201 ގައިދީއެއްގެ އަދަބު ލުއިކޮށްދީފި
22 އެޕްރީލު 2019 | ހޯމަ 06:10އަދަބު ލުއިކޮށްފައިވަނީ ޝަރުތު ތަކަކާއި އެކު
ޖަލުގެ ގައިދިންތަކެއް
ޖަލުގައި ހުކުމް ތަންފީޒު ކުރަމުންދާ 201 ގައިދީއެއްގެ އަދަބު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ލުއި ކޮށްދީފިއެވެ.
ރައީސް އޮފީހުގެ ތަރުޖަމާނު އިބްރާހިމް ހޫދު ރާއްޖެ.އެމްވީ އަށް ވިދާޅުވީ، އަދަބު ލުއިކޮށްދީފައިވަނީ ޝަރުތުތަކާއި އެކު ކަމަށެވެ. އޭގެ ތެރޭގައި ހުކުމުގެ ހަތަރުބައިކުޅަ އެއްބައި ފުރިހަމަވުމާއި އަހްލާގު ރަނގަޅުވާން ޖެހެއެވެ.
އަދި އޭގެ އިތުރުން ރިހެބިލިޓޭޝަން ފްރޮގްރާމް ފުރިހަމަ ކުރުން ހިމެނޭ ކަމަށް ހޫދު ވިދާޅުވިއެވެ. އަދި މަސްތުވާތަކެތީގެ މައްސަލަތަކުގައި ހުކުމް ތަންފީޒު ކުރަމުން ދިޔަ ފަރާތްތަކުގެ އަދަބު ލުއިކޮށްދީފައިވަނީ ދިރިއުޅޭ ތަންތަން ކޯޓު އަމުރެއްނެތި ފުލުހުންނަށް ބަލާފާސްކުރެވޭނެ ކަމަށް އެންގުމަށް ފަހު ކަމަށް ހޫދޫ ވަނީ ވިދާޅުވެފައެވެ.
ގައިދީންނަށް އަދަބު ލުއިކޮށްދިނުމުގެ ގަވައިދަށް ބަދަލު ގެނެސްފައިވަނީ ކުރީގެ ރައީސް ޔާމީންގެ ސަރުކާރުގައެވެ. އޭރު އެ ގަވާއިދަށް ގެނައި އިސްލާހުގައިވާ ގޮތުން ޖިނާއީ ކުށެއްގެ މައްސަލާގައި ޝަރުއީ ކޯޓަކުން ހުކުމް ކޮށްފައިވާނަމަ ގަވައިދުގެ ހަތަރު ވަނަ މާއްދާގެ (ހ)ގައި ބަޔާން ކޮށްފައިވާ ކުށެއްގެ ދައުވާ އަކަށް ނުވެފައި ދައުވާ އުފުލި ތާރީހުން ފެށިގެން ހުކުމް ނުކުރެވި މީލާދީ ގޮތުން އެއް އަހަރު ފާއިތުވެއްޖެ ނަމަ އެ މީހަކީ އެ ކުށުގެ އަދަބަށް ލުއި ލިބުމަށް ޝަރުތު ހަމަވާ މީހެއް ކަމަށެވެ.
