ޔޫރޮޕާ ލީގު: ޗެލްސީ އެއްވަރުވިއިރު، އާސެނަލް ފައިނަލާ ގާތަށް

ޔޫރޮޕާ ލީގުގައި ޗެލްސީ އެއްވަރުވިއިރު، އާސެނަލް ފައިނަލާ ގާތަށް ޖެހިލައިފިއެވެ.

ބުރާސްފަތި ދުވަހުގެ ރޭ ކުޅުނު ސެމީފައިނަލް ފުރަތަމަ ލެގުގެ މެޗުން ޗެލްސީ އެއްވަރުވީ ފްރެންކްފާޓްއާ ބައްދަލުކޮށް 1-1 ގެ ނަތީޖާއަކުންނެވެ.

ފްރެންކްފާޓް ދަނޑުގައި ކުޅުނު މި މެޗު ފެށިގެން ފުރަތަމަ ލަނޑު ޖަހާ ލީޑު ނެގީ އެ ޓީމުންނެވެ. މި ލަނޑު 23 ވަނަ މިނެޓުގައި އެޓީމަށް ކާމިޔާބުކޮށްދިނީ ލޫކާ ޖޮވިކްއެވެ.

މި ލަނޑާއެކު ޗެލްސީން ވަނީ އެޓީމުގެ އެޓޭކްތައް ވަރުގަދަކޮށް، ލަނޑު ޖެހުމަށް ފުލުފުލުގައި ގިނަ ފުރުސަތުތަކެއް ތަނަވަސްކޮށްފައެވެ. އެގޮތުން ފުރަތަމަ ހާފް ނިމުމުގެ ކުރިން އެޓީމުން ވަނީ ޕެޑްރޯ ރޮޑްރިގޭޒްގެ ލަނޑުން ނަތީޖާ ހަމަހަމަކޮށްފައެވެ.

ދެވަނަ ހާފް ފެށިގެންވެސް ޗެލްސީގެ ފަރާތުން މޮޅު ކުޅުމެއް ފެނިގެންދިޔައިރު، ލަނޑު ޖެހުމަށް އެޓީމަށް ވަނީ ހުސް ގިނަ ފުރުސަތުތަކެއް ލިބި ބޭކާރުވެފައެވެ.

މި ހާފްގައި ފްރެންކްފާޓްގެ ފަރާތުން މާގިނަ ހަމަލާތަކެއް ފެނިގެންނުދިޔަ ނަމަވެސް، އެޓީމުން ވަނީ ޗެލްސީ ހިފެހެއްޓުމަށް ބުރަ މަސައްކަތެއް ކޮށްފައެވެ. އެގޮތުން އެޓީމުން ވަނީ މޮޅު ޑިފެންސެއްކޮށް، ޗެލްސީގެ ގިނަ ހަމަލާތައް ހުއްޓުވާފައެވެ.

މި ދެ ޓީމު ބައްދަލުކުރާ ދެވަނަ ލެގުގެ މެޗު އޮންނާނީ މި މަހުގެ ނުވަ ވަނަ ދުވަހު ޗެލްސީ ދަނޑުގައެވެ. ފައިނަލުގެ ޖާގަ ކަށަވަރުކުރަން ބޭނުންނަމަ، މި މެޗު އެއް ލަނޑުގެ ތަފާތުން ޗެލްސީ ކާމިޔާބުކުރަންޖެހޭނެއެވެ.

ބުރާސްފަތި ދުވަހުގެ ރޭ ކުޅުނު ސެމީ ފައިނަލްގެ ފުރަތަމަ ލެގުގެ މެޗުން އާސެނަލް މޮޅުވީ ވެލެންސިއާއާ ވާދަކޮށް 1-3 ގެ ނަތީޖާއަކުންނެވެ.

އާސެނަލް ދަނޑުގައި ކުޅުނު މި މެޗު ފެށިގެން 11 ވަނަ މިނެޓުގައި ވެލެންސިއާއިން ވަނީ މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ މޮކްޓާ ޑިއާހްބީއެވެ.

ނަމަވެސް އާސެނަލްއިން ވަނީ އެޓީމުގެ ކުޅުން ރަނގަޅުކޮށް 18 ވަނަ މިނެޓުގައި ނަތީޖާ ހަމަހަމަކޮށްފައެވެ. މި ލަނޑު ކާމިޔާބުކޮށްދިނީ އެލެގްޒެންޑްރާ ލަކަޒޭޓްއެވެ.

މި ލަނޑަށްފަހު އާސެނަލްއިން އެޓީމުގެ ކުޅުން ވަރުގަދަކޮށްފައިވާއިރު، 26 ވަނަ މިނެޓުގައި އެޓީމުން ވަނީ ލީޑު ފުޅާކޮށްފައެވެ. މި ލަނޑުވެސް ކާމިޔާބުކުރީ ލަކަޒޭޓްއެވެ.

ދެ ވަނަ ހާފްގައި ވެލެންސިއާގެ ފަރާތުން މަދުން ނަމަވެސް ހަމަލާތައް ފެނިގެންދިޔަ ނަމަވެސް، ލަނޑު ޖެހުމަށް މާ އެދެވޭ ފުރުސަތުތަކެއް އެ ޓީމަށް ހޯދިފައެއް ނުވެއެވެ. އަދި ލިބުނު ފުރުސަތުގެ ބޭނުން ވެސް އެ ޓީމަށް އެންމެ ރަނގަޅަށް ބޭނުން ނުކުރެވެއެވެ.

މެޗުގެ އިތުރު ވަގުތުގައި އާސެނަލްގެ ތިން ވަނަ ލަނޑު ކާމިޔާބު ކުރީ އެމެރިކް އޮބަމަޔަންގްއެވެ.

މި ދެޓީމު ބައްދަލުކުރާ ދެވަނަ ލެގުގެ މެޗު އޮންނާނީ މި މަހުގެ ނުވަ ވަނަ ދުވަހު ވެލެންސިއާ ދަނޑުގައެވެ. ފައިނަލުން ޖާގަ ހޯދަން ބޭނުންވާނަމަ، މި މެޗު ވެލެންސިއާއިން ދެ ލަނޑުގެ ތަފާތުން ކާމިޔާބުކުރަންޖެހޭނެއެވެ.