ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ސަރުކާރު ހިންގާ މައި ޕާޓީ، އެމްޑީޕީން މަދުވެގެން 58 ގޮނޑި ކާމިޔާބު ކުރާނެ ކަމަށް އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ތިމަރަފުށީގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ ސަރުކާރު ކެންޑިޑޭޓުން ނުތިބޭނެ ކަމަށާއި އެއީ ބޯދާ ވާހަކައެއް ކަމަށެވެ. ތިމަރަފުށީ ދާއިރާއަށް ކުރިމަތިލައްވާފައިވާ އެމްޑީޕީގެ ކެންޑިޑޭޓަކީ އެ ދާއިރާގެ މިހާރުގެ ވެސް މެމްބަރު މުހައްމަދު މުސްތަފާ ކަމަށާއި އެއީ އެމަނިކުފާނުގެ ކެންޑިޑޭޓް ކަމަށް ރައީސް ނަޝީދު ވިދާޅުވިއެވެ.

"އިރާދަ ކުރެއްވިއްޔާ އަޅުގަނޑުމެން އޭގެ ތެރެއިން [86 ކެންޑިޑޭޓުންގެ] ދަންނަވަންތޯ މަދުވެގެން 58 މީހުން ނުވަތަ 59 މީހުން ނަގާނަން. މަދުވެގެން ނަގާނަން،" ރައީސް ނަޝީދު ވިދާޅުވިއެވެ.

ވާދަވެރި ފަރާތްތަކަށް ބަހުގެ ހޫނު ހަމަލަތަކެއް ރައްދު ކުރި ޖަލްސާގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ އެމަނިކުފާނުގެ ތާއިދު އޮތީ މުސްތަފާއަށް ކަމަށާއި އޭނާއަށް ތާއިދު ކުރާނެ އިތުރު މީހަކު ތިމަރަފުށީ ރައްޔިތުން ބަލަން އުޅޭތީ އެކަމާ ދެރަވާ ކަމަށެވެ. ތިމަރަފުށީ އެމްޑީޕީ ހަރުގޭގައި މަސައްކަތް ކުރި ބައެއް މީހުން، މަޖިލިސް އިންތިހާބާ ދިމާކޮށް، ޕާޓީގެ ހަރަކާތްތަކުން ދުރަށް ޖެހިފައިވާތީ ރައީސް ނަޝީދު ވަނީ އެކަމާ ކަންބޮޑުވުން ފާޅު ކުރައްވައި ވާހަކަފުޅު ދައްކަވާފައެވެ.

"އަޅުގަނޑުގެ ކެންޑިޑޭޓަކީ ތިމަރަފުށީ މުސްތަފާ. އަޅުގަނޑު ވަރަށް ދެރަވޭ، އެހެން ކޮން މީހެއްތޯ މުސްތަފާބެއަށް ތާއިދު ކުރޭތޯ ބަލާތީ. އަޅުގަނޑު މި ދަންނަވަނީ އަޅުގަނޑުގެ ކެންޑިޑޭޓަކީ މުސްތަފާބޭ. ތިބޭފުޅުން އެހެން މީހަކު ކީއްވެގެންތޯ އޭ ހޯއްދަވަނީ މުސްތަފާބެއަށް ތާއިދު ކުރަން. އެކަމާއޭ އަޅުގަނޑު ހިތްހަމަނުޖެހިގެން އުޅެނީ،" ތިމަރަފުށީ ގިނަ އަދަދެއްގެ ބަޔަކު ބައިވެރިވި ޖަލްސާގައި ނަޝީދު ވިދާޅުވިއެވެ.

މުސްތަފާއާ ދެކޮޅަށް ތިމަރަފުށީ ދާއިރާއަށް ނުކުންނަވާ ހަތަރު ކެންޑިޑޭޓުންގެ ތެރެއިން އޭނާއާ އެންމެ ވާދަވެރި ކެންޑިޑޭޓަކީ ޖުމްހޫރީ ޕާޓީގެ ލީޑަރު އަދި ކިނބިދޫ ދާއިރާގެ މިހާރުގެ މެމްބަރު އަބްދުﷲ ރިޔާޒެވެ. ކެމްޕެއިންގައި ރިޔާޒާއި މުސްތަފާ ގެންދަވަނީ ބަހުގެ ހޫނު ހަމަލާތަކެއް ރައްދު ކުރަމުންނެވެ.

ރައްޔިތުންގެ މަޖިލީހުގެ އިންތިހާބުގައި ތިމަރަފުށީ ދާއިރާއަކީ އަބަދުވެސް ވާދަވެރިކަން ބޮޑު ދާއިރާއެކެވެ. އެގޮތުން އެންމެ ފަހުން ބޭއްވި ރައްޔިތުންގެ މަޖިލީހުގެ އިންތިހާބުގައި އެ ދާއިރާގެ ގޮނޑި މުސްތަފާ ކާމިޔާބު ކުރެއްވީ 11 ވޯޓުގެ ތަފާތުންނެވެ. ދެހާސްސާދަ ވަނަ އަހަރު ބޭއްވި އެ އިންތިހާބުގައި މުސްތަފާއާ ވާދަކޮށް ނާކާމިޔާބު ވެވަޑައިގެންނެވީ ޕީޕީއެމްގެ ފަރާތުން ނުކުންނެވި އޭރު އެ ދާއިރާގެ މެމްބަރު އަދި އިލެކްޝަންސް ކޮމިޝަންގެ މިހާރުގެ ރައީސް އަހުމަދު ޝަރީފެވެ. ޝަރީފަށް ލިބިވަޑައިގެންނެވީ 975 ވޯޓެވެ. މުސްތަފާ އިންތިހާބު ކާމިޔާބު ކުރެއްވީ 986 ވޯޓުންނެވެ.