އަޔަކްސްގެ ޑިފެންޑަރ ހޯދަން ބާސާއިން 60 މިލިއަން ޕައުންޑް ހުށަހަޅައިފި

އަޔަކްސްއަށް ކުޅެމުން އަންނަ ނެދަލޭންޑްސްގެ ޑިފެންޑަރ މަތައިސް ޑެލެއިޓް ހޯދަން ބާސެލޯނާއިން 60 މިލިއަން ޕައުންޑު ހުށަހަޅައިފި ކަމަށް ރިޕޯޓްތައް ބުނެފިއެވެ.

ރިޕޯޓްތައް ބުނާގޮތުން ކުރިޔަށް އޮތް ސީޒަނަށް ބާސާއިން އަންނަނީ އެޓީމުގެ ޑިފެންސްލައިން ވަރުގަދަ ކުރުމުގެ ގޮތުން ޑެލައިޓް ހޯދުމަށް މަސައްކަތް ކުރަމުން ކަމަށާއި، އެ ކްލަބުން އޭނާ ހޯދުމަށް 60 މިލިއަން ޕައުންޑު ހުށަހަޅާފައިވާ ކަމަށެވެ.

ބައެއް ރިޕޯޓްތައް ބުނާގޮތުން އަޔަކްސްއިން ޑެލައިޓް ވިއްކާލަން ބޭނުމެއް ނުވެއެވެ. ނަމަވެސް ޑެލައިޓް ބޭނުންވަނީ އަޔަކްސް ދޫކޮށް ބާސާއަށް ބަދަލުވެ، އެ ކްލަބާއެކު ކާމިޔާބު ހޯދާށެވެ.

އުމުރުން 19 އަހަރުގެ ޑެލައިޓް ޔުއެފާ ޗެމްޕިއަންސް ލީގުގައި އަޔަކްސްއަށް މޮޅު ކުޅުމެއް ދައްކާފައިވާއިރު، އޭނާ ވަނީ ގިނަ ބައެއްގެ ސަމާލުކަން މިފަހަރުގެ މުބާރާތުގައި ހޯދާފައެވެ.

އެގޮތުން ޑެލައިޓް ހޯދަން ބާސާގެ އިތުރުން ގިނަ ޓީމުތަކުން އަންނަނީ މަސައްކަތް ކުރަމުންނެވެ. އޭގެ ތެރޭގައި ޖަރުމަން އަދި އިނގިރޭސި ޓީމުތައް ހިމެނެއެވެެ.

އަޔަކްސްއަށް 2016 ވަނަ އަހަރުގެ ސީޒަނުގައި ބަދަލުވި ޑެލައިޓް ވަނީ އެ ކްލަބަށް މިހާތަނަށް ކުޅުނު 112 މެޗުގައި 12 ލަނޑު ކާމިޔާބު ކޮށްފައެވެ. އޭނާ ވަނީ އެ ކްލަބާއެކު މި ސީޒަނުގައި ޑަޗް ކަޕްވެސް ކާމިޔާބު ކޮށްފައެވެ.

ނެދަލޭންޑްސް ގައުމީ ޓީމަށް މިހާތަނަށް 15 މެޗު ކުޅެ، އެއް ލަނޑު ކާމިޔާބު ކޮށްފައިވާ ޑެލައިޓް ވަނީ ނެދަލޭންޑްގެ އުމުރުފުރާތަކުގެ ގައުމީ ޓީމުތަކަށް ވެސް ކުޅެފައެވެ.

މިދިޔަ އަހަރު ގޯލްޑެން ބޯއި އެވޯޑް ހާސިލްކޮށްފައިވާ ޑެލައިޓް ވަނީ ޑަޗް ފުޓްބޯލް އޮފް ދަ އިޔާގެ ބްރޯންޒް ބޫޓް ވެސް ހޯދާފައެވެ.