ފުވައްމުލަކުގައި ގާއިމްކުރާ ޓެކްނޮލޮޖީ ޕާކްގެ މަސައްކަތް ކުރިއަށްދޭ: މިނިސްޓަރު މަލީހު

ފުވައްމުލަކު ސިޓީގައި ގާއިމްކުރާ ޓެކްނޮލޮޖީ ޕާކްގެ މަސައްކަތް ކުރިއަށްދާ ކަމަށް ކޮމިއުނިކޭޝަން ސައިންސް އެންޑް ޓެކްނޮލޮޖީ މިނިސްޓަރު މުހައްމަދު މަލީހު ޖަމާލް ވިދާޅުވެއްޖެއެވެ.

ހޮނިހިރު ދުވަހު ފުވައްމުލަކު ސިޓީއަށް ވަޑައިގަންނަވާ މިނިސްޓަރު މަލީހު ވިދާޅުވީ ޓެކްނޮލޮޖީ ޕާކިން ހިމެނޭ ގޮތަށް އައިޓީ އިންސްޓިއުޓެއް ގާއިމް ކުރުމާ ގުޅޭ ގޮތުން ބަލަންޖެހޭ ބައެއް ބެލުންތައް ބަލާފައިވާ ކަމަށާއި، ބިން ހޯދުމާ ގުޅޭ ގޮތުން ވެސް ފުވައްމުލަކުގެ ސިޓީ ކައުންސިލްއާއެކު މަޝްވަރާ ކުރެވިފައިވާ ކަމަށެވެ.

މިނިސްޓަރު މަލީހު ވިދާޅުވީ ރާއްޖޭގައި ޓެކްނޮލޮޖީއާ ގުޅުން ހުރި މީހުން ބިނާ ކުރުމާއި އަދި އެއާއެކު ރާއްޖެއަކީ ވެސް ޓެކްނޮލޮޖީގެ ދާއިރާގައި ވިޔަފާރިތަކަށް މަގުފަހިވެފައި އޮތް ގައުމެއްގެ ގޮތުގައި ޕްރޮމޯޓް ކުރުން ކަމަށެވެ.

މިނިސްޓަރު މަލީހު ވިދާޅުވީ ޓެކްނޮލޮޖީއާ ރައްޓެހި ރަށެއްގެ ގޮތުގައި ފުވައްމުލަކު ތަރައްގީވާންޖެހޭ ކަމަށާއި، ފުވައްމުލަކީ ޓެކްނޮލޮޖީއާ ރައްޓެހި ޒުވާނުންތަކެއް ހަރަކާތްތެރިވަމުންދާ ރަށެއް ކަމަށެވެ. އަދި މިރަށުގެ ގިނަ ޒުވާނުންނަކީ ކާމިޔާބު އެކިއެކި އެޕްލިކޭޝަންތައް ވުޖޫދުކޮށް ބޭނުންކުރާ ކަމަށެވެ.

''ރައީސް އިބްރާހިމް މުހައްމަދު ސޯލިހު ކެންޕޭންތެރޭގައި ފުވައްމުލަކަށް ވަޑައިގެން ވައުދުވެ ވަޑައިގެންނެވި ފުވައްމުލަކުގައި އައިޓީ އިންސްޓިޓިއުޓެއް ގާއިމް ކުރުމުގެ ވައުދު. އެއާއެކު އަޅުގަނޑުމެންގެ ވިސްނުން ހުރީ ދުރުރާސްތާ ޕްލޭންގައި ރާއްޖޭގައި ވެސް ގާއިމްވާންޖެހޭ ސްލިކަން އައިލެންޑް. އެހެން ހިސާބަކުން މިމަސައްކަތް ފެށެން ޖެހޭ.'' މިނިސްޓަރު މަލީހު ވިދާޅުވިއެވެ.

މިނިސްޓަރު މަލީހު ވިދާޅުވީ ފުވައްމުލަކުގައި ގާއިމްކުރި އިންކިއުބޭޓަރ އަދި ސީއެސްސީ މެދުވެރިކޮށް ވަކިން ޚާއްސަކޮށް އިންކިޔުބޭޓަރ މެދުވެރިކޮށް ޓެކްނޮލޮޖީގެ އެކިއެކި ލުއިފަސޭހަތައް ސަރުކާރުގެ އޮފީސްތަކާއި އާންމު ރައްޔިތުންނަށް ފޯރުކޮށްދީފައިވާ ކަމަށެވެ. އަދި ވަރަށް ކާމިޔާބު ކަމާއެކު ރޮބޮޓިކްސް ކްލާސްތަކެއް ހިގަމުންދާކަން ކަމަށް މިނިސްޓަރު ވިދާޅުވިއެވެ.

މީގެ އިތުރުން މިނިސްޓަރު ވިދާޅުވީ މިފަދަ ޓެކްނޮލޮޖީ ޕާކެއް ފުވައްމުލަކުގައި ގާއިމްވެއްޖެނަމަ ނަތީޖާއަކަށް މިނަކަލު ކޮށްގެން ރާއްޖޭގެ އެހެން ހިސާބުތަކުގައި ވެސް މިކަން ކުރެވޭނެ ކަމަށެވެ.

މިނިސްޓަރު ވިދާޅުވީ ނެކްނޮލޮޖީ ޕާކެއް އޭގެ ފުރިހަމަ ގޮތުގައި ތަރައްގީ ވެގެންދާއިރު، ޓެކްނޮލޮޖީއާ ގުޅުން ހުރި ކުންފުނިތައް ވެސް ޕާކުގައި ރަޖިސްޓްރީކޮށްފިނަމަ އެމީހުންނަށް ސަރުކާރުން ދެވޭނެ ލުއިތައް ލިބޭނެ އިންތިޒާމެއް ހަމަޖެއްސައިދޭނެ ކަމަށެވެ.