އިންތިޚާބުގައި ފުލުހުން ދެއްކި ޕްރޮފެޝަނަލިޒަމްއާ މެދު ފަޚުރުވެރިވަން: ސީޕީ
އިންތިޚާބުގެ ސަލާމަތީ ކަންކަން ބެލެހެއްޓުމަށް 500 އަށް ވުރެ ގިނަ ފުލުހުން ހަރަކާތެރި
ސިޕީ ހަމީދު
ރައްޔިތުންގެ މަޖިލިސް އިންތިޚާބާ ގުޅިގެން ފުލުހުން ކުރިއަށް ގެންދިޔަ އޮޕަރޭޝަނުގައި ފުލުހުންގެ ފަރާތުން ފެނިގެންދިޔަ ޕްރޮފެޝަނަލިޒަމާ މެދު ފަޚުރުވެރިވާ ކަމަށް ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވެއްޖެއެވެ.
ކޮމިޝަނަރ އޮފް ޕޮލިސް މުޙައްމަދު ޙަމީދު މިހެން ވިދާޅުވީ އާދިއްތަ ދުވަހުގެ ރޭ ކުރެއްްވި ޓްވީޓެއްގައެވެ. ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވީ ރައްޔިތުންގެ މަޖިލިސް އިންތިޚާބުގެ ސަލާމަތީ ކަންކަން ބެލެހެއްޓުމަށް ފުލުހުން ކުރިއަށް ގެންދިޔަ އޮޕަރޭޝަން "ބްލޫ ޓައިޑް" ކާމިޔާބުކަމާ އެކު ކުރިއަށް ގެންދިޔުމުގައި އޮޕަރޭޝަން ކޮމާންޑަރާއި ޑެޕިއުޓީ ކޮމާންޑަރު އަދި އޮޕަރޭޝަނުގައި ހަރަކާތްތެރިވި ހުރިހާ ފުލުހުން ކުރެއްވި މަސައްކަތްތައް ފާހަގަކުރައްވައި މަރުޙަބާ ދަންނަވާ ކަމަށެވެ.
ކޮމިޝަނަރ އޮފް ޕޮލިސް މުޙައްމަދު ޙަމީދު ވަނީ އޮޕަރޭޝަން "ބްލޫ ޓައިޑް" ފެށުމުގެ ގޮތުން ބޭއްވި ބްރީފިންގައިވެސް ފުލުހުންނާ މުޚާތަބު ކުރައްވައި، ދަޢުލަތަށާއި ދިވެހި އެންމެހާ ރައްޔިތުންނަށް ފުލުހުންގެ ޕްރޮފެޝަނަލިޒަމާއި ފުލުހުންގެ މަސައްކަތުގެ ނަމޫނާ ދައްކުވައިދޭން ލިބިގެންދާ ވަރަށް ރަނގަޅު ފުރުޞަތެއް ކަމަށް ވިދާޅުވެ، އެ ފުރުޞަތުގެ ބޭނުން ކޮންމެ ފުލުހަކު ވެސް ހިފައި، ފުލުހުންގެ ޕްރޮފެޝަނަލިޒަމާއި މަސައްކަތުގެ ނަމޫނާ ދައްކުވައި ދޭނެ ކަމަށް އުއްމީދުކުރައްވާ ކަމަށް ވިދާޅުވެފައެވެ.
އިންތިޚާބުގެ ސަލާމަތީ ކަންކަން ބެލެހެއްޓުމަށްޓަކައި މުޅި ރާއްޖޭގައި 500 އަށް ވުރެ ގިނަ ފުލުހުން ވަނީ ހަރަކާތެރިވެފައެވެ.
