމުންދާ ސަރަހައްދު ސާފްކުރުމަށްފަހު އާ ކުނި ކޮށީގެ ބޭނުން ހިފުމުގެ ވިސްނުން ކައުންސިލުން ގެންގުޅޭކަމަށް އަސްމާ ވިދާޅުވިއެވެ.

ވެލިދޫގައި ކުނި މެނޭޖް ކުރަމުން ގެންދިޔައީ ވެމްކޯއިންނެވެ. ވެމްކޯއިން  ނ.ރ.ބ.ޅ. އަތޮޅުގެ ކުނި ގެންދަނީ ރ. އަތޮޅު ވަންދުއަށެވެ. މިހާރު ވަންދުއަށް ކުނި ނުގެންދާތާ 11 މަސް ވެއްޖެއެވެ.