މަދާސް ޑޭ ގައި ސްރީދޭވީގެ މޮމް ޗައިނާގައި ރިލީޒް ކުރަނީ

ބޮލީވުޑްގެ ފުރަތަމަ އަންހެން ސުޕަރ ސްޓާރ ސްރީދޭވީ އެންމެ ފަހުން ކުޅެފައިވާ ފިލްމް "މޮމް" ޗައިނާގައި ރިލީޒް ކުރުމަށް ހަމަޖައްސައިފިއެވެ.

މި ފިލްމް މިހިނގާ މާރޗް މަހުގެ 22 ގައި ޗައިނާގައި ކުރިން ރިލީޒް ކުރަން ނިންމި ނަމަވެސް ފަހުން ވަނީ ފިލްމް ރިލީޒް ކުރާދުވަސް މަދާސްޑޭ ގެ ގޮތުގައި ފާހަގަ ކުރާ ދުވަސް 10 މެއި ގައި ރިލީޒް ކުރުމަށް ނިންމާފައެވެ.

ރަވީ އުދްޔަވާރު ޑައިރެކްޓް ކޮށްފައިވާ މި ފިލްމް ގައި ސްރީދޭވީ ފެނިގެން ގޮސްފައިވަނީ ގޭންގް ގްރޫޕަކުން ރޭޕް ކުރި ދޮން ދަރިފުޅަށް އިންސާފު ހޯދައި ދިނުމަށް މަސައްކަތް ކުރާ ދޮން މަންމައެއްގެ ރޯލުންނެވެ.

މި ފިލްމުގައި ސްރީދޭވީ އަދާކުރި ރޯލަށް ވަނީ ގައުމީ އެވޯޑްވެސް ލިބިފައެވެ.

ޒީ ސްޓޫޑިއޯ އިންޓަނޭޝަނަލް އިން މި ފިލްމް މީގެ ކުރިން ވަނީ 40 ރީޖަން އެއްގައި ރިލީޒް ކޮށްފައެވެ.

އޭގެ ތެރޭގައި ޕޮލޭންޑް، ރަޝިޔާ، ޔޫކޭ، ސިންގަޕޯރ އަދި ޗެކް ރިޕަބްލިކް ހިމެނެއެވެ.

"މޮމް" ރިލީޒްކޮށްފައިވަނީ 2017 ވަނަ އަހަރުއެވެ.

ސްރީދެވީ އެންމެ ފަހުން ފެނިގެން ގޮސްފައިވަނީ "ޒީރޯ" އިންނެވެ. މި ފިލްމްގައި ސްރީދޭވީ ފެނިގެން ގޮސްފައިވަނީ ޚާއްސަ ފެނިލުމަކުންނެވެ.

ސްރީދޭވީ މަރުވެފައިވަނީ މިދިޔަ އަހަރުގެ ފެބްރުއަރީމަހު ކުއްލިގޮތަކަށް ދުބާއީގައެވެ.