މައުމޫން ފައުންޑޭޝަންގެ އިޙްޔާ ޕްރޮގްރާމްތައް މިއަހަރު ބާއްވަނީ

ރަމަޟާން މަހުގެ ރޭތައް އިޙްޔާކުރުމުގެ ޕްރޮގްރާމްތައް މިއަހަރު ކުރިއަށް ގެންދެވުމަށް ކުރީގެ ރައީސް މައުމޫން އަބްދުލްޤައްޔޫމް ނިންމަވައިފި އެވެ.

ކޮންމެ އަހަރަކު ވެސް ކުރީގެ ރައީސް މައުމޫން އަބްދުލްޤައްޔޫމް ކުރިއަށްގެންދަވާ އިޙްޔާ ޕްރޮގްރާމްތައް މިދިޔަ އަހަރު ކުރިއަށް ގެންގޮސްފައެއް ނުވެ އެވެ. ނިމުނު އަހަރުގެ ރަމަޟާން މަހުގައި އެމަނިކުފާނު ހުންނަވަންޖެހުނީ ޖަލުގަ އެވެ.

2017 ވަނަ އަހަރު ވެސް މައުމޫން ފައުންޑޭޝަނުން ކުރިއަށް ގެންގޮސްފައިވަނީ އިޙްޔާކުރުމުގެ އެންމެ ޕްރޮގްރާމެކެވެ. އެ އަހަރު ޕްރޮގްރާމްތައް ކުރިއަށް ނުގެންދެވުނީ، އާއިލީ ބޭނުންފުޅެއްގައި މައުމޫން ރާއްޖެ އިން ބޭރުގައި ގިނަ ދުވަސްތަކެއް ވަންދެން އުޅުއްވަން ޖެހިވަޑައިގަތުމުންނެވެ.

މައުމޫން ފައުންޑޭޝަނުން ކުރިއަށްގެންދާ އިޙްޔާ ޕްރޮގްރާމްތައް މިއަހަރު ކުރިއަށްގެންދިއުމަށް ނިންމާފައިވާ ކަން ހާމަކޮށް، އެ ފައުންޑޭޝަނުން އާންމު ކުރި ބަޔާނެއްގައި ބުނެފައިވަނީ އިޙްޔާ ޕްރޮގްރާމްތަކުގެ ތެރެއިން ބާއްވާ ޖަލްސާތައް ބޭއްވުމަށް ހަމަޖެހިފައިވަނީ ކޮންމެ ހަފްތާއެއްގެ އަންގާރަ ދުވަހުގެރޭ ގައި ކަމަށެވެ. އެގޮތުން މެއި 14، 21 އަދި 28 ވަނަ ދުވަހު އިޙްޔާ ޕްރޮޤްރާމްތައް ކުރިއަށް ގެންދާނެ ކަމަށާއި، އެ ޕްރޮގްރާމްތައް ކުރިއަށް ގެންދާނީ އިސްލާމީ މަރުކަޒުގެ ޖަލްސާކުރާ މާލަމުގައި ކަމަށް މައުމޫން ފައުންޑޭޝަނުން ބުންޏެވެ.

ކޮންމެ އަންގާރަ ދުވަހެއްގެ ރޭ ކުރިއަށްގެންދާ އެ ޕްރޮގްރާމްތަކުގައި ރައީސް މައުމޫން ވާހަކަފުޅު ދައްކަވާނެ ކަމަށާއި، އެ ޖަލްސާތައް ފެށޭނީ ރޭގަނޑު 10:00 ގައި މަައުމޫން ފައުންޑޭޝަނުން ބުންޏެވެ.

"ވީމާ މި ޖަލްސާއަށް ވަޑައިގަތުމަށް ޝައުޤުވެރިވެ ވަޑައިގަންނަވާ އެންމެހާ ބޭފުޅުންނަށް ޖަލްސާއަށް ވަޑައިގަތުމަށް މި ފައުންޑޭޝަނުން ދައުވަތު އަރުވަމެވެ."

ރައީސް މައުމޫން ގެންދެވީ އެމަނިކުފާނު ވެރިކަމުގައި ހުންނެވި ދުވަސްވަރު ވެސް ކޮންްމެ އަހަރެއްގެ ރަމަޟާން މަހުގައި އިހްޔާ ޕްރޮގްރާމްތައް ކުރިއަށް ގެންދަވަމުންނެވެ. ވެރިކަމުން ދުރަށްވަޑައިގެން ވެސް އެމަނިކުފާނު ޕްރޮގްްރާމްތައް ކުރިއަށް ގެންދަވާފައިވެއެވެ.