ހުކުރު މިސްކިތުގެ އާބާތުރަ ފިލުވުން- ވަޅުދިޔަ ހިއްކަން ފޭބީ ޑެޕިއުޓީ މިނިސްޓަރު
ގޯތިތެރޭގައި ދޮންވެލި ލައި، ކުލަ ލުމުގެ މަސައްކަތް ކުރާނެ
ޑެޕިއުޓީ މިނިސްޓަރު މުހުސިނާއި ކަލްޗަރަލް ހެރިޓޭޖް މެނޭޖަރު ހާޝިމް ވަޅު ސާފުކުރައްވަނީ
މިނިސްޓްރީ އޮފް އާރްޓްސް، ކަލްޗަރ އެންޑް ހެރިޓޭޖްގެ ސިޔާސީ މުވައްޒަފުން އިސްނަންގަވައިގެން މާލޭ ހުކުރު މިސްކިތުގެ އާބާތުރަ ފިލުވުމުގެ މަސައްކަތް ފަށައިފި އެވެ.
އެކަމާ ގުޅިގެން މިނިސްޓްރީން ކުރި ޓްވީޓެއްގައި ބުނީ، ރަމަޟާން މަހަށް ތައްޔާރު ވުމުގެ ގޮތުން މާލޭ ހުކުރު މިސްކިތުގެ އާބާތުރަ ފިިލުވުމުގެ މަސައްކަތް ކުރަމުންދާ ކަމަށާއި، މިސްކިތުގެ ގޯތި ތެރޭގައި ދޮންވެލި ލައި، ކުލަ ލުމުގެ މަސައްކަތް ކުރުމަށް ހަަމަޖެހިފައިވާ ކަމަށެވެ.
ހުކުރު މިސްކިތު ވަޅު ދިޔަ ހިއްކުމުގެ މަސައްކަތުގެ ތެރެއިން -- ފޮޓޯ: ހެރިޓޭޖް މިނިސްޓްރީ
އެޗްޑީސީއާއި، ޕްލޭނިންގ މިނިސްޓްރީއާއި މާލޭ ސިޓީ ކައުންސިލުގެ އިތުރުން، އަމިއްލަ ފަރާތްތަކުން ބައިވެރިވި މި ހަރަކާތުގައި ހެރިޓޭޖް މިނިސްޓަރ ޔުމްނާ މައުމޫނު ވެސް ބައިވެރިވެ ވަޑައިގެންފައިވާއިރު، މިނިސްޓްރީގެ ސްޓޭޓް މިނިސްޓަރު މުހައްމަދު ތޯރިގްއާއި، ޑެޕިއުޓީ މިނިސްޓަރު އަހްމަދު މުހުސިން އާއި، ކަލްޗަރަލް ހެރިޓޭޖް މެނޭޖަރު އަހްމަދު ހާޝިމް އާއި ރިޝާޗް އެނަލިސްޓް އަލާ ދީދީ އާއި ނާޖިހު މުހައްމަދުގެ އިތުރުން ވެސް ގިނަ ފަރާތްތަކުން އަމަލީ ގޮތުން ބައިވެރިވެލައްވާފައިވެއެވެ.
މަސައްކަތުގެ ތެރެއިން މިސްކިތުގެ ވަޅި ދިޔަ ހިއްކަން ފައިބާފައިވަނީ، ޑެޕިއުޓީ މިނިސްޓަރ އަހުމަދު މުހުސިން އެވެ. އަދި މިސްކިތުގެ އެހެން ތަންތަން ސާފުކޮށް އާބާތުރަ ފިލުވުމުގައި މިނިސްޓަރ ޔުމްނާވެސް ބައިވެރިވެފައިވެއެވެ.
