ސީފުޑް އެކްސްޕޯ ގައި ރާއްޖޭގެ 11 ކުންފުންޏެއް ބައިވެރިވެއްޖެ
ފެއާ ކުރިޔަށް ދަނީ ނުވަޔަކާ ހަމަޔަށް
ނިމިގެން ދިޔަ އަހަރުގެ ސީފުޑް އެކްސްޕޯގެ ތެރެއިން ރާއްޖޭގެ ސްޓޯލެއް
އަންގާރަ ދުވަހު ބެލްޖިއަމްގެ ބުރުސަލްސްގައި ފަށާފައިވާ ދުނިޔޭގެ އެންމެ ބޮޑު ސީފުޑް އެކްސްޕޯ ގައި ރާއްޖެއިން ބައިވެރިވެއްޖެއެވެ.
މި މަހުގެ ހަތަކުން ނުވަވަނަ ދުވަހުގެ ނިޔަލަށް ކުރިޔަށްދާ އެކްސްޕޯގައި ދުނިޔޭގެ ސީފުޑްގެ ވިޔަފާރީގައި ހަރަކާތްތެރިވާ 1900 އަށް ވުރެ ގިނަ ކުންފުނިތަކަކުން ބައިވެރިވެފައިވެއެވެ. އަދި 78 ގައުމުން އެކްސްޕޯގައި ބައިވެރިވެފައިވެއެވެ. ފެއަރ ހާއްސަ ކޮށްފައިވަނީ މަހުގެ އުފެއްދުން ވިޔަފާރި ފުޅާކުރުމަށާއި މަސްވެރިކަމުގެ އިންޑަސްޓްރީއަށް ބޭނުންވާ ވަސީލަތްތައް އިޝްތިހާރު ކުރުމަށެވެ.
މި އެކްސްޕޯގައި ރާއްޖޭގެ ފަރާތުން ބައިވެރިވީ، މޯލްޑިވްސް ސީފްޑް ޕްރޯސެސާސް އެންޑް އެކްސްޕޯޓާސް އެސޯސިއޭޝަންގެ ބައެއް މެމްބަރު ގައުމުތަކެވެ.
އެއީ:
- މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް ( މިފްކޯ)
- މޯލްޑިވް މެރިން ޕްރޮޑަކްޓްސް ޕްރައިވެޓް ލިމިޓެޑް
- ހޮރައިޒަން ފިޝަރީޒް ޕްރައިވެޓް ލިމިޓެޑް
- އެންސިސް ފިޝަރީޒް ޕްރައިވެޓް ލިމިޓެޑް
- އޯޝަން ހަންޓަރ ލިމިޓެޑް
- ސީސްޕެއަރ މޯލްޑިވްސް
- ޔޫރޯ ގްލޯބަލް މޯލްޑިވްސް ޕްރައިވެޓް ލިމިޓެޑް
- އޯޝަން ފްރެޝް ޕްރައިވެޓް ލިމިޓޑް
- އޯޝަން ސީފުޑް ޕްރައިވެޓް ލިމިޓެޑް
- ބިގް ފިޝް މޯލްޑިވްސް ޕްރައިވެޓް ލިމިޓެޑް
- ސީޕްރިއާ މެރިން ފުޑްސް ޕްރައިވެޓް ލިމިޓެޑް
މި އެކްސްޕޯ ތަކުގައި ރާއްޖެ ބައިވެރިވެ، ރާއްޖޭގެ އުފެއްދުންތައް އިޝްތިހާރުކޮށް މާރކެޓްކުރުމުގެ ފުރުސަތު ތަނަވަސްވެ ދަނީ ދިވެހި މަސްވެރިން ބާނާ މަހަށް އެވަގުތަކީ ދުނިޔޭގެ ބާޒާރުގައި ހުރި އަގު ލިއްބައިދިނުމަށް ސަރުކާރުން ކަނޑައަޅާފައިވާ ލަނޑުދަނޑި ހާސިލް ކުރުމަށް، ރާއްޖެއިން އެކްސްޕޯޓް ކުރާ މަހުގެ ބާވަތްތަކަށް އިތުރު ފުރުސަތު ތަންވަސްކޮށް ދިނުމުގެ މަގްސަދުގައި ކަމަށް ފިޝަރީޒް މިނިސްޓްރީން މައޫލޫމާތުދެއެވެ.
