ބޮލީވުޑް އެކްޓަރ ސަލްމާން ޚާން ޑޮނަލްޑް ޑަކް އާއި ޓިގާ އާއި އެކު ނަށައިފި އެވެ.
ސަލްމާން ނަށާފައިވަނީ މިދިޔަ ހޮނިހިރު ދުވަހު ސަލްމާން ޚާންގެ ނެފިއު އާހިލްގެ ތިންވަނަ އުފަން ދުވަހުގެ ޕާޓީގައެވެ.
ސޯޝަލް މީޑިއާގައި ދައުރުވަމުންދާ ވީޑިއޯގައި ސަލްމާން ފެނިގެން ދަނީ ސޯޓަކާއި ގަމީހެއް ލާފައި ބޮލުގައި ތޮފި އަޅައިގެން ހުއްޓައެވެ.
އެ ވީޑީއޯގައި ޑޮނަލްޑް ޑަކްގެ ކޮސްޓިއުމްގައި ހުރި މީހާއާއި އެކު ސަލްމާން ނަށާމަންޒަރު ފެނިގެން ދެއެވެ. އެހެން ވީޑިއޯއެއްގައި ޓިގާ ކޮސްޓިއުމްގައި ހުރި މީހަކު ސަލްމާން އަށް "ފްލޮސް" ޑާންސް ސްޓެޕް ދަސްކޮށްދޭ މަންޒަރު ފެނެއެވެ.
ސަލްމާންގެ ކޮއްކޮ އަރްޕިތާ ޚާންގެ ފިރިހެން ދަރިފުޅު އާހިލް އާއި ސަލްމާން އާއި ދެމެދު ވަރަށް ގާތް ގުޅުމެއް އޮވެއެވެ. ސަލްމާން ސޯސަލް މީޑިއާގައި އާހިލްގެ ފޮޓޯތާކައި ވީޑިއޯ ސަލްމާން އަބަދުވެސް ހިއްސާކުރަމުން ގެންދެއެވެ.
އާހިލްގެ ބައްޕަ އަދި ސަލްމާންގެ ޅިޔަނު އާޔުޝް ޝަރްމާ ބޮލީވުޑަށް ތަޢާރަފް ވެގެން ގޮސްފައިވަނީ ސަލްމާންގެ ފިލްމް "ލަވްޔާތްރީ" އިންނެވެ. މި ފިލްމަށް ބޮކްސް އޮފީހުގައި މާ ބޮޑު ތަރުހީމެއް ލިބިގެން ގޮސްފައެއް ނުވެއެވެ.
ސަލްމާން ދެން އެންމެ އަވަހަށް ފެނިގެންދާނީ އަލީ އައްބާސް ޒަފަރުގެ ފިލްމް "ބާރަތް" އިންނެވެ. މި ފިލްމްގައި ސަލްމާން އާއި އެކު ފެނިގެންދާނީ ކެޓްރީނާ ކެއިފް، ތައްބޫ، ދިޝާ ޕަޓާނީ އަދި ސުނިލް ގްރޯވާއެވެ. މި ފިލްމް ރިލީޒް ކުރުމަށް ހަމަޖެހިފައިވަނީ މިއަހަރުގެ އީދުގައެވެ.
