ހއ. އާއި ހދ. އަށް އެމްޓީސީސީގެ ފެރީގެ ޚިދުމަތް ފަށަނީ
14 އެޕްރީލު 2019 | އާދީއްތަ 02:30މި ތިން ރަށަށް ކުރާ ފެރީ ދަތުރުތަކުގެ ތާވަލު ވެސް އެމްޓީސީސީން މިހާރު ވަނީ އާންމުކޮށްފައި
އެމްޓީސީސީ ހުޅުމާލެ ފެރީއެއް
ހއ. އާއި ހދ. އަތޮޅުގައި އެމްޓީސީސީގެ ފެރީގެ ޚިދުމަތް ވަރަށް އަވަހަށް ދޭން ފަށާނެ ކަމަށް މޯލޮޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީގެ ޗީފް އެގްޒެކްޓިވް އޮފިސަރ ހަސަން ޝާހު ވިދާޅުވެއްޖެ އެވެ.
ރާއްޖެ އެމްވީއަށް މައުލޫމާތު ދެއްވަމުން ޝާހު ވިދާޅުވީ އެމްޓީސީސީން ފޯރުކޮށްދެމުންދާ ދަތުރުފަތުރުގެ ޙިދުމަތް ފުޅާކުުރުމަށް ކުރަމުންދާ މަސައްކަތުގެ ދަށުން ކުރިއަށް އޮތް ތިން ދުވަސް ތެރޭގައި ދަތުރުތައް ފަށާނެ ކަމަށެވެ. އެގޮތުން ފުރަތަމަ ފެރީގެ ޚިދުމަތް ފެށުމަށް ހަމަޖެހިފައިވަނީ ދިއްދޫ، ކުޅުދުއްފުށީ އަދި ހަނިމާދޫ އަށް ކަމަށް ޝާހު ވިދާޅުވިއެވެ.
މި ވަގުތު ކުރިއަށް ދަނީ ކައުންސިލްތަކާއި މަޝްވަރާކޮށް ޕީއާރު އަދި މާކެޓިންގެ ކަންތައްތައް ކަމަށް ޝާހު ވިދާޅުވިއެވެ.
މި ތިން ރަށަށް ކުރާ ފެރީ ދަތުރުތަކުގެ ތާވަލު ވެސް އެމްޓީސީސީން މިހާރު ވަނީ އާންމުކޮށްފައެވެ. މި ދަތުރުތައް ހަފްތާގެ ހުކުރު ދުވަސް ފިޔަވާ ހުރިހާ ދުވަހެއްގައި ދިނުމަށް ވަނީ ހަމަޖެހިފައެވެ. ފެރީގެ ޙިދުމަތް ދިނުމަށް ހަމަޖެހިފައިވަނީ ކޮންމެ ދުވަހެއްގެ ވެސް ހެނދުނު 6:30 އިން 15:30އަށެވެ. އެމްޓީސީސީން ހުޅުމާލެ އާއި ހުޅުލެ އަދި ވިލިމާލެ އާއި މާލެއާ ދެމެދު ފެރީގެ ޙިދުމަތް ދެމުންގެންދެއެވެ. މީގެ އިތުރުން ބައެއް އަތޮޅުތަކަށް ވެސް އެ ކުންފުނިން ދަނީ ފެރީގެ ޚިދުމަތް ފޯރުކޮށްދެމުންނެވެ.
