ކައިވެންޏަށް ފަހު ސޯފީގެ ނަން ބަދަލުކޮށްފި
ކައިވެނީގެ ރަސްމީ ހަފްލާ ވަރަށް އަވަހަށް ޕެރިހުގައި ބާއްވާނެ ކަމަށް ރިޕޯޓްތައް ބުނެ
ސޯފީ ޓާރނާ އާއި ޖޯ ޖޯނަސް އަދި ނިކް ޖޯނަސް
ސަޕްރައިޒް ވެޑިންއަށް ފަހު ސޯފީ ބެލިންޑާ ޓާރނާ އޭނާގެ ނަން ރަސްމީކޮށް ސޯފީ ބެލިންޑާ ޖޯނަސް އަށް ބަދަލުކޮށްފިއެވެ.
"ގޭމް އޮފް ތުރޯންސް" ގެ ބަތަލާ ސޯފީ 23، އާއި އެމެރިކަން ޕޮޕް ސްޓަރ ޖޯ ޖޯނަސް 29، ކައިވެނިކޮށްފައިވަނީ މިދިޔަ ބުދަ ދުވަހު ލަސް ވޭގަސް ގައި ހުންނަ މަޝްހޫރު ލިޓްލް ވައިޓް ޗަޕެލްގައެވެ.
ސޯފީ އާއި ޖޯ، ކައިވެނީގެ ރަސްމީ ހަފްލާ ވަރަށް އަވަހަށް ފްރާންސްގެ ވެރިރަށް ޕެރިހުގައި ބާއްވާނެ ކަމަށް ރިޕޯޓްތައް ބުނެއެވެ.
މި ދެ މީހުން ކައިވެނި ކުރާނީ މި އަހަރުގެ ފަހުކޮޅު ޕެރިހުގައި ކަމަށް ކުރިން ވަނީ އަޑުފެތުރިފައިވީ ނަމަވެސް މިދެމީހުންގެ ކައިވެނި ލަސް ވެގަސްގައި ކޮށްފައި މިވަނީ ސަޕްރައިޒެއްގެ ގޮތުގައެވެ.
މި ހަފްލާގައި ބައިވެރިވެފައި ވަނީ އާއިލާ އާއި ދެމީހުންގެ ގާތް ރައްޓެހިންނެވެ.
ޖޯ ވަނީ ބުރާސްފަތި ދުވަހު އޭނާގެ އިންސްޓަގްރާމްގައި ސޯފީގެ ޕޮޓޯއެއް ހިއްސާކޮށްފައެވެ. ފޮޓޯގެ ކެޕްޝަންގައި "ހޮޓް ޑޭމް" ލިޔެފައިވެއެވެ. މި ފޮޓޯއަކީ އެދެމީހުންގެ ކައިވެނީގެ ފޮޓޯއެއް ނޫން ނަމަވެސް އެދެމީހުންގެ ކައިވެނީގެ ފޮޓޯތަކައި ވީޑީއޯތައް ވަނީ އިންޓަނެޓް ގައި ދައުރުވާން ފަށާފައެވެ.
މިކައިވެނީގެ ބައެއް ފޮޓޯތަކުގައި އިންޑީއާގެ މަޝްހޫރު ފިލްމްމީތަރި ޖޯގެ ކޮއްކޮ ނިކްޖޯނަސްގެ އަންހެނުން ޕްރިޔަންކާ ޗޯޕްރާވެސް ފެނިގެންދެއެވެ.
ޕަރިޔަންކާ ވެސް ވަނީ އޭނާގެ ސޯޝަލް މީޑިއާ އެކައުންޓްތަކުގެ ނަން ކައިވެންޏަށްފަހު ޕަރިޔަންކާ ޗޯޕްރާ ޖޯނަސް އަށް ބަދަލުކޮށްފައެވެ.
