ވިހެއުމާއި ގުޅިގެން ދޭ ޗުއްޓީ އޭސީސީންވެސް އިތުރުކޮށްފި
އަނބިމީހާ ވިހެއުމާއި ގުޅިގެން ފިރިހެން މުވައްޒަފުންނަށް އެއްމަސް ދުވަހުގެ ޗުއްޓީ ދޭން ހަމަޖެހިފައިވޭ
އޭސީސީގެ މުވައްޒަފުންތަކެއް
ވިހެއުމާއި ގުޅިގެން ދޭ ޗުއްޓީގެ މުއްދަތު އެންޓި ކޮރަޕްޝަން ކޮމިޝަން (އޭސީސީ) އިންވެސް އިތުރުކޮށްފި އެވެ.
އޭސީސިން އަންގާރަ ދުވަހު ނެރުނު ބަޔާނެއްގައި ބުނީ، އެ ކޮމިޝަންގައި މަސައްކަތްކުރާ މުވައްޒަފުންނަށް ވިހެއުމާއި ގުޅިގެން ދެވޭ ޗުއްޓީގެ މުއްދަތު އޭޕްރީލް އެކަކުން ފެށިގެން އިތުރުކޮށްފައިވާ ކަމަށެވެ. އެގޮތުން މުވައްޒަފަކު ވިހާނެ ކަމަށް ލަފާކުރާ ދުވަސް ބަޔާންކޮށް ރަޖިސްޓްރީ ކޮށްފައިވާ ސިއްޙީ ޚިދުމަތްދޭ ފަރާތަކުން ދޫކުރާ މެޑިކަލް ސެޓްފިކެޓެއް ނުވަތަ އެކަން ބަޔާންކުރާ ލިޔުމެއް ހުށައަޅަން ޖެހޭނެ ކަމަށް އޭސީސީން ބުންޏެެވެ. އަދި ހުށަހެޅުމުން އެމުވައްޒަފަކަށް، ވިހެއި ތާރީޚުން ފެށިގެން ހަމަސް ދުވަހުގެ ޗުއްޓީއެއް ބަންދު ދުވަސްތައް ހިމަނައިގެން އެމުވައްޒަފެއްގެ މުސާރައާއި ޢިނާޔަތްތަކާއެކު ދިނުމަށް ކޮމިޝަނުން ނިންމައިފައިވާ ކަމަށް އެ ކޮމިޝަނުން ބުންޏެވެ.
މީގެ އިތުރުން އަނބިމީހާ ވިހެއުމާއި ގުޅިގެން ފިރިހެން މުވައްޒަފުންނަށްވެސް މުސާރަ ލިބޭގޮތަށް، އެއް މަސް ދުވަހުގެ ޗުއްޓީއެއް ދިނުމަށް ނިންމާފައިވާ ކަމަށް އޭސީސީން ބުންޏެވެ.
އޭސީސީން ވިހެއުމާއި ގުޅިގެން ޗުއްޓީ ދިނުމަށް ނިންމާފައިވާއިރު، ވިހެއުމުން އަންހެނުންނަށް ހަ މަސް ދުވަހުގެ ޗުއްޓީ ލިބޭ ގޮތަށް، އަދި ފިރިހެނުންނަށް އެއް މަސް ދުވަހުގެ ޗުއްޓީ ލިބޭ ގޮތަށް ސަރުކާރުން ބަދަލު ގެނައިކަން އިއުލާން ކުރީ، އަންހެނުންގެ ދުވަސް ފާހަގަކުރުމަށް ބޭއްވި ޖަލްސާގައި ރައީސް އިބްރާހިމް މުހައްމަދު ސޯލިހެވެ.
ސަރުކާރުން ގެނައި އެ ބަދަލާ އެކު، ސަރުކާރު ހިއްސާވާ ކުންފުނިތަކުން ވެސް ވަނީ އެ އުސޫލުން ޗުއްޓީއަށް ބަދަލުތައް ގެނައިކަން އިއުލާން ކޮށްފައެވެ. އެގޮތުން ސަރުކާރުގެ ވިޔަފާރި ކުންފުނި، އެސްޓީއޯ އިން ބުނީ ސަރުކާރުގެ ސިޔާސަތަށް ތާއީދުކޮށް، އެ ކުންފުނީގެ މުވައްޒިފުންނަށް ވެސް ހަ މަސް ދުވަހުގެ ޗުއްޓީއެއް ދިނުމަށް ނިންމާފައިވާ ކަމަށެވެ.
