އެންމެ ކުޑަ އުޖޫރަ ކަނޑައެޅުމަށް ލަފާދޭ ކޮމިޓީއެއް އުފައްދައިފި
ބޯޑުގައި ފަސް މެމްބަރަކު ހިމެނޭ
އެންމެ ކުޑަ އުޖޫރަ ކަނޑައެޅުމަށް ލަފާދޭ ކޮމިޓީއެއް އުފައްދާފައި ވަނީ ބުދަ ދުވަހު
ބައިނަލްއަގްވާމީގޮތުން ފާހަގަ ކުރަމުންދާ ދުނިޔޭގެ މަސައްކަތްތެރިންގެ ދުވަހު، މަސައްކަތްތެރިންނަށް އެންމެ ކުޑަ އުޖޫރަ ކަނޑައަޅާނެ ގޮތާ މެދު ލަފާދޭނެ ކޮމިޓީއެއް ''ސެލެރީސް އެންޑް ވޭޖްސް އެޑްވައިޒަރީ ބޯޑް''ގެ ނަމުގައި ބޯޑެއް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އެކުލަވައިލައިފިއެވެ.
މަސައްކަތްތެރިންގެ ދުވަހާއި ގުޅިގެން ރައީސް ސޯލިހް ކުރެއްވި ޓުވީޓެއްގައި ވިދާޅުވީ މޭޑޭ އާއި ދިމާކޮށް މަސައްކަތްކުރާ މުވައްޒިފުންނަށް މުސާރައިގެ ގޮތުގައި އެންމެ ކުޑަ މިންވަރު ކަނޑައެޅުމަށްޓަކައި އިކޮނޮމިކް މިނިސްޓަރަށް ލަފާ ދެއްވުމަށް ''ސެލެރީސް އެންޑް ވޭޖްސް އެޑްވައިޒަރީ ބޯޑް'' މިއަދު އެކުލަވާލުމަކީ ލިބުނު ވަރަށް ބޮޑު އުފަލެއް ކަމަށެވެ.
މިނިސްޓަރ އޮފް އިކޮނޮމިކް ޑިވެލޮޕްމަންޓް ފައްޔާޒް އިސްމާއިލް ކުރެއްވި ޓްވީޓެއްގައި ވިދާޅުވި، ފަސް މެމްބަރުންގެ މައްޗަށް ހިމެނޭ އެ ބޯޑު ގައި އިންޑަސްޓްރީ ތަކުގައި މަސައްކަތް ކުރާ ފަރާތްތަކުގެ އިތުރުން މަސައްކަތްތެރިންގެ ފަރާތުން 2 މެމްބަރަކު ހިމޭނެ ކަމަށެވެ. އަދި ސަރުކާރުގެ ފަރާތުން އެއް މެމްބަރަކު ބޯޑުގައި ހިމެނިވަޑައިގަންނަވާނެ ކަމަށް އިކޮނޮމިކް މިނިސްޓަރުގެ ޓްވީޓްގައި ވިދާޅުވިއެވެ.
މިނިސްޓަރު ފައްޔާޒު ވިދާޅުވީ، އެ ބޯޑު މެދުވެރިކޮށް ރަނގަޅު ނަތިއްޖާއެއް ނިކުންނާނެ ކަމަށެވެ.
ބޯޑަށް ރައީސުލްޖުމްހޫރިއްޔާ އައްޔަނު ކުރެއްވި ބޭފުޅުންނަކީ:
- މަރްޔަމް ޚާލިދާ، ގ. ސިލްވަރުގެ
- އިބްރާހީމް ނޫރައްދީން، މއ. މާންދޫގެ
- މުޙައްމަދު ޢަލީ ޖަނާޙް، ހ. ސީސައިޑް
- ޢަލީ އާދަމް، ޗާނދަނީގެ / ހއ. ހޯރަފުށި
- މަޢުރޫފް ޛާކިރު، ދާއިރާ / ބ. ކެންދޫ
މިނިމަމް ވޭޖްއަށް ލަފާދޭ ކޮމިޓީއެއް ހަމަޖައްސާފައިވާއިރު، ދައުލަތުގެ މުއައްޒަފުންގެ މުސާރަ އެއްހަމަ ކުރުމަށްޓަކައި ''ޕޭ ކޮމިޝަނެއް'' ވެސް ވަނީ އުފައްދާފައެވެ.
