މާލިއްޔަތު ކޮމިޓީން ދިރާސާކުރި 101 އޮޑިޓް ރިޕޯޓްގެ ތެރެއިން 30 ރިޕޯޓެއް މަޖިލީހުން ފާސްކޮށްފި
16 އެޕްރީލު 2019 | އަންގާރަ 09:39އޮޑިޓް ރިޕޯޓްތަކުގެ ތެރޭގައި ހިމެނެނީ 2007 ވަނަ އަހަރާއި 2012 ވަނަ އަހަރާ ދެމެދުގެ އޮޑިޓް ރިޕޯޓްތައް
ރައްޔިތުންގެ މަޖިލީހުގެ ޖަލްސާގެ ޗެމްބަރުގައި މެމްބަރުން
މާލިއްޔަތު ކޮމިޓީން ދިރާސާކުރި 101 އޮޑިޓް ރިޕޯޓްގެ ތެރެއިން 30 ރިޕޯޓެއް މަޖިލީހުން ފާސްކޮށްފިއެވެ.
މި އޮޑިޓް ރިޕޯޓްތަކުގެ ތެރޭގައި ހިމެނެނީ 2007 ވަނަ އަހަރުން ފެށިގެން 2012 ވަނަ އަހަރާއި ދެމެދުގެ ކައުންސިލް އިދާރާތަކުގެ އަދި ސަރުކާރުގެ ވުޒާރާތަކުގެ ރިޕޯޓްތަކެއެވެ.
ރިޕޯޓްތަކަށް ބަހުސްކުރުމަށް ހުޅުވާލި ފުރުސަތުގައި އެއްވެސް މެމްބަރަކު ބަހުސްކޮށްފައެއް ނުވެއެވެ. ރިޕޯޓްތަކަށް ޚިޔާލު ހުށަހެޅުމުގެ ފުރުސަތު މި މަހުގެ 15 ދުވަހު މެމްބަރުންނަށް ހުޅުވާލާފައިވާއިރު، އެއްވެސް މެމްބަރަކު ޚިޔާލު ހުށަހަޅުއްވާފައިނުވާ ކަމަށް މަޖިލީހުގެ ރިޔާސަތުން ވަނީ ވިދާޅުވެފައެވެ.
މި އޮޑިޓް ރިޕޯޓްތަކުގެ ތެރެއިން 33 ރިޕޯޓެއް ވަނީ ހޯމަ ދުވަހުގެ ޖަލްސާގައި ވެސް ފާސްކޮށްފައެވެ.
ގިނަ ދުވަސްތަކެއް ވެފައިވާ ރިޕޯރޓްތައް މާލިއްޔަތު ކޮމިޓީން ޖަލްސާއަށް ހުށަހެޅުން ބައެއް މެމްބަރުން ވަނީ އެކަމުގެ ކަންބޮޑުވުން ފާޅުކޮށްފައެވެ.
މާލިއްޔަތު ކޮމިޓީގެ މުގައްރިރު އަދި ކޮމަންޑޫ ދާއިރާ މެމްބަރު އަހްމަދު ނާޝިދު ވިދާޅުވީ ކޮމިޓީން ނިންމައި މަޖިލީހުގެ ޖަލްސާއަށް ހުށަހަޅާފައި ވަނީ މީގެ އެތައް އަހަރެއް ކުރީގެ އޮޑިޓް ރިޕޯޓްތައް ކަން ގަބޫލުކުރައްވާ ކަމަށެވެ. ނަމަވެސް އެ ހުރިހާ ރިޕޯޓްތަކަކީ ވެސް އެއްވެސް މައްސަލައެއް އޭގައި ނެތް އޮޑިޓް ރިޕޯޓްތައްކަން ނާޝިދު ވަނީ ފާހަގަކުރައްވާފައެވެ. ނާޝިދު ވިދާޅުވީ އޭނާ މާލިއްޔަތު ކޮމިޓީގެ މުގައްރިރުކަމާ ހަވާލުވެވަޑައިގެންނެވި ފަހުން މަސައްކަތް ކުރެއްވީ ކޮމިޓީގައި ފުނިޖެހިފައި އޮތް ރިޕޯޓްތައް ނިންމާލުމަށް ކަމަށެވެ.
މާލިއްޔަތު ކޮމިޓީގެ މުގައްރިރު ކަމަށް ނާޝިދު ކަނޑައެޅީ 26 ނޮވެމްބަރު 2018 ގައެވެ. އެއީ އޭރު ކޮމިޓީތަކައް މަޖިލީހުގައި މެމްބަރުން ތަމްސީލް ކުރައްވަމުން ގެންދެވި ޕާޓީ، ބައެއް މެންބަރުން ބަދަލުކުރެއްވުމާ ގުޅިގެން އެ ބަދަލާ އެކު މަޖިލީހުގެ ކޮމިޓީތައް ވެސް އަލުން އެކުލަވާލުމާ ގުޅިގެންނެވެ.
