އިތުރު ތިން ދާއިރާއެއްގެ ވޯޓު އަލުން ގުނަން އީސީއަށް ހުށަހަޅައިފި
ގުނަން ހުށަހެޅުއްވީ މިހާރުގެ މެންބަރުން ކަމަށްވާ ސުޖާއު އާއި އަބްދުއްރަހީމްގެ އިތުރުން ފަލާހް
ނާކާމިޔާބުވެވަޑައިގެންނެވި ތިން މެމްބަރުން
ރައްޔިތުން މަޖިލީހުގެ އިންތިހާބުގެ ބާރަށު ދާއިރާ އާއި ފޮނަދޫ ދާއިރާގެ އިތުރުން އިނގުރައިދޫ ދާއިރާގެ ވޯޓު އަލުން ގުނަން އިލެކްޝަންސް ކޮމިޝަން (އީސީ) އަށް ހުށަހަޅައިފިއެވެ.
އިލެކްޝަންސް ކޮމިޝަނުން ބުނީ އެ ތިން ދާއިރާގެ ވޯޓުތައް ގުނަން އިލެކްޝަންސް ކޮމިޝަނަށް ހުށަހެޅުއްވީ އެ އިންތިހާބުގައި ވާދަކޮށް، ނާކާމިޔާބުވެވަޑައިގެންނެވި މެމްބަރުން ކަމަށެވެ.
އެގޮތުން ބާރަށު ދާއިރާގެ ވޯޓު އަލުން ގުނަން ހުށަހެޅުއްވީ 42 ވޯޓުގެ ފަރަގަކުން އިންތިހާބުގައި ނާކާމިޔާބުވެވަޑައިގެންނެވީ އެ ދާއިރާގެ މިހާރުގެ މެމްބަރު އިބްރާހިމް ޝުޖާއުއެވެ. އިނގުރައިދޫ ދާއިރާގެ ވޯޓު އަލުން ގުނުމަށް ހުށަހެޅުއްވީ 89 ވޯޓުގެ ފަރަގަކުން އިންތިހާބުގައި ނާކާމިޔާބުވެވަޑައިގެންނެވި އިބްރާހިމް ފަލާހުއެވެ. ފޮނަދޫ ދާއިރާގެ ވޯޓު އަލުން ގުނުމަށް ހުށަހެޅުއްވީ 44 ވޯޓުގެ ފަރަގަކުން އިންތިހާބު ނާކާމިޔާބު ވެވަޑައިގެންނެވި އެ ދާއިރާގެ މިހާރުގެ މެމްބަރު އަދި ޕީއެންސީގެ ވަގުތީ ރައީސް އަބްދުއްރަހީމް އަބްދުﷲ (އަދުރޭ)އެވެ.
އިލެކްޝަންސް ކޮމިޝަނުން މިހާތަނަށް ވަނީ ދެ ދާއިރާގެ ވޯޓު އަލުން ގުނާފައެވެ. އެއީ ބާތިލު ވޯޓު ގިނަވުމުންނާއި ވޯޓުގެ ފަރަގު ކުޑަވުމުންނެވެ. އެގޮތުން މާމިގިލީ ދާއިރާ އާއި މާވަށު ދާއިރާގެ ވޯޓު ފޮށިތަކެއް އިލެކްޝަންސް ކޮމިޝަނުން ވަނީ އަލުން ގުނާފައެވެ.
އެ ވޯޓު ފޮށިތައް ގުނިއިރު، ބާތިލު ވޯޓުތަކުގެ ތެރެއިން ބައެއް ވޯޓުތައް ވަނީ ސައްހަ ކަމަށް ކަނޑައަޅާފައެވެ. ނަމަވެސް ނަތީޖާއަށް މާބޮޑު ބަދަލެއް ނާދައެވެ. ރައްޔިތުންގެ މަޖިލީހުގެ އިންތިހާބުގައި ބާތިލު ވޯޓުގެ އަދަދު 4،800 އަށް ވުރެ ގިނައެވެ.
