ކުރީގެ މެމްބަރުންނަށް އިތުރު އިނާޔަތް ދޭ ބިލާ އެމްޑީޕީ ދެކޮޅު: އީވާ

ރައްޔިތުންގެ މަޖިލީހުގެ މެމްބަރުކަމުން ވަކިވުމުން، މެމްބަރުންނަށް ދޭ މުސާރައިން ވަކި ނިސްބަތެއް ދިނުމަށާއި އިނާޔަތްތައް މެދުނުކެނޑި ލިބޭ ގޮތަށް ރައްޔިތުންގެ މަޖިލީހުގެ އިމްތިޔާޒުތަކާއި ބާރުތަކުގެ ގާނޫނަށް ހުށަހެޅި އިސްލާހު ފާސްކުރަން އެމްޑީޕީން ވޯޓު ނުދޭނެ ކަމަށް އެ ޕާޓީގެ ޕާލަމެންޓްރީ ގްރޫޕްގެ ގަލޮޅު އުތުރު ދާއިރާގެ މެމްބަރު އީވާ އަބްދުﷲ ވިދާޅުވެއްޖެއެވެ.

ރައްޔިތުންގެ މަޖިލީހުގެ މެމްބަރުންނަށް މިހާރު ލިބޭ އިނާޔަތް، މެމްބަރުކަމުން ވަކިވުމުން ވެސް ލިބޭ ގޮތަށް ރައްޔިތުންގެ މަޖިލީހަށް އިސްލާހު ހުށަހެޅުއްވީ އިންތިހާބުން ނާކާމިޔާބުވެވަޑައިގެންނެވި ދިއްދޫ ދާއިރާގެ މެމްބަރު އަބްދުއްލަތީފު މުހައްމަދާއި ތިމަރަފުށީ ދާއިރާގެ މެމްބަރު މުހައްމަދު މުސްތަފާއެވެ. ދެ ދެ މެމްބަރުން ވަނީ އިމްތިޔާޒުގެ ގާނޫނަށް އިސްލާހު ގެނައުމަށް ވަކިވަކިން ތިން ބިލެއް ހުށަހަޅާފައެވެ.

އެ އިސްލާހުތަކަށް އެމްޑީޕީން ވޯޓު ނުދޭނެ ކަމަށް އީވާ ވިދާޅުވީ އޭނާ ހޯމަ ދުވަހު ކުރެއްވި ޓްވީޓެއްގައެވެ.

ލަތީފު ހުށަހެޅުއްވި އިސްލާހުގައި ބުނެފައި ވަނީ މެމްބަރުކަމުން ވަކިވުމުން މުސާރައިގެ ވަކި ޕަސެންޓެއް ދޭންޖެހޭނެ ކަމަށެވެ. ނަމަވެސް މިހާރު ގާނޫނުގައި ބުނެފައިވާ ގޮތުން އެ އިނާޔަތް ލިބޭނީ މެމްބަރުކަމުން ވަކިވުމަށް ފަހު، އުމުރުން 55 އަހަރު ވުމުން ކަމަށެވެ.

ލަތީފު ހުށަހެޅުއްވި އިސްލާހު ފާސްވެއްޖެ ނަމަ، މަޖިލީހުގައި އެއް ދައުރުގެ މެމްބަރުކަން އަދާކުރައްވާފައިވާ މީހަކަށް މެމްބަރުންނަށް ލިބޭ މުސާރައިގެ 30 ޕަސެންޓް ލިބޭނެއެވެ. އަދި ދެ ދައުރު އަދާކުރައްވާފައިވާ މެމްބަރުންގެ ތެރެއިން ގޮނޑި ދިފާއު ނުކުރެވި މެމްބަރުކަމުން ވަކިވި މެމްބަރުންނަށް މެމްބަރެއްގެ މުސާރައިގެ 45 ޕަސެންޓް ލިބޭނެއެވެ.

ލަތީފު ހުށަހެޅުއްވި އިސްލާހުގައި ބުނެފައި ވަނީ މެމްބަރުކަން ކޮށްފައިވާ ކޮންމެ މީހަކަށާއި އޭނާގެ ފިރިމީހާ ނުވަތަ އަނބިމީހާއަށް ޑިޕްލޮމެޓިކް ޕާސްޕޯޓް ހަމަޖައްސަން ޖެހޭނެ ކަމަށެވެ. ނަމަވެސް ގާނޫނުގައި މިހާރު ބުނެފައި ވަނީ މެމްބަރުކަން ކުރައްވާފައިވާ މީހުންނަށް ލިބޭނީ އޮފިޝަލް ޕާސްޕޯޓް ކަމަށެވެ.

ރައްޔިތުންގެ މަޖިލީހުގެ ރައީސާއި ނައިބު ރައީސްގެ މަގާމު އަދާ ކުރައްވާފައިވާ މީހުންނަށް ވެސް ހެލްތު އިންޝުއަރެންސާއި ޑިޕްލޮމެޓިކް ޕާސްޕޯޓް ލިބޭނެ އިންތިޒާމް ހަމަޖައްސަންވާނެ ކަމަށް ވެސް އެ އިސްލާހުގައި ވެއެވެ.

ތިމަރަފުށީ ދާއިރާގެ މެމްބަރު މުސްތަފާ ހުށަހެޅުއްވި އިސްލާހުގައި ބުނެފައި ވަނީ މަޖިލީހުގެ މެމްބަރުކަން ކުރައްވާފައިވާ ކޮންމެ މީހަކަށް އެއާޕޯޓް ވީއައިޕީ ސާވިސް ދައުލަތުން ހަމަޖައްސަންވާނެ ކަމަށެވެ.

ރައްޔިތުންގެ މަޖިލީހުގެ މެމްބަރުކަން ކުރައްވާ ފަރާތްތަކަށް މަގާމުގެ މުއްދަތުގެ ތެރޭގައި ލިބޭ އިނާޔަތް، މެމްބަރުކަމުން ވަކިވިޔަސް މެދުނުކެނޑި ލިބޭނެ ގޮތަށް އިސްލާހު ހުށަހަޅާފައި ވަނީ މިހާރު ތިއްބެވި މެމްބަރުންގެ މަގާމުގެ މުއްދަތު ހަމަވާން 30 ދުވަހަށްވެފައި ވަނިކޮށެވެ. އަށާރަ ވަނަ ރައްޔިތުންގެ މަޖިލީހުގެ މެމްބަރުންގެ ތެރެއިން ގޮނޑި ދިފާއު ނުކުރެވި ނާކާމިޔާބުވި މެމްބަރުންގެ އަދަދު 60 އަށް ވުރެ ގިނައެވެ.