ރާއްޖޭގެ ޖަލުތަކުގެ ހާލަތު ދެނެގަތުމަށް ތައްޔާރު ކުރި ''ޖަލު އޮޑިޓް ރިޕޯޓް'' މި މަހުގެ ފަހުކޮޅު އާންމުކުރާނެ ކަމަށް ހޯމް މިނިސްޓްރީން ބުނެފިއެވެ.
ޖަލުގެ އޮޑިޓެއް ހެދުމަކީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ 100 ދުވަހުގެ ވައުދުތަކުގެ ތެރޭ ހިމެނޭ އެއް ވައުދެވެ.
ރާއްޖެއެމްވީއަށް މައުލޫމާތު ދެއްވަމުން ހޯމް މިނިސްޓްރީގެ ސްޓޭޓް މިނިސްތަރު އަލީ ނަޒީރު ވިދާޅުވީ، ރިޕޯޓް ނެރުމުގެ މަސައްކަތް ހޯމް މިނިސްޓްރީން ވަރަށް ބާރަށް ކުރަމުންދާ ކަމަށެވެ. އެ ނުނެރި ލަސްވެގެން އުޅެނީ ބަލަންޖެހޭ ކަންތައްތަކެއް ހުރީމުން ކަަމަށް އޭނާ ފާހަގަކުރެއްވިއެވެ.
ޖަލު ރިޕޯޓުގައި މިހާރު ޖަލުގެ ހާލަތު އިތުރަށް ރަނގަޅު ކުރަން ޖެހޭ ކަންތައްތައް ހިމެނޭނެ ކަމަށް ނަޒީރު ވިދާޅުވިއެވެ. އެހެން ކަމުން އަންނަ މަހުގެ މެދެތެރޭގައި ރިޕޯޓް ނެރެވޭނެ ކަމަށް އޭނާ ވިދާޅުވިއެވެ.
ގައިދީން ބޭތިއްބުމަށް އެކަށީގެންނުވާ ކަމަށް ބުނެ މާލޭ ޖަލުގެ އެނެކްސް 1 ވަނީ ދާދި ފަހުން ބަންދުކޮށްފައެވެ. ޖަލުގެ ގޮޅިތަކުގައި އެކަށީގެންވާ ވަރަށް ވުރެ ގިނަ މީހުން އިތުރުވުމުގެ ސަބަބުން އެ މީހުންނަށް ސިއްހީ އެތައް މައްސަލަތަކެއް ދިމާވެފައިވާ ކަމަށާއި، އޭގެ ސަބަބުން ގިނަ ގައިދީންގެ އަސާސީ ހައްގުތަކުން މަހުރޫމްވެފައިވާ ކަމަށް އެކޮމިޝަންގެ މެމްބަރުން ވަނީ ފާހަގަކޮށްފައެވެ.
ޖުމްލަ 400 ސަފްހާގެ މައްޗަށް ހިމެނޭ ޖަލު ރިޕޯޓް ހޯމް މިނިސްޓްރީން އެކުލަވައިލި ކޮމިޝަނުން މިނިސްޓަރު ޢިމްރާން ޢަބްދުﷲއަށް އަރުވާފައި ވަނީ ނިމިގެން ދިޔަ އޭޕްރިލް މަހުއެވެ.
ޖަލުތަކަށް އެކަށީގެންވާ ރަނގަޅު ބަދަލުތަކެއް ގެނެވި، ދުނިޔޭގެ އެކި ޖަލުތަކާބެހޭ އުޞޫލުތަކާ ހަމަތަކަށް ފެތިގެންދާ މިންވަރަށް ދިވެހިރާއްޖޭގެ ޖަލުތަކުގެ ހާލަތު އިރާދަކުރެއްވިއްޔާ ހެޔޮގޮތުގައި ބަދަލުކުރައްވާނެ ކަމަށެވެ. ރިޕޯޓް އެކުލަވާލެއްވުމުގައި ކޮމިޝަންގެ މެމްބަރުން ކުރެއްވި މަސައްކަތް ވެސް މިނިސްޓަރު ވަނީ ފާހަގަ ކުރައްވާފައެވެ. މިނިސްޓަރ ވިދާޅުވީ ވަރަށް ގިނަ ގޮންޖެހުންތަކާއި، ހުރަސްތަކާއެކު ވެސް އެ މަސައްކަތް ކުރައްވާ ނިންމަވާފައި ވަނީ ވަރަށް ކުރުމުއްދަތެއްގެ ތެރޭގައި ވަރަށް ފުރިހަމައަށްކަމަށެވެ.
