ގަރޫޑާ އެއާލައިނުން ބޮއިން އަށް ދީފައިވާ އޯޑަރުތައް ކެންސަލް ކުރަނީ!

އިންޑޮނޭޝިއާގެ ގަރޫޑާ އެއާލައިނުން އޯޑަރު ކޮށްފައިވާ ބޮއިން 737 މެކްސް 8 މަރުކާގެ 49 ފްލައިޓް ކެންސަލް ކުރަން ބޭނުންވާ ކަމަށް އެކުންފުނިން ބުނެފިއެވެ.

އިންޑޮނޭޝިއާގެ މި ނިންމުން އައިސްފައި މިވަނީ ފާއިތުވި ފަސް މަސް ދުވަސް ތެރޭގައި މި މަރުކާގެ ދެފްލައިޓް ވެއްޓި އެތައް ބަޔަކު މަރުވި ހާދިސާ އަށް ފަހުއެވެ.

އޭގެ ތެރޭގައި އިންޑޮނޭޝިއާގެ ލަޔަން އެއާލައިންގެ ބޮއިން 737 މެކްސް 8 މަރުކާގެ ފްލައިޓެއް ވެސް ހިމެނެއެވެ. ހަމަ މި މަރުކާގެ އިތިއޮޕީއާގެ ފްލައިޓް ވެއްޓުނު ހާދިސާ ފަހު ބޮއިން ފްލައިޓް ތަކުގެ ރައްކާތެރި ކަމާއި މެދު ސުވާލު އުފައްދައި ބޮޑެތި އެއާލައިން ތަކުން ބޭނުން ކުރަމުން އައި ބޮއިން މެކްސްގެ ފްލައިޓްތައް ވަނީ ގްރައުންޑް ކޮށްފައެވެ. ދެ ފްލައިޓް ވެއްޓުނު ހާދިސާ ތަހްގީގު ކޮށް ނުނިމެނީ އިތުރަށް ދަތުރު ނުކުރާނެ ކަމަށް ބައެއް އެއާލައިންތަކުން ވަނީ ބުނެފައެވެ.

އިންޑޮނޭޝިއާގެ ގައުމީ އެއާލައިން ޕީޓީ ގަރުޑާއިން 2014 ވަނަ އަހަރު މެކްސް 8 މަރުކާގެ 50 ފްލައިޓަށް އޯޑަރު ކޮށްފައިވާއިރު މިހާތަނަށް ލިބިފައިވަނީ އެންމެ ފްލައިޓެކެވެ.

އޯޑަރު ކުރި ފްލައިޓްތަކުގެ އަގަށް 4.9 ބިލިއަން ޑޮލަރު އަރާއިރު، އެ އޯޑަރު ކެންސަލް ކުރުމަށް ބޮއިން ކުންފުންޏަށް ސިޓީއެއް ފޮނުވާފައިވާނެ ކަމަށް އެއާލައިންގެ ތަރުޖަމާނު ރޮސަން ވަނީ އޭއެފްޕީ އަށް ވިދާޅުވެފައެވެ.

ގަރޫޑާ އިން ބޮއިން އަށް އޯޑަރު ދިން އިރު 26 މިލިއަން ޑޮލަރު ވަނީ ދައްކާފައެވެ.

އޭނާ ވިދާޅުވީ، އޯޑަރު ކެންސަލް ކުރުމާއި ބެހޭ ގޮތުން ބޮއިންގެ އިސްފަރާތްތަކާއި އެކު ވެރިރަށް ޖަކާޓާގައި މަޝްވަރާ ކުރުމަށް ހަމަޖެހިފައިވާ ކަމަށެވެ.

އެ މަރުކާގެ ފްލައިޓްތައް ބޭނުން ނުވާ ކަމަށާއި ،ފަހަރެއްގައި ބޮއިންގެ އެހެން މޮޑެލް އަށް ބަދަލުކުރުން އެކަށީގެންވާ ކަމަށް އޭނާ ވިދާޅުވިއެވެ. އެހެން ނަމަވެސް އިންޑޮނޭޝިއާގެ ފަސެންޖަރުން ބޮއިން މެކްސްގެ އެއްވެސް ފްލައިޓަކުން ދަތުރު ކުރަން ބޭނުންނުވާ ކަމަށް ރޮސަން ފާހަގަކުރެއްވިއެވެ.

ގަރޫޑާ އިން ދިން ފްލައިޓް އޯޑަރު ކެންސަލް ކުރަން ނިންމާފައިވާއިރު ޕޮލެންޑްގެ ގައުމީ އެއާލައިން ޕީއެލްއެލްއެލްއޯޓީ އިން ދަނީ، ފްލައިޓްތައް ގްރައުންޑު ކުރުމުގެ ސަބަބުން ލިބުނު ގެއްލުމުގެ ބަދަލު ހޯދުމަށް މަސައްކަތް ކުރަމުންނެވެ.

އެލްއޯޓީ އިން ހުކުރު ދުވަހު ނެރުނު ބަޔާނެއްގައި ބުނީ، ކުންފުނިން މިހާރު މަޑުކޮށްލައިގެން ތިބީ އަލުން ބޮއިން މެކްސް 8 މަރުކާ ބޭނުން ކުރުމާއި ބެހޭ ގޮތުން ބޮއިން ކުންފުނީގެ ބަހެއް ލިބެންދެން ކަމަށެވެ. ލޮޓް އެއާލައިނުގައި މެކްސް މަރުކާގެ ފަސް ފްލައިޓް ގެންގުޅޭ އިރު އިތުރަށް މެކްސް މަރުކާގެ ނުވަ ފްލައިޓަކަށް ވަނީ މީގެ ކުރިން އޯޑަރު ދީފައެވެ. އެ އެއާލައިންގައި ޖުމްލަ 80 އެއާކްރާފްޓެއް ގެންގުޅޭއެވެ.

މީގެ އިތުރުން ޕޮލެންޑްގެ ޗާޓާ އެއާލައިން އެންޓާ އެއާއިން ބުނީ، ފްލައިޓްތައް ދަތުރު ނުކުރެވި ގްރައުންޑް ކުރަން ޖެހުމުން ލިބުނު ގެއްލުމުގެ ބަދަލު ހޯދާނެ ކަމަށެވެ.

މި މަހުގެ ކުރީ ކޮޅު ނޯވާޖިއަން އެއާޝަޓުލް އިން ވެސް ވަނީ ބޮއިންގެ ފަރާތުން ބަދަލު ހޯދާނެ ކަމަށް ބުނެފައެވެ. އެ އެއާލައިނުން ބޭނުން ކުރަމުން އައި ބޮއިން 737 މެކްސް 8 މަރުކާގެ 18 ފްލައިޓް ވަނީ ގްރައުންޑް ކޮށްފައެވެ.