ރަސްފަންނު މޫދަށް އެރުން މަނާކޮށްފި
ބަލަންޖެހޭ ބެލުންތައް ބެލުމަށްފަހު ހުޅުވާނެ
ރަސްފަންނަށް މޫދަށް އެރުން މަނާކޮށް ކޯޑަށްކޮށްފައި
ރަސްފަންނަށް މޫދަށް އެރޭ ސަރަހައްދުގައި ނަޖިސްތައް ދައުރުވާކަމުގެ ޝަކުވާ ބޮޑުވުމުން، ރަސްފަންނަށް މޫދަށް އެރުން މަނާކޮށްފިއެވެ.
މާލެ ސިޓީ ކައުންސިލުން ބުނީ ރަސްފަންނަށް މޫދަށް އެރުން މަނާކުރީ ބަލަންޖެހޭ ބައެއް ކަންކަން ބެލުމަށް ކަމަށާއި ހުޅުވާނެ ވަކި ތާރީހެއް ފަހުން އިއުލާން ކުރާނެ ކަމަށެވެ.
ރަސްފަންނު މޫދުގައި ނަޖިސް ދައުރުވާ ކަމުގެ ޝަކުވާ ބޮޑުވެ، އެތަނުން ފެނުނު ނަޖިސްތަކެއްގެ ފޮޓޯއާ އެކު ސޯޝަލް މީޑިއާގައި ބައެއް މީހުން ދަނީ ކަންބޮޑުވުންފާޅު ކުރަމުންނެވެ. ރަސްފަންނުން ނަޖިސް ފެނުމާ އެކު، އެ މައްސަލަ ފުލުހުންނަށް ހުށަހެޅުމުން، ހުކުރު ދުވަހުގެ ރޭގެ ވަގުތެއްގައި ފުލުހުން ވަނީ އާންމުންނަށް މޫދަށް ނޭރެވޭ ގޮތަށް ކޯޑަންކޮށްފައެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނީ ރަސްފަންނު މޫދުގައި ނަޖިސް ދައުރުވެ، ތަގައްޔަރުވެފައިވާ ކަމުގެ ޝަކުވާ ލިބިފައިވާ ކަމަށާއި އެކަން ބަލަމުންދާތީ މޫދަށް ނޭރުމަށް އިލްތިމާސްކުރާ ކަމަށެވެ.
ރަސްފަންނަށް ނަޖިސް ބޭރުވުމަކީ އާންމު ކަމެކެވެ. އެގޮތުން އެ ސަރަހައްދު ކަނޑައަށް ގުޅާފައިވާ ނަޖިސް ހޮޅިތައް ފަޅައިގެން ގޮސް، ނަޖިސް ލީކުވެއެވެ.
