ޕްރިމިއާ ލީގުގައި ލިވަޕޫލް އެއްވަނައަށް ޖެހިލިއިރު، ޓޮޓެންހަމް ހޮޓްސްޕާ ބަލިވެއްޖެއެވެ.

ހޮނިހިރު ދުވަހުގެ ރޭ ކުޅުނު މެޗުން ލިވަޕޫލް މޮޅުވީ ނިއުކާސަލް ޔުނައިޓެޑާ ވާދަކޮށް 2-3 ގެ ނަތީޖާއަކުންނެވެ.

ނިއުކާސަލް ދަނޑުގައި ކުޅުނު މި މެޗު ފެށިގެން 13 ވަނަ މިނެޓުގައި ލިވަޕޫލުން ވަނީ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ އެލެގްޒެންޑާ އާނޯލްޑްގެ އެހީތެރިކަމާ އެކު ވެންޑައިކްއެވެ.

ނަމަވެސް ނިއުކާސަލްއިން ވަނީ އެ ޓީމުގެ އެޓޭކްތައް ވަރުގަދަކޮށް 22 ވަނަ މިނެޓުގައި ނަތީޖާ ހަމަހަމަކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ އަޓްސޫއެވެ. މި ލަނޑަށް ފަހު ވެސް އެ ޓީމަށް ވަނީ ލީޑު ނަގަން ވެސް ފުރުސަތުތަކެއް ލިބި ބޭކާރުވެފައެވެ.

ލިވަޕޫލުން މެޗުގެ ލީޑު އަނބުރާ ހޯދީ 30 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ މުހައްމަދު ސަލާހްއެވެ. ފުރަތަމަ ހާފް ނިމުމުގެ ކުރިންވެސް އެޓީމަށް ވަނީ ލަނޑު ޖެހުމަށް ފުރުސަތުތަކެއް ލިބި ބޭކާރުވެފައެވެ.

ދެވަނަ ހާފް ފެށިގެން ނިއުކާސަލް އިން ވަނީ ދެވަނަ ފަހަރަށް މެޗުގެ ނަތީޖާ ހަމަހަމަކޮށްފައެވެ. މި ލަނޑު 54 ވަނަ މިނެޓުގައި އެޓީމަށް ކާމިޔާބުކޮށްދިނީ ޖަވީ މެންކުއިލޯގެ އެހީތެރިކަމާ އެކު ރޮންޑޮންއެވެ.

މެޗުން ލިވަޕޫލް މޮޅުވި ލަނޑު 86 ވަނަ މިނެޓުގައި އެޓީމަށް ކާމިޔާބުކޮށްދިނީ ޝަގީރީގެ އެހީތެރިކަމާއެކު ޑޭވިޑް އޮރިގީއެވެ.

މި ނަތީޖާއާއެކު ލިވަޕޫލް އޮތީ ކުޅުނު 37 މެޗުން ލިބުނު 94 ޕޮއިންޓާއެކު ޕޮއިންޓް ތާވަލުގެ އެއްވަނައިގައެވެ. މެޗުން ބަލިވި ނިއުކާސަލް އޮތީ ކުޅުނު 37 މެޗުން ލިބުނު 42 ޕޮއިންޓާއެކު ޕޮއިންޓް ތާވަލުގެ 14 ވަނައިގައެވެ.

ހޮނިހިރު ދުވަހުގެ ރޭ ކުޅުނު މެޗުން ޓޮޓެންހަމް ބަލިވީ އޭއެފްސީ ބޯންމައުތުއާ ވާދަކޮށް 0-1 ގެ ނަތީޖާއަކުންނެވެ.

ބޯންމައުތު ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅުނީ ޓޮޓެންހަމުންނެވެ. އެގޮތުން އެޓީމަށް ވަނީ މި ހާފްގައި ލަނޑު ޖެހުމަށް ގިނަ ފުރުސަތުތަކެއް ލިބި ބޭކާރުވެފައެވެ.

މި ހާފްގައި ބޯންމައުތަށް ވެސް ވަނީ މަދުން ނަމަވެސް ލަނޑު ޖެހުމަށް ފުރުސަތުތަކެއް ލިބިފައެވެ. ނަމަވެސް އެޓީމަށް ލިބުނު ފުރުސަތުތަކުގެ ބޭނުން އެންމެ އެދެވޭ ގޮތެއްގައި ހިފޭ ގޮތެއް ނުފިއެވެ.

ފުރަތަމަ ހާފް ނިމުމުގެ ކުރިން ޓޮޓެންހަމްގެ ސޮންއަށް ރެފްރީ ވަނީ ސީދާ ރަތް ކާޑަކާއެކު ދަނޑުން ފޮނުވާލާފައެވެ. އަދި ދެވަނަ ހާފް ފެށިގެން މާގިނައިރުތަކެއް ނުވަނީސް އެޓީމުން ބަދަލު ކުޅުންތެރިޔެއްގެ ގޮތުގައި ކުޅެން އެރި ފޮއިތުއަށް ރެފްރީ ވަނީ ރަތް ކަޑު ދައްކާ ދަނޑުން ފޮނުވާލާފައެވެ.

އެގޮތުން މެޗުގެ ބޮޑުބައި ޓޮޓެންހަމުން ކުޅުނީ ނުވަ ކުޅުންތެރިންނާ އެކުގައެވެ. މީގެ ސަބަބުން އެޓީމަށް ގިނަ ދަތިތަކާ ކުރިމަތިލާން ޖެހުނެވެ.

މެޗުގެ އިތުރުވަގުތުގައި ބޯންމައުތުއިން ވަނީ މެޗުގެ ލީޑު ނަގާފައެވެ. މި ލަނޑު ފްރަސާގެ އެހީތެރިކަމާއެކު އެޓީމަށް ކާމިޔާބުކޮށްދިނީ އަކޭއެވެ.

މި ނަތީޖާއާއެކު ޓޮޓެންހަމް އޮތީ ކުޅުނު 37 މެޗުން ލިބުނު 70 ޕޮއިންޓާއެކު ޕޮއިންޓް ތާވަލުގެ ތިންވަނައިގައެވެ. މެޗުން މޮޅުވި ބޯންމައުތު އޮތީ ކުޅުނު 37 މެޗުން ލިބުނު 45 ޕޮއިންޓާއެކު ޕޮއިންޓް ތާވަލުގެ 13 ވަނައިގައެވެ.

މިއާއެކު އާދީއްތަ ދުވަހުގެ ރޭ ޗެލްސީ އާއި ވަޓްފޯޑް ކުޅޭ މެޗުން ޗެލްސީ މޮޅުވެއްޖެނަމަ، ޓޮޓެންހަމް ހަތަރުވަނައަށް ވެއްޓި، ޗެލްސީއަށް ތިންވަނައަށް ޖެހިލަން ފުރުސަތު ލިބޭނެއެވެ.