އިޓާލިއަން ލީގުގައި ފަހު ވަގުތު ކްރިސްޓިއާނޯ ރޮނާލްޑޯ ޖެހި ލަނޑުން ޔުވެންޓަސް އިން ޕޮއިންޓެއް ހޯދައިފިއެވެ.

ހުކުރު ދުވަހުގެ ރޭ ކުޅުނު ޔުވެންޓަސް އާއި ޓޮރީނޯ ބައްދަލުކުރި މެޗު ނިމުނީ 1-1 ގެ ނަތީޖާއަކުންނެވެ.

ޔުވެންޓަސް ދަނޑުގައި ކުޅުނު މި މެޗު ފެށިގެން 18 ވަނަ މިނެޓުގައި ޓޮރީނޯ އިން ވަނީ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ލުކިކްއެވެ.

މި ލަނޑާ އެކު ޔުވެންޓަސް އިން ވަނީ އެ ޓީމުގެ ކުޅުން ރަނގަޅުކޮށްފައެވެ. އެގޮތުން ފުލުފުލުގައި އެ ޓީމުން ވަނީ ހަމަލާތައް އުފައްދާފައެވެ. އަދި ނަތީޖާ ހަމަހަމަ ކުރަން ވެސް ފުރުސަތުތަކެއް ލިބި ބޭކާރުވިއެވެ.

މި ހާފްގައި ޓޮރީނޯގެ ފަރާތުން ވެސް ގިނަ ހަމަލާތައް ފެނިގެންދިޔައިރު، އެ ހަމަލާތަކުގެ ބޭނުން އެ ޓީމަށް އެންމެ އެދެވޭ ގޮތެއްގައި ހިފިފައެއް ނުވެއެވެ.

ދެވަނަ ހާފް ފެށިގެން ޔުވެންޓަސްއިން އެޓީމުގެ ކުޅުން އިތުރަށް ވަރުގަދަކުރިއިރު، ލަނޑު ޖެހުމަށް އެޓީމުން ދިޔައީ ފުލުފުލުގައި ފުރުސަތު ހޯދަމުންނެވެ.

ޔުވެންޓަސްއިން މެޗުގެ ނަތީޖާ ހަމަހަމަކުރީ 84 ވަނަ މިނެޓުގައެވެ. މި ލަނޑު ކާމިޔާބުކުރީ ރޮނާލްޑޯއެވެ. މި ލަނޑު އޭނާ ކާމިޔާބުކުރީ ސްޕިނަޒޯލާ ނަގައިދިން ހުރަހަކުން ބޮލުންނެވެ.

މި ނަތީޖާއާއެކު ޔުވެންޓަސް އޮތީ ކުޅުނު 35 މެޗުން ލިބުނު 89 ޕޮއިންޓާއެކު ޕޮއިންޓް ތާވަލުގެ އެއްވަނައިގައެވެ. މެޗުން ބަލިވި ޓޮރީނޯ އޮތީ ކުޅުނު 35 މެޗުން ލިބުނު 57 ޕޮއިންޓާއެކު ޕޮއިންޓް ތާވަލުގެ ހަވަނައިގައެވެ.