ރާއްޖޭގައި ހިނގަމުންދާ މަގުމަތީގެ އެކްސިޑެންޓްތަކަކީ މިހާރު ދިމާވެފެއިވާ އެންމެ ބޮޑު އެއް ޑިޒާސްޓަރ ކަމަށާއި މިކަމާމެދު ޒުވާނުން ފުންކޮށް ވިސްނަން ޖެހޭ ކަމަށް ނައިބު ރައީސް ފައިސަލް ނަސީމް ވިދާޅުވެއްޖެ އެވެ.
ގައުމީ ރޯޑް ސޭފްޓީ އެކްޝަން ޕްލޭން އިފްތިތާހު ކުރުމުގެ ރަސްމިއްޔާތުގައި ފައިސަލް ވިދާޅުވީ އެކްސިޑެންޓްތައް ހިނގާ މިންވަރު އިތުރުވުމަކީ ހަގީގަތުގައި ވަރަށް ފުންކޮށް ވިސްނައި އިތުރު ފިޔަވަޅުތައް އަޅަންޖެހިފައިވާ ކަމެއް ކަމަށެވެ.
''ބޮޑު އިންސައްތައެއް މާލެ ސަރަހައްދުން ފެނިގެންދިޔަ ނަމަވެސް ރާއްޖޭގައި ގިނަ ހިސާބުތަކުގައި ވަކިން ޚާއްސަކޮށް ބޮޑެތި ރަށްތަކުގަ އެކްސިޑެންޓްތައް ހިނގަނީ މަދަކުން ނޫނޭ. އަޅުގަނޑުމެން މިއަދު ރާއްޖޭގެ ރަށްތަކުގައި ފަސޭހަކަމާއެކު ދުއްވާ ލެވޭ ގޮތަށް މަގުތަކާ އެއްޗެހި ހަދަމުންދާއިރު މިއީ ފުންކޮށް ވިސްނަން ޖެހޭކަމެއް.'' ފައިސަލް ވިދާޅުވިއެވެ.
ފައިސަލް ވިދާޅުވީ ފަސޭހަކަން ގެންނަނީ ހިތާމައާ ކުރިމަތިލާން ނޫން ކަމަށާއި، މަގުތައް ޒަމާނީ ފެންވަރަށް ހަދަމުންދާއިރު، އެމަގުތައް ބޭނުންކުރަން ޖެހޭނީ ބޭނުންކުރާ މީހާގެ އިތުރުން އެހެން މީހުންނަށް ހިތްދަތިކަން ނުލިބޭ ގޮތަށް ބަލައިގެން ކަމަށެވެ.
ޒުވާނުން ބޮޑަށް ވިސްނަންޖެހޭކަން ފާހަގަކުރައްވައި ފައިސަލް ވިދާޅުވީ ކޮންމެ މަންމަ އާއި ބައްޕައަކުގެ އެމީހެއްގެ ދަރިއާއި މެދު ފޮނި މުސްތަގުބަލެއް އުއްމީދު ކުރާ ކަމަށެވެ.
''ތަފާސްހިސާބުތަކުން ވެސް އަބަދު ވެސް އަޅުގަނޑުމެންނަށް ފެނިގެން އެބަދޭ ގާތްގަނޑަކަށް އުމުރުން 18 އަހަރާއި 35 އަހަރާއި ދެމެދުގެ ގިނަ އަދަދެއްގެ ޒުވާނުން، ގިނަ އެކްސިޑެންޓްތަކުގައި ގިނަ އަނިޔާތައް ލިބިފައިވާކަން. ވަރަށް ލޯތްބާއެކު އެފާރާތްކުގެ ކިބައިން މިއެދެނީ މިކަންތައްތަކާއި ތިޔަ ޒުވާނުން ފުރިހަމައަށް ވިސްނަވާށޭ،'' ފައިސަލް ވިދާޅުވިއެވެ.
ފައިސަލް ވިދާޅުވީ މަގުމަތި ބޭނުންކުރާއިރު އެހެން މީހުންނާ މެދު ވެސް ވިސްނަންޖެހޭ ކަމަށާއި، ދުއްވާ މީހުން މަގު ހިނގާ މީހުންނާ ދޭތެރޭގައި ވިސްނަން އެބަޖެހޭ ކަމަށެވެ. ހިނގާ މީހުން ދުއްވާ މީހުންނަށް ތަން ދޭންޖެހޭ ކަމަށް ވެސް އެ މަނިކުފާނު ވިދާޅުވިއެވެ.
![](https://dyncz33htw1ec.cloudfront.net/posts/1536607731.jpg)
ފައިސަލް ވިދާޅުވީ އަޅުގަނޑުމެންނަކީ ދޫދޭންޖެހޭ ބަޔަކަށްވާންޖެހޭއިރު، ލަސްވެގެން މީހަކު ކުރިއަރައިގެންދާ ވަގުތު އެމީހަކަށް ޖާގަ ދޭންޖެހޭ ކަމަށެވެ. ނަމަވެސް އަމަލުތައް ހުންނަ ގޮތުން އެކަމަށް ދެރަވެ، ހިތާމަކޮށް އަދި ބައެއް ފަހަރު ފަހަރު ލަދު ގަންނަޖެހޭ މަންޒަރުތައް ވެސް މަގުމަތިން ފެނިގެންދާ ކަމަށް ފައިސަލް ވިދާޅުވިއެވެ.
މަގުހުރަސް ކުރުމަށް ވަކި ސަރަހައްދެއް ކަނޑައަޅައި ކުލަ ގަދަކޮށް އެތަން ފާހަގަކޮށްފައި އޮންނައިރު ވެސް ގިނަ ފަހަރު މަގު ހުރަސް ކުރާ ފަރާތްތަކަށް ފުރުސަތު ނުދެވިދާ ކަން ފާހަގަ ކުރައްވައި ފައިސަލް ވިދާޅުވީ އެއީ ލަދު ގަންނަންޖެހޭ ކަމެއް ކަމަށެވެ. އަދި ވިދާޅުވީ މަގުހުރަސްކުރާ ތަނުގެ 6 ފޫޓު ދުރުން ވެސް ހަމަ ހުރަސްކޮށްލާ މަންޒަރު ފެންނަ ކަމަށާއި، މިއީ ހިނގާ މީހުން މަގު ބޭނުން ކުރުމުގައި ސަމާލުކަން ދޭންޖެހޭ ކަމެއް ކަމަށެވެ.
ފައިސަލް ވިދާޅުވީ ދިވެހި ރައްޔިތުން ބައެއްގެ އާދަތައް ރަނގަޅުކޮށް، އެންމެނަށް ނަމޫނާ ދައްކާ ބަޔަކަށްވާންޖެހޭ ކަމަށެވެ.