ރޯދަމަހު އުނގޫފާރު ގެތަކަށް ކަރަންޓު ހިލޭ ދިނުމަށް ނިންމައިފި
22 އެޕްރީލު 2019 | ހޯމަ 05:14ވީވަރަކުން ކަރަންޓް ހަރަދު ކުޑަކުރުމަށް ވަނީ އެދިފައި
ރ.އުނގޫފާރު
މިއަހަރުގެ ރޯދަމަހަށް ރ.އުނގޫފާރުގެ ގެތަކަށް ކަރަންޓު ހިލޭ ދިނުމަށް ނިންމައިފިއެވެ.
އުނގޫފާރު ކައުންސިލުން ބުނީ އެހެން އަހަރުތަކެކޭ ވެސް އެއްފަދައިން މިއަހަރުގެ ރަމަޟާން މަހު ވެސް ރައްޔިތުންގެ އިންޖީނުގެއިން ދެމުންދާ ކަރަންޓުގެ ޚިދުމަތް ގޭބިސީތަކަށް ހިލޭ ދިނުމަށް ނިންމާފައިފާ ކަމަށާއި، މިނިންމުން ނިންމީ ކައުންސިލްގެ ލަފާދޭ ކޮމެޓީގެ މަޝްވަރާއާއެކު ކަމަށެވެ.
އެގޮތުން ކަރަންޓު ހިލޭ ދިނުމަށް ނިންމާފައިވަނީ 06 މެއި 2019 ން 2019 ޖޫން މަހުގެ ނިޔަލަށެވެ.
ކައުންސިލުން ބުނީ ވީވަރަކުން ކަރަންޓް ހަރަދު ކުޑަ ކުރުމަށް ވިސްނުން ބެހެއްޓުމަކީ ކައުންސިލްގެ ވަރަށް ބޮޑު އެދުމެއް ކަމަށެވެ. އަދި ބޭކާރުގޮތުގައި ކަރަންޓުގެ ބޭނުން ނުކުރުމަށް އެންމެހާ ރައްޔިތުންނަށް ކައުންސިލުން ވަނީ ނަސޭހަތްތެރިވެފައެވެ. އަދި ކައުންސިލް އެދޭ ކަންކަމުގައި އާއްމު ރައްޔިތުންގެ ފަރާތުން ލިބޭ އެއްބާރުލުމަށް ވެސް ކައުންސިލުން ވަނީ ޝުކުރު އަދާކޮށްފައެވެ.
މީގެ އިތުރުން އުނގޫފާރު ކައުންސިލުން ބުނީ ސަރުކާރުން ކަރަންޓުގެ ޚިދުމަތުގެ އަގަށް ގެނެސްފައިވާ ބަދަލާ ގުޅިގެން ކައުންސިލުން ބަލަންޖެހޭ ކަންކަން ބެލުމަށްފަހު ކަރަންޓުގެ އަގަށް ބަދަލެއް ގެންނަނަމަ އެކަން ޖުލައިގެ ކުރިން އާންމުކޮށް އިއުލާން ކުރާނެ ކަމަށެވެ.
