ޒިންމާދާރު ރައްޔިތުން ބިނާކުރުމުގެ ބައްދަލުވުން ފަށައިފި
ބައްދަލުވުން ފައްޓަވައިދެއްވީ ހޯމް މިނިސްޓަރު
ޒިންމާދާރު ރައްޔިތުން ބިނާކުރުމުގެ 12 ވަނަ މަސައްކަތު ބައްދަލުވުމުގައި ހޯމް މިނިސްޓަރު ވާހަކަ ދައްކަވަނީ
ޒިންމާދާރު ރައްޔިތުން ބިނާކުރުމުގެ 12 ވަނަ މަސައްކަތު ބައްދަލުވުން ބުދަ ދުވަހު ފަށައިފިއެވެ.
މި ބައްދަލުވުން ފައްޓަވައި ދެއްވީ މިނިސްޓަރ އޮފް ހޯމް އެފެއާޒް ޢިމްރާން ޢަބްދުﷲ އެވެ.
ރ.އަތޮޅުގެ ރަށްރަށަށް އަމާޒު ކޮށްގެން މި މަސައްކަތު ބައްދަލުވުން ބާއްވަނީ އުނގޫފާރުގައެވެ. ބައްދަލުވުން އަމާޒުކޮށްފައި ވަނީ، ރ.އަތޮޅުގެ ކައުންސިލް މެމްބަރުންނަށާއި، ރަށު ކައުންސިލްތަކުގެ މެމްބަރުންނަށާއި، ޒިންމާދާރު ވެރިންގެ އިތުރުން ހަރަކާތްތެރި ޖަމްއިއްޔާތަކުގެ އިތުރުން އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެމްބަރުން ކަމަށް ހޯމް މިނިސްޓްރީން ބުންޏެވެ.
އެ މަސައްކަތު ބައްދަލުވުމުގެ ބޭނުމަކީ އަމާންވެއްޓެއް ޤާއިމް ކުރުމާއި، ރައްޔިތު މީހާ އަކީ ޒިންމާދާރު މީހަކަށް ހެދުމަށް މަސައްކަތް ކުރުމާއި، ފަރުދީ ޒިންމާ ނަގަން ހިތްވަރު ދިނުމުގެ އިތުރުން ޒިންމާދާރު ގޮތެއްގައި ރަށު އަދި އަތޮޅު ފެންވަރުގައި މަސައްކަތްކުރުމުގެ މުޙިންމުކަން އަންގައިދިނުން ކަމަށް ހޯމް މިނިސްޓްރީން މައުލޫމާތުދެއެވެ.
ޒިންމާދާރު ރައްޔިތުން ބިނާކުރުމުގެ 12 ވަނަ މަސައްކަތު ބައްދަލުވުން ތެރެއިން. ފޮޓޯ: ހޯމް މިނިސްޓްރީ
އެ ބައްދަލުވުމުގައި ވާހަކަ ދައްކަވަމުން ހޯމް މިނިސްޓަރު ވިދާޅުވީ، އެ ބައްދަލުވުމަކީ ގައުމުގެ މުސްތަޤްބަލަށް ފަށާ ބައްދަލުވުމެއް ކަމަށާއި، ރައްޔިތުން އެކަމުގައި އެމީހެއްގެ ޒިންމާ ފުރިހަމައަށް އަދާކުރުމަށް ފަށާ ބައްދަލުވުމެއް ކަމަށެވެ.
ޢިމްރާން ވިދާޅުވީ، ވަރަށް ގިނަ ޒިންމާ އަދާކުރަން އެބައޮތްކަން ކޮންމެ މީހަކު ވެސް ޤަބޫލުކުރަން ޖެހޭ ކަމަށާއި، އެޒިންމާތަކުގެ ކުރިމަތީގައި ކޮންމެ ދުވަހަކު އަމިއްލަ ނަފްސާ ސުވާލުކޮށްލަން ވެސް ޖެހޭ ކަމަށެވެ.
އާއިލާތަކުގެ ބަދަހިކަމާއި، އާއިލާތަކުގެ އުފާވެރިކަން ވެސް ބިނާވަނީ ޒިންމާއަދާކުރުމުގެ މައްޗަށް ކަމަށާއި، އެހެންކަމުން އެ ހުރިހާ ކަމަކާ މެދު ފުންކޮށް ވިސްނަން ޖެހޭ ކަމަށް މިނިސްޓަރ ވިދާޅުވިއެވެ.
