އިންތިޚާބުގައި ޖޭޕީ އަށް ބޮޑު ނާކާމިޔާބީއެއް ކުރިމަތިވީ ''ވަގެއް''ގެ އަތުގައި ހިފުމުން: އަލީ ސޯލިހު
ޖޭޕީން ރައްޔިތުންގެ އިތުބާރު ގެއްލުވާލީ
ޖޭޕީ ކައުންސިލް މެންބަރު އަދި އެ ޕާޓީގެ ސްޕޯކްސްޕާސަންގެ މަގާމުގައި ވެސް ހުންނެވި އަލީ ސޯލިހު
ރައްޔިތުން މަޖިލިސް އިންތިޚާބުގައި ޖުމްހޫރީޕާޓީއަށް ބޮޑު ނާކާމިޔާބީ ކުރިމަތިވީ "ވަގެއް"ގެ އަތުގައި ހިފުމުން ކަމަށް އެޕާޓީގެ ކައުންސިލް މެންބަރު އަދި މިނިސްޓްރީ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީގެ ސްޓޭޓް މިނިސްޓަރު އަލީ ސޯލިހު ވިދާޅުވެއްޖެއެވެ.
ޖޭޕީގެ ސްޕޯކްސްޕާސަންގެ މަގާމުގައި ވެސް ހުންނެވި އަދި ކައުންސިލް މެންބަރު އަލީ ސޯލިހު ވިދާޅުވީ "ވަގެއް"ގެ އަތުގައި ހިފުމުން އެކަން ރައްޔިތުން ބަލައިނުގަންނާނެ ކަމަށާއި، ޖޭޕީން ރައްޔިތުންގެ އިތުބާރު ނަގާލީ ކަމަށެވެ. އަދި ވިދާޅުވީ "ވަގެއް"ގެ އަތުގައި ހިފީމަ ދަތް އަޅާނެކަން މިހާރު ވިސްނޭނެ ކަމަށް ވެސް އޭނާ ވިދާޅުވިއެވެ.
މިނިސްޓަރު އަލީ ސޯލިހު ވިދާޅުވީ ކުރީގެ ރައީސް އަބްދުﷲ ޔާމީންގެ ފަހަތަކަށް ޖޭޕީގެ ލީޑަރު ގާސިމް އިބްރާހިމް ދިއުމަކީ މި ނާކާމިޔާބީގެ އަސްލު ކަމަށެވެ.
މަޖިލިސް އިންތިޚާބު ކާމިޔާބު ކުރެއްވި ކެންޑިޑޭޓުންނަށް މަރުހަބާ ދަންނަވާ އަލީ ސޯލިހު ވިދާޅުވީ "ވަގެއް"ގެ އަތުގައި ނުހިފުމަށް ކުރި އާދޭސް ބަލައިނުގަނެ، އެ އަތުގައި ހިފުމުން ލިބުނު ނާކާމިޔާބީއަށްޓަކައި ލަދުވެތިވެ، ހިތާމަކުރާ ކަމަށެވެ.
ހޮނިހިރު ދުވަހު ކުރިއަށް ގެންދިޔަ ރައްޔިތުން މަޖިލިސް އިންތިޚާބުގެ ވަގުތީ ނަތީޖާތައް ލިބެމުން އަންނަ އިރު ސަރުކާރު ހިންގާ މައި ޕާޓީ އެމްޑީޕީ 60 ވަރަކަށް ގޮނޑި ލިބޭނެ ކަމަށް އަންދާޒާ ކުރެވެއެވެ.
