ބަންގްލަދޭޝް އިން ރާއްޖެ އަށް މަސައްކަތު އަންނަ މީހުން އެގައުމުން ފުރުމުގެ ކުރިން ފުލުހުންގެ ކްލިއަރެންސް ނަގަން ޖެހޭ ގޮތާއި ބެހޭ ގޮތުން މަޝްވަރާ ކޮށްފިއެވެ.
އެ ފަދަ މަޝްވަރާތަކެއް ކުރެވިފައިވަނީ ރާއްޖެ އަށް އެތެރެވާ ބަންގްލަދޭޝް މީހުންގެ ކަންތައްތައް މިހާރަށް ވުރެ އިތުރަށް ހަރުދަނާ ކުރުމުގެ ގޮތުން ބަންގްލަދޭޝްގެ ހޯމް މިނިސްޓަރީ ގައި ބޭއްވި ބައްދަލުވުމުގައި ކަމަށް އެގައުމުގެ ނޫހަކުން ވަނީ ރިޕޯޓްކޮށްފައެވެ.
އެ ބައްދަލުވުމުގައި ހޯމް މިނިސްޓްރީގެ އޮފިޝަލަކު ވިދާޅުވީ، ރާއްޖެއަށް މަސައްކަތު މީހުން ފޮނުވާ އެޖެންސީތަކުން މިފަހަކަށް އައިސް މީހުން ފޮނުވަނީ ވިޒިޓް ވިސާގައި ކަމަށެވެ. އެހެންވުމުގެ ސަބަބުން އެމީހުންނާއި ބެހޭ ސައްހަ މައުލޫމާތެއް އެއްވެސް ފަރާތަކަށް ނޭނގެ ކަމަށް އޮފިޝަލް ވިދާޅުވިއެވެ.
އެބައްދަލުވުމުގެ އެ އޮފިޝަލް ވަނީ، ބަންގްލަދޭޝް އިން ރާއްޖެ އަންނަ ޖެހޭ މީހުން ފުރުމުގެ ކުރިން ފުލުހުންގެ ހާއްސަ ކްލިއަރެންސް ފޯމެއް ނެގުމާއި ބެހޭ ގޮތުން ފޮރިން މިނިސްޓްރީ އަށް ލަފާދީފައެވެ.
އަދި އޭގެ އިތުރުން ހަރުދަނާ މަސައްކަތު މީހުން ރާއްޖެ އަށް ފޮނުވަން ޖެހޭކަން އޭނާ ވަނީ ފާހަގަ ކޮށްފައެވެ.
ރާއްޖެއަށް އަންނަ ބަންގްލަދޭޝް މީހުންގެ ރިކޯޑް ކްލިއަރެންސް ކުރަން ޖެހޭ ގޮތާއި ބެހޭ ގޮތުން ލަފާދީފައިވާއިރު، ބިދޭސީން ގެނައުމަށް ފަހު އިހުމާލުވި، 67 ފަރާތެއްގެ މައްސަލައެއް މޯލްޑިވްސް އިމިގްރޭޝަން އިން ދަނީ ބަލަމުންނެވެ.
ބިދޭސީން ގެނެސް އެފަރާތްތަކާމެދު އިންސާނިއްޔަތާހިލާފް އަމަލުކުރަމުންދާ މައްސަލައަކީ އަބަދު ވެސް ދެކެވޭ ވާހަކައެވެ. އެފަދަ ކަންތައްތައް ހުއްޓުވުމަށް އެކަށީގެންވާ ފިޔަވަޅުތަކެއް އެޅިފައެއް ނުވެއެވެ. ބިދޭސީން ގެންނަ ފަރާތްތަކުން އިހްމާލުވުމުގެ ސަބަބުން ބައެއް ބިދޭސީން ފިލައި އެހެން ކުންފުނިތަކުގައި ގަވާއިދާ ހިލާފަށް މަސައްކަތް ކުރަމުންދެއެވެ.
