މިނިސްޓަރ ޒަހާ، މަނަދޫގެ މަސްވެރިންނާއި، ދަނޑުވެރިންނާ ބައްދަލުކުރައްވައިފި

މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޒަހާ ވަހީދު، ނ. މަނަދޫގެ މަސްވެރިންނާއި، ދަނޑުވެރިންނާ ބައްދަލުކުރައްވައިފިއެވެ.

ދުޅަހެޔޮ ސިއްހަތަކަށް ކަނބަލުން ނަމުގައި ކުރިއަށް ގެންދިޔަ ޕްރޮގްރާމްް ނިންމުމުގެ ރަސްމިއްޔާތަށް މަނަދޫއަށް ވަޑައިގެން މިނިސްޓަރ ޒަހާ ވަނީ އެ ރަށުގެ މަސްވެރިންނާއި، ދަނޑުވެރިންނަށް ދިމާވާ ގޮންޖެހުންތަކާއި، އެ މަސައްކަތަށް ހުރި ހުރަސްތައް އޮޅުން ފިލުުއްވާފައެވެ.

ރާއްޖެ.އެމްވީ އަށް މައުލޫމާތު ދެއްވަމުން މިނިސްޓަރ ޒަހާ ވިދާޅުވީ ދަަނޑުވެރިންނާ ބައްދަލުކުރުމުން އެންމެެ ބޮޑު ކަންބޮޑުވުމެއްގެ ގޮތުގައި ދަނޑުވެރިން ފާހަގަކޮށްފައި ވަނީ ދަނޑުވެރިކަން ކުރުމަށް ބިން ނުލިބުމުގެ މައްސަލަ ކަމަށެވެ. އެގޮތުން ދަނޑުވެރިން މަސައްކަތް ފުުޅާކުރުމަށާއި، އެ މަސައްކަތް އިތުރަށް ކުރުމަށް ބިން ބޭނުންވާ ކަމަށް ބުނި ކަމަށް މިނިސްޓަރ ވިދާޅުވިއެވެ.

އޭގެ އިތުރުން ދަނޑުވެރި ކަމަށް ބޭނުންކުރާ ބައެއް ތަކެތި ހެޔޮ އަގުގައި ލިބެން ނުހުންނަ ކަމުގެ ޝަކުވާ އާއި، ދަނޑުވެރިންނަށް ހާއްސަ ތަމްރީން ޕްރޮގްރާމެއް ބެނުންވާ ކަމަށް ދަނޑުވެރިން ބުނި ކަމަށް މިނިސްޓަރ ވިދާޅުވިއެވެ. އަދި ދަނޑުވެރިން އެދުނު ގޮތަށް ރަމަޟާން މަހަށް ފަހު ދަނޑުވެރިންނަށް ތަމްރީން ޕްރޮގްރާމް ކުރިއަށް ގެންދަވާނެ ކަމަށް މިނިސްޓަރ ވިދާޅުވި އެވެ.

މިނިސްޓަރ ޒަހާ ވިދާޅުވި ގޮތުގައި މަސްވެރިންނާ ބައްދަލުކުރުމުން، އައިސް ޕްލާންޓެއްގެ މުހިންމުކަން މަސްވެރިން ފާހަގަކުރި ކަމަށެވެ.