ނަގުދު ފާއިސާއަށް ބަރޯސާވެފައި އޮންނަންޖެހޭ މިންވަރު މަތިވުމަކީ ކަންބޮޑުވާ ކަމެއް: ގަވަނަރ
ޔޫއެސް ޑޮލަރުގެ ޑިޕޮސިޓް އިތުރުވުމަކީ ކަންބޮޑުވާންޖެހޭ ކަމެއް
އެމްއެމްއޭއިން ބޭއްވި ނޫސްވެރިންގެ ބައްދަލުވުން
ރާއްޖޭގައި މިއޮތީ ޓޮލަރައިޒްޑް އިކޮނޮމީއެއް ކަމަށާއި ނަގުދު ފާއިސާއަށް ބަރޯސާވެފައި އޮންނަންޖެހޭ މިންވަރު މަތިވުމަކީ ކަންބޮޑުވާ ކަމެއް ކަމަށް ގަވަނަރ އަހްމަދު ނަސީރު ވިދާޅުވެއްޖެއެވެ.
މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ 2018 ވަނަ އަހަރުގެ އަހަރީ ރިޕޯޓް އާންމު ކުރުމަށް ފަހު ނޫސްވެރިންނާ ވާހަކަ ދައްކަވަމުން ގަވަނަރ ނަސީރު ވިދާޅުވީ ރާއްޖޭގެ އިޤްތިޞާދަކީ ޔޫއެސް ޑޮލަރަށް ވަރަށް ބޮޑަށް ބަރޯސާވާ އިޤްތިޞާދެއް ކަމަށާއި ރާއްޖޭގެ ބޭންކްތަކުގެ ފަންސާސް އިންސައްތަ ވުރެ ޑޮލަރުގެ ޑިޕޮސިޓް ބޮޑު ކަމަށެވެ. އެހެންކަމުން ދިވެހި ރުފިޔާއަށްވުރެ، ޔޫއެސް ޑޮލަރުގެ ޑިޕޮސިޓް އިތުރުވުމަކީ ކަންބޮޑުވާންޖެހޭ ކަމެއް ކަމަށް ގަވަނަރ ވިދާޅުވިއެވެ.
ނިމިދިޔަ އަހަރު ހާސިލްކުރެވުނު އެންމެ ބޮޑު ލަނޑުދަނޑިއަކީ ދިވެހި ރުފިޔާގެ އަގު އެއް ހަމައެއްގައި ހިފެހެއްޓިވުމާއި އެކްސްޗޭންޖް ރޭޓެއް ވަރެއްގައި ހިފެހެއްޓުމާއި އަދި އިންފްލޭޝަން ރޭޓް ވެސް އެއްވަރެއްގައި ހިފެހެއްޓިފައި އޮތް އޮތުން ގަވަނަރ ވަނީ ފާހަގަކުރައްވާފައެވެ.
ރާއްޖެއިން ބޭރަށް ފައިސާ ފޮނުވުމުގެ ޚިދުމަތްދޭ ކުންފުނިތައް މެދުވެރިކޮށް މިދިޔަ އަހަރު ރާއްޖެއިން ބޭރަށް 5.64 މިލިއަން ޔޫއެސް ޑޮލަރު ފޮނުވާފައިވާ ކަމަށް އެމްއެމްއޭ އިން ވަނީ ބުނެފައެވެ.
އަހަރީ ރިޕޯޓުގައި ބުނެފައި ވަނީ 2017 ވަނަ އަހަރު ރެމިޓަންސް ކުންފުނިތައް މެދުވެރިކޮށް ރާއްޖެއިން ބޭރަށް ފޮނުވާފައިވާ ފައިސާގެ %71 ބިދޭސީން ފޮނުވާފައިވާއިރު، 2018 ވަނަ އަހަރު ބިދޭސީން ފޮނުވާފައި ވަނީ %52 އެވެ. އަދި ސަރުކާރު ހިއްސާވާ ކުންފުނިތަކުގެ އިތުރުން، އެމްއެމްއޭ އިން މިދިއަ އަހަރުގެ ތެރޭގައި ވިޔަފާރި ބޭންކުތަކަށް ވެސް ބޭރު ފައިސާ ފޯރުކޮށްދިނެވެ. އެގޮތުން 2018 ވަނަ އަހަރުގެ ތެރޭ ވިޔަފާރި ބޭންކުތަކަށް 230.8 މިލިއަން އެމެރިކާ ޑޮލަރު ވިއްކާފައިވާ ކަމަށް ހިސާބުތަކުން ދައްކައެވެ.
މި ޖުމުލަ އަދަދުގެ ތެރޭގައި، ވިޔަފާރި ބޭންކުތަކުގެ ބޭނުންތަކަށް ގަވާއިދުން ކޮންމެ ހަފުތާއަކު ވިއްކާ އެމެރިކާ ޑޮލަރާއި، ތައުލީމް ހާސިލް ކުރުމަށާއި ބޭސް ފަރުވާއަށް ރާއްޖެއިން ބޭރަށް ދަތުރުކުރި ދިވެހިންނަށް ފޯރުކޮށްދިން ޑޮލަރު ހިމެނެއެވެ.
އަހަރީ ރިޕޯޓުން ދައްކާ ގޮތުން މިދިޔަ އަހަރު ނިމުނު އިރު އިގްތިސާދުގައި ދައުރުވި ޖުމްލަ ފައިސާގެ އަދަދު 33.1 ބިލިއަން ރުފިޔާއަށް ވަނީ އަރާފައެވެ. ޖުމްލަ ފައިސާ އިތުރުވެފައި ވަނީ ބޭންކިން ނިޒާމުގެ ނެޓް ޑޮމެސްޓިކް އެސެޓް އިތުރުވުމުގެ ސަބަބުންނެވެ.
މިދިޔަ އަހަރު ނިމުނު އިރު ސަރުކާރުން ބޭންކިން ނިޒާމަށް އަދާކުރަންޖެހޭ ފައިސާގެ ސާފު ބާކީ އަދަދަކީ 13 ބިލިއަން ރުފިޔާގައި ހުރި އިރު، މިއީ އޭގެ ކުރީ އަހަރާ އަޅާ ބަލާ އިރު 11 ޕަސެންޓް އިތުރު އަދަދެކެވެ.
