ރާއްޖެއިން ހައްޔަރުކުރި ލަންކާގެ މަސްވެރިން ދޫކޮށްލަނީ
އެ ބޯޓުތައް އަތުލައިގަނެފައި ވަނީ ފެބްރުއަރީ އަދި މާޗް މަހު
ލަންކާގެ މަސް ބޯޓުތަކެއް ފުލުހުންގެ ބެލުމުގެ ދަށަށް ގެންދަނީ
ރާއްޖޭގެ ކަނޑުގެ ސަރަހައްދަށް ގަވާއިދާ ހިލާފަށް މަސްވެރިކަން ކުރަން އުޅެނިކޮށް އަތުލައިގަނެފައިވާ ސްރީލަންކާގެ މަސް ބޯޓުތައް ދޫކޮށްލަން ދިވެހި ސަރުކާރުން ނިންމައިފިއެވެ.
ރާއްޖޭގެ އިގްތިސާދީ ސަރަހައްދަށް ގަވާއިދާ ހިލާފާށް ފެބްރުއަރީ މަހު ފަހުކޮޅު މަސްވެރިކަން ކުރަން ވަދެ އުޅުނު ލަންކާގެ 21 މަސްވެރިޔަކު އޭޕްރީލް މަހު ވެސް ވަނީ ދޫކޮށްލާފައެވެ.
ލަންކާގެ އިދިކޮޅު ލީޑަރު މަހިންދަ ރާޖަޕަކްސަ ބުދަ ދުވަހު ރާއްޖޭގެ ފޮރިން މިނިސްޓްރު އަބްދުﷲ ޝާހިދުއާ އެކު ބޭއްވި ބައްދަލުވުމަށް ފަހު ކުރެއްވި ޓްވީޓެއްގައި ވިދާޅުވީ، ދިވެހިރާއްޖެ އިން ހިފަހައްޓާފައިވާ ލަންކާގެ ހަތަރު މަސް ބޯޓާއި އެ އުޅަނދުފަހަރުން ހައްޔަރުކުރެވުނު ފަޅުވެރިން ދޫކޮށްލާނެ ކަމަށް ޝާހިދު ވިދާޅުވެފައިވާ ކަމަށެވެ.
އެ ހަތަރު ބޯޓަކީ ފެބްރުއަރީ 28 އަދި މާޗް މަހުގެ އެއް ވަނަ ދުވަހު އަތުލައިގަތް ބޯޓުތަކެވެ. އޭގެ ތެރެއިން ދެ ބޯޓެއް ހިފަހައްޓާފައި ވަނީ ހއ. ކެލާގެ އިރު އުތުރުން 103 ނޯޓިކަލް މޭލު ބޭރުންނެވެ. އަދި އަނެއް ދެ މަސްބޯޓް އަތުލައިގަނެފައި ވަނީ ހދ. ކުޅުދުއްފުއްޓަށް ދަތުރުކުރަމުން ދަނިކޮށެވެ.
ފުލުހުން އެ ބޯޓުގެ ކައްޕިން ހައްޔަރު ކޮށްފައި ވަނީ މާޗް މަހުގެ 4 ވަނަ ދުވަހުއެވެ. އަދި މާޗް މަހުގެ 5 ވަނަ ދުވަހު އެ މީހުން ކޯޓުން ދޫކޮށްލާފައިވާ ކަމަށް ފުލުހުން މައުލޫމާތުދެއެވެ.
އިމިގްރޭޝަންގެ މީޑިއާ އޮފިޝަލް ރާއްޖެއެމްވީ އަށް ވިދާޅުވީ، އެ ހަަތަރު ބޯޓުން ހައްޔަރު ކުރި ފަޅުވެރިންނާއި ކައްޕިން މިހާރު އަނބުރާ ލަންކާ އަށް ގޮސްފައިވާ ކަމަށެވެ. އެހެން ނަމަވެސް ފަހުން ދޫކޮށްލި މީހުން އަދި އެބަތިބި ކަމަށާއި އެމީހުން ތިބީ ލަންކާގެ ހައިކޮމިޝަންގެ ބެލުމުގެ ދަށުގައި ކަމަށެވެ. މީޑިއާ އޮފިޝަލް ވިދާޅުވީ، ބޯޓު އަނބުރާ ލަންކާ އަށް ގެންދިޔުމަށް ބަޔަކު އައިސްފައިވާ ކަމަށެވެ.
