ޕްރިމިއާ ލީގު: އާސެނަލް އާއި ޔުނައިޓެޑަށް ޗެމްޕިއަންސް ލީގުގެ ޖާގަ ގެއްލިއްޖެ

ޕްރިމިއާ ލީގުގައި އާސެނަލް އާއި މެންޗެސްޓާ ޔުނައިޓެޑު އެއްވަރުވެ، ކުރިޔަށް އޮތް ސީޒަނުގެ ޔުއެފާ ޗެމްޕިއަންސް ލީގުގެ ޖާގަ ގެއްލިއްޖެއެވެ.

އާދީއްތަ ދުވަހުގެ ރޭ ކުޅުނު މެޗުން އާސެނަލް އެއްވަރުވީ ބްރައިޓަންއާ ވާދަކޮށް 1-1 ގެ ނަތީޖާއަކުންނެވެ.

އާސެނަލް ދަނޑުގައި ކުޅުނު މި މެޗު ފެށިގެން ނުވަ ވަނަ މިނެޓުގައި އެޓީމުން ވަނީ ލީޑު ނަގާފައެވެ. މި ލަނޑު އެޓީމަށް ލިބުނު ޕެނަލްޓީއަކުން ކާމިޔާބުކުރީ އޮބަމަޔަންގްއެވެ.

މި ލަނޑަށްފަހުވެސް އާސެނަލްއަށް ވަނީ ލަނޑު ޖެހުމަށް ފުރުސަތުތަކެއް ލިބި ބޭކާރުވެފައެވެ. މި ހާފްގައި ނަތީޖާ ހަމަހަމަކުރުމަށް ބްރައިޓަންއަށްވެސް ވަނީ ފުރުސަތުތަކެއް ލިބި ބޭކާރުވެފައެވެ.

ދެވަނަ ހާފް ފެށިގެން ބްރައިޓަންއިން ވަނީ ކުޅުން ރަނގަޅުކޮށް ނަތީޖާ ހަމަހަމަކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ލިބުނު ޕެނަލްޓީއަކުން މުރޭއެވެ.

މެޗުގެ ފަހު 20 މިނެޓު ތެރޭގައި އާސެނަލްއިން ވަނީ ފުލުފުލުގައި ހަމަލާތައް އުފައްދާފައެވެ. ނަމަވެސް ލަނޑު ޖެހުމަށް ލިބުނު ފުރުސަތުތަކުގެ ބޭނުން އެންމެ އެދެވޭ ގޮތެއްގައި އެޓީމަށް ނުހިފެއެވެ.

މި ނަތީޖާއާއެކު އާސެނަލް އޮތީ ކުޅުނު 37 މެޗުން ލިބުނު 67 ޕޮއިންޓާއެކު ޕޮއިންޓް ތާވަލުގެ ފަސްވަނައިގައެވެ. ބްރައިޓަން އޮތީ ކުޅުނު 37 މެޗުން ލިބުނު 36 ޕޮއިންޓާއެކު ޕޮއިންޓް ތާވަލުގެ 17 ވަނައިގައެވެ.

އާދީއްތަ ދުވަހުގެ ރޭ ކުޅުނު މެޗުން ޔުނައިޓެޑު އެއްވަރުވީ ހަޑަސްފިލްޑް ޓައުންއާ ވާދަކޮށް 1-1 ގެ ނަތީޖާއިން އެއްވަރުވެގެންނެވެ.

ހަޑަސްފިލްޑް ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅުނީ ޔުނައިޓެޑުންނެވެ. އެގޮތުން 8 ވަނަ މިނެޓުގައި އެޓީމުން ވަނީ ލީޑު ނަގާފައެވެ.

މި ލަނޑަށްފަހުވެސް ޔުނައިޓެޑުގެ ފަރާތުން އެޓޭކިން ފުޓުބޯޅައެއް ފެނިގެންގޮސްފައިވާއިރު، ލަނޑު ޖެހުމަށްވެސް ފުލުފުލުގައި އެޓީމަށް ވަނީ ފުރުސަތުތަކެއް ލިބި ބޭކާރުވެފައެވެ.

ދެވަނަ ހާފް ފެށިގެން ހަޑަސްފިލްޑުން ވަނީ ނަތީޖާ ހަމަހަމަކޮށްފައެވެ. މި ލަނޑު 60 ވަނަ މިނެޓުގައި އެޓީމަށް ކާމިޔާބުކޮށްދިނީ ބެންޒާއެވެ. މީގެއިތުރުންވެސް އެޓީމަށް ވަނީ ލަނޑު ޖެހުމަށް ފުރުސަތުތަކެއް ލިބި ބޭކާރުވެފައެވެ.

މި ނަތީޖާއާއެކު ޔުނައިޓެޑު އޮތީ ކުޅުނު 37 މެޗުން ލިބުނު 66 ޕޮއިންޓާއެކު ޕޮއިންޓް ތާވަލުގެ ހަވަނައިގައެވެ. ހަޑަސްފިލްޑް އޮތީ ކުޅުނު 37 މެޗުން ލިބުނު 15 ޕޮއިންޓާއެކު ޕޮއިންޓް ތާވަލުގެ ފުލުގައެވެ. އެޓީމު ވަނީ ރެލިގޭޓްވެފައެވެ.

މެޗުން އެއްވަރުވުމާއެކު އާސެނަލް އާއި ޔުނައިޓެޑަށް ގަދަ ހަތަރެއްގެ ޖާގަ ގެއްލިފައިވާއިރު، މި ދެޓީމު ދެން ކުޅެން ޖެހޭނީ ޔޫރޮޕާ ލީގުގައެވެ. ނަމަވެސް މި ދެޓީމުންކުރެ ކޮލިފައިން ނުކުޅެ ސީދާ ޔޫރަޕާ ލީގުން ޖާގަ ލިބޭނެކަން ކަށަވަރުވާ ޓީމެއް އެނގޭނީ މި މަހުގެ 12 ވަނަ ދުވަހު ބާންލީއާ ދެކޮޅަށް އާސެނަލް ކުޅޭ މެޗު އަދި ކާޑިފް ސިޓީއާ ދެކޮޅަށް ޔުނައިޓެޑު ކުޅޭ މެޗުންނެވެ. އާސެނަލް އާއި ޔުނައިޓެޑާ ދެމެދު އެއް ޕޮއިންޓްގެ ފަރަގެއް އެބައޮތެވެ.