އާދީއްތަ ދުވަހުން ފެށިގެން، ވިސާއާ ނުލައި 30 ދުވަހަށް ތައިލެންޑަށް ދިވެހިންނަށް ދަތުރުކުރެވޭނެ ގޮތް ހަމަޖައްސައިފިއެވެ.

ފޮރިން މިނިސްޓްރީން ބުނީ އެގޮތަށް ހަމަޖެއްސީ ދިވެހިންނަށް ލުއިފަސޭހަކޮށް އެކިޤައުމުތަކަށް ދަތުރުކުރެވޭނެ މަގުފަހިކުރުމަށް ސަރުކާރުން ކުރަމުންގެންދާ މަސައްކަތްތަކުގެ ދަށުން ތައިލެންޑާ އެކު ކުރެވުނު މަޝްވަރާތަކުގައި ކަމަށެވެ. އާދީއްތަ ދުވަހު ދިވެހިންގެ ވިސާ ޕޮލިސީއަށް ތައިލެންޑުން އަމަލުކުރަން ފެށުމުން، އެ ގައުމަށް ދަތުރު ކުރާ ދިވެހިން ސަމާލުވާންޖެހޭ ކަންކަން ފޮރިން މިނިސްޓްރީން ވަނީ އާންމުކޮށްފައެވެ.

އެގޮތުން މުއްދަތު ހަމަނުވާ ޕާސްޕޯޓާއި ފުރިހަމަކުރެވިފައިވާ އެރައިވަލް ކާޑާއި އެކަށީގެންވާ އަދަދަށް ހަރަދު ކުރާނެ ފައިސާ އާއި ރިޓާން ޓިކެޓް ހަދާފައި އޮންނަންވާނެއެވެ. ފައިސާގެ ގޮތުގައި މަދުވެގެން ގެންދަން ޖެހޭނީ އެކަކަށް ނަމަ 20،000 ބާތު (632 ޑޮލަރު) އެވެ. އާއިލާއަކަށް ނަމަ، 40,000 ބާތު (12,64 ޑޮލަރު) ގެންދަންޖެހޭނެ ކަމަށް ފޮރިން މިނިސްޓްރީން ބުންޏެވެ.

ފޮރިން މިނިސްޓްރީން ބުނީ ވިސާގެ ދަށުން ތައިލެންޑަށް އެތެރެވުމަށް ފަހު، ގަބޫލުކުރެވޭ އުޒުރަކާ ހުރެ މުއްދަތު އިތުރުކުމަށް އެދޭނަމަ ތައިލެންޑް އިމިގްރޭޝަނުން އެއް ފަހަރުގެ އެއްސްޓެންޝަނެއް ދިނުމުގެ ލުޔެއް ދޭނެ ކަމަށެވެ. އެކަމަށް މުއްދަތެއް ކަނޑައެޅުމުގެ އިހްތިޔާރު ލިބިގެން ވަނީ ތައިލެންޑްގެ އިމިގްރޭޝަނަށް ކަމަށް ފޮރިން މިނިސްޓްރީން ބުންޏެވެ. އަދި ބުނީ އެފަދަ ވިސާގައި އެއްގަމު މަގުން ތައިލެންޑަށް ދިވެއްސަކު އެތެރެވެވޭނީ އަހަރަކު ދެ ފަހަރު ކަމަށާއި އަހަރު ގުނާނީ ޖެނުއަރީ މަހުން ފެށިގެން ޑިސެމްބަރަށް ކަމަށެވެ.

ކަނޑައެޅިފައިވާ މުއްދަތަށް ވުރެ އިތުރަށް އެ ގައުމުގައި ހުރުމަކީ ބޮޑެތި އަދަބުތައް ކަނޑައެޅިފައިވާ ކުށެއް ކަމަށް ފާހަގަކޮށް، ފޮރިން މިނިސްޓްރީން ބުނީ އެފަދަ ކަމެއް ފާހަގަވެއްޖެނަމަ ޖޫރިމަނާކޮށް، ވަކި މުއްދަތަކަށް ތައިލެންޑަށް އެތެރެވުން މަނާ ކުރާނެ ކަަމަށެވެ. މުއްދަތު ހަމަވުމަށް ފަހު، އެ ގައުމުގައި އުޅޭ ދުވަސްތަކަށް 500 ބާތު (16 ޑޮލަރު) ފެށިގެން 20،000 ބާތު (632 ޑޮލަރު) ހަމައަށް ޖޫރިމަނާ ކުރާނެ ކަމަށް ފޮރިން މިނިސްޓްރީން ބުންޏެވެ.