އިންޑިއާއިން ދުއްވާ ބޮއިންގ 737 ބޯޓުތަކަށް ޚާއްސަ ސަމާލުކަމެއް ދީގެން ސަރވެލަންސް ކުރަން ފަށައިފި
ދުނިޔޭގައި މިވަގުތު ބޮއިންގ 737 އަދި 800 ގެ 4،208 ބޯޓު ޚިދުމަތުގައި ބޭނުންކުރޭ
ޗައިނާގެ ބޯޓުވެއްޓުން
ޗައިނާ އީސްޓަރން އެއާލައިންސްގެ ބޮއިންގ 737 ބޯޓެއް ހޯމަ ދުވަހު ވެއްޓުނު ހާދިސާ އާއި ގުޅިގެން އިންޑިއާއިން ދުއްވާ ބޮއިން 737 ބޯޓުތަކަށް ޚާއްސަ ސަމާލުކަމެއް ދީގެން ސަރވެލަންސް ކުރަން ފަށައިފި އެވެ. އިންޑިޔާގެ އެވިއޭޝަން ރެގިއުލޭޓަރުގެ ފަރާތުން މިހާރުވަނީ އެމަރުކާގެ ބޯޓުތަކުގެ ފްލައިޓް ޕޮރޮސީޖިއަރ، އެއާވޯރދިނަސް އަދި އޮޕަރޭޝަންސްގެ ކަންކަން މޮނީޓަރުކުރުމަށް ޙާއްސަ ޓީމްތަކެއް އެކި ސަރަޙައްދުތަކަށް ފޮނުވާފައެވެ.
ޗައިނާއަށް ހޯމަ ދުވަހު ވެއްޓުނު ބޯޓުން 132 މީހުން ދަތުރު ކުރި އިރު، ބޯޓު އުދުހުނީ ކުންގމިންގ އިން ފުރައިގެން ގުއަންގޒޫ އަށް ދިޔުމަށެވެ. އަދި ބޯޓު ވެއްޓިފައިވަނީ ފަރުބަދަމަތީގެ ގަސް ގިނަ ހިސާބަކަށެވެ.
ވެއްޓުމާއެކު ބޯޓާއި، ބޯޓު ވަށައިގެންވާ ގަސްތަކުގައިވަނީ އަލިފާން ރޯވެފައެވެ. އަދި ބޯޓުން ދަތުރުކުރި އެއްވެސް މީހަކު ސަލާމަތް ނުވާކަމަށް ޗައިނާގެ ސްޓޭޓް މީޑީއާއިން އަންގާރަ ދުވަހު ބުނެފައިވެއެވެ.
މިހާދިސާއާއި ގުޅިގެން ޗައިނާ އިންވެސް ވަނީ ހުރިހާ ބޮއިންގ737 އަދި 800 ގެ ބޯޓުތައް ގްރައުންޑް ކޮށްފައެވެ.
އިންޑިޔާގައި އަޅަންފެށި ސަލާމަތީ ފިޔަވަޅުތަކާބެހޭ ގޮތުން އިންޑިޔާގެ ޑައިރެކްޓަރޭޓް ޖެނެރަލް އޮފް ސިވިލް އެސޯސިއޭޝަންގެ ޗީފް އަރުން ކުމާރު ވިދާޅުވީ މަތިންދާ ބޯޓުތަކުގެ ރައްކާތެރިކަމަކީ ވަރަށް އިސްކަމެއް ދޭންޖެހޭކަމެއް ކަމަށްވުމާއެކު މިވަގުތު ބޯޓުތަކުގެ ސަރވެލަންސަށް ވަރަށް އިސްކަމެއް ދީގެން ބަލަމުންދާކަމަށެވެ.
އިންޑިޔާގެ އެއާލައިންތަކުގެ ތެރެއިން ސްޕައިސް ޖެޓް، ވިސްތާރާ، އެއާރ އިންޑިއާ އެކްސްޕްރެސްގެ ފްލީޓްތަކުގައި ބޮއިންގ 737 އަދި 800 ގެ ބޯޓުތައް ހިމެނެއެވެ.
ޗައިނާގައި ހިނގި ބޯޓުވެއްޓުމުގެ ހާދިސާ އާއި ގުޅިގެން އެމެރިކާގެ ބޮއިންގ ކުންފުނިން ބުނީ ޗައިނާގެ ތަހުގީގުގައި ގާތުން ބައިވެރިވެ އެހީތެރިވަމުން ދާކަމުގައެވެ.
ދުނިޔޭގައި މިވަގުތު ބޮއިންގ 737 އަދި 800 ގެ 4،208 ބޯޓު ޚިދުމަތުގައި ބޭނުންކުރެވޭ ކަމަށް ވެއެވެ. 1990 ގެ އަހަރުތަކުގެ ފަހުކޮޅު ފުރަތަމަ އުފެއްދި ބޮއިންގ 737 އަދި 800 އަކީ ވަރަށް ރަނގަޅު ސޭފްޓީ ރިކޯޑެއް އޮންނަ މަރުކާއެއްކަމަށްވެއެވެ. ހޯމަ ދުވަހު ޗައިނާއަށް ވެއްޓުނު ބޯޓަކީވެސް އެންމެ ހަތްއަހަރުވެފައިވާ ބޯޓެއް ކަމަށް ވެއެވެ.
ބޯޓު ވެއްޓުނު ސަބަބެއް އަދިވެސް ނޭނގޭއިރު ބޯޓުގެ ކަޅުފޮށި އަދި ކޮކްޕިޓް ވޮއިސް ރެކޯޑަރު ހޯދުމުގެ މަސައްކަތް ދަނީ ކުރަމުންނެވެ.
