މަންމައިންގެ ދުވަހު ކިޑީ މަންމައަކަށް!

މަޝްހޫރު ލަވަކިޔުންތެރިޔާ މަރިޔަމް އުނޫޝާ (ކިޑީ) އަށް މަންމައިންގެ ދުވަހު ދަރިއަކު ލިބިއްޖެއެވެ.

ކިޑީގެ ފިރިމީހާ މަޝްހޫރު ޓީވީ ޕްރެޒެންޓަރ އިބްރާހިމް ހަމީޝް ބުނެފައިވަނީ އެދެމަފިންނަށް މިދިޔަ އާދިއްތަ ދުވަހު ފިރިހެން ދަރިއަކު ލިބިފައިވާ ކަމަށެވެ.

ހަމީޝް ބުނެފައިވަނީ އަމިއްލަ ދަރިފުޅު އުރާލައިގެން ހުންނަ އިރު އަދިވެސް ހީވަނީ ހުވަފެނެއްގައި އުޅެވޭހެން ކަމަށެވެ. އަދި މިހާ ބޮޑު އުފަލެއް ލިބުމުން ކުރެވޭ އިހުސާސް ބުނެދޭން ވެސް ނޭންގެ ކަމަށް ހަމީޝް ވަނީ ބުނެފައެވެ.

ކިޑީ ވިހާފައިވަނީ އޭޑީކޭ ހޮސްޕިޓަލްގައެވެ.

ކިޑީ އާއި ހަމީޝްގެ އަލަތު ކައިވެންޏަށް 10 އަހަރު ފުރިފައިވާއިރު، ކިޑީ މަންމަ އަކަށް ވެފައި މިވަނީ އުމުރުން 33 އަހަރުގައެވެ.

ގިނަ ބައެއްގެ ލޯބި ލިބި، ކިޑީ މަގުބޫލުވެގެން ގޮސްފައި ވަނީ ސްކޫލް ދައުރުގައި އޭނާ ލަޔަކިޔަން ފަށައި، އެ ދާއިރާއިން ގިނަ ކާމިޔާބީތަކެއް ހޯދަން ފެށުމާ ގުޅިގެންނެވެ. ކިޑީއަކީ ރާއްޖޭގައި ފުރަތަމަ ފަހަރަށް ހިންދީ ފިލްމަކަށް ލަވަކިޔައިދިން ފުރަތަމަ ދިވެހި ލަވަކިޔުންތެރިޔާއެވެ. އަމިއްލަ ރާގުތަކަށް ލަވަކިޔައި، އިންޓަނޭޝަނަލް ޕްލެޓްފޯމުތަކުގައި ރާއްޖެ ތަމްސީލު ކުރަމުންދާ ކިޑީއަކީ ކުރިއަރަމުން އަންނަ ގިނަ ޒުވާން ލަވަކިޔުންތެރިންގެ އެދުރެކެވެ.

ކިޑީ ވަނީ މޯލްޑިވިއަން އައިޑޮލްގައި ޖެހިޖެހިން ތިން ފަހަރަށް ވެސް ފަނޑިޔާރުކަން ކޮށްފައެވެ.